Steingrímur stendur sig vel í þessu máli

Ég fagna frumkvæði Steingríms í þessu máli. Hann má eiga að hann hefur verið óþreytandi í sínu pólitíska starfi þó maður sé ekki alltaf sammála honum.

Ég hef aldrei kosið vinstri græna en mér finnst sjálfsagt að geta þess sem vel er gert.

Takk fyrir Steingrímur! 

Frysting tekin fyrir hjá Evrópuráðsþinginu

Það styttist í að ríkisstjórnin verði borin út - Í ALVÖRU!

Það er nokkuð ljóst að það er ekkert að hægjast um í hugum fólksins í landinu.

Það vita allir sem vilja vita að það er ekki verið að vinna í þágu fólksins í landinu heldur einkavinanna í landinu.

Fólkið í landinu og fyrirtækin þurfa nú samstöðu um stórfellda og almenna niðurfærslu á skuldum að halda svo samfélagið rúlli ekki í heild sinni yfirum á nokkrum vikum.

Ríkið stal öllum skuldkröfum gömlu bankanna, mun ekki standa skil á neinu til útlanda og verður þess vegna að deila ránsfengnum með skuldurum þessa lands. Það ræður enginn við 25% vexti og verðbætur að auki í þessari stöðu. Árslaun fólks duga ekki einu sinni fyrir vöxtum lánanna. Hver hirðir til sín 25% vextina? Jú, það gerir ríkið.

Þeir sem ekki skulda og tóku ekki þátt í neinu verður samt refsað líka með hærri skattlagningu, verðbólgu, lélegri opinberri þjónustu auk þess að þurfa að horfa framan í hálfa þjóðina, foreldra sína, börn eða systkini verða gjaldþrota.

Það þarf núna alvöru stjórn með alvöru hugmyndir um lausn þessara mála. Einkavinavæðing í björgunaraðgerðum verður ekki liðin. 

Elín borin út úr bankanum

ESB ætlar sér innlimun Íslands og beitir öllum ráðum

Það er sorglegt hversu margir íslendingar halda að aðild að ESB muni leysa öll okkar vandamál. Einnig er ljóst að margendurtekin lygi, áróður og hálfsannleikur er farinn að síast inn stóran hluta þjóðarinnar og virðist vera sannleikurinn fyrir þeim.

Ég er nægilega eigingjarn til að hafa hugleitt aðild að ESB en staðreyndin er sú að þegar farið er að skoða smáatriðin og rökræða þá stendur eftir einn kostur við aðild og það er gjaldmiðilsbreyting og hugsanlega eðlilegri vaxtakjör því samfara. Stóri misskilningurinn er samt sá að við þurfum ekki að fórna sjálfstæði landsins fyrir nýjan gjaldmiðil. Við getum tekið upp annan gjaldmiðil ef okkur sýnist svo þrátt fyrir þvingunarumræðu Olli Rehn og fleiri. Þeir bara ráða þessu ekki, það gerum við.

Væntingar um lægra matarverð munu aldrei geta staðist því við fáum ekki niðurgreiddan flutningskostnað yfir Atlantshafið. Það er fyrsta grundvallaratriði varðandi óhjákvæmilega hærra verði á innfluttum matvælum. Niðurfelling tolla, vörugjalda og lækkun virðisaukaskatts lækkar matarverð en það er bara okkar mál að gera það. Það þarf enga þvingun frá ESB til þess.

Sú röksemd að við höfum tekið upp 75% af lögum ESB er útbreydd lygi. Við nánari skoðun þóttust einhverjir hafa komist að því að 6.5% hafi verið tekið upp með EES samningnum. Hinu skal ekki leynt að þjóðir eru sífellt að taka upp lög og reglur hvert frá öðru ef talið er vit í því. Því til staðfestu má nefna að íslendingar hafa lengi tekið upp lög frá norðurlöndum og byrjuðum t.d. á því að byggja okkar stjórnarskrá á þeirri dönsku.

Ég trúi því ekki fyrr en á reynir að íslensk þjóð sé svo full vanmáttarkenndar að hún gangi í ESB. Fyrst skulum við moka út ríkisstjórninni sem komið hefur landinu á hausinn og fara vinna að einhverju viti. Þeir þingmenn sem mæla með ESB aðild eru í raun að segja okkur þetta á mannamáli: "Ég treysti mér ekki til að stjórna landinu þótt ég hafi verið kosin(n) til þess. Látum frekar Brussel stjórna okkur". Hvers konar ræfla höfum við kosið á þing? Jú, við kusum ræfla yfir okkur sem hafa komið okkur á hausinn svo kyrfilega að við sjáum ekki út úr því næstu 10 árin eða svo.

Það er ekki af hjartagæsku að ESB er svona umhugað um aðild Íslands. Þeir eru að sækjast eftir stóru landi og hafsvæði með tilheyrandi auðlindum þar á meðal eru auðug fiskimið og möguleg olíuvinnsla á Drekasvæðinu. Að kaffæra raddir 320.000 íbúa sem eru 0.02% af mannfjölda ESB ríkjanna er minnsta málið. Við munum aldrei ráða neinu um okkar eigin mál í framhaldinu. Innan fárra ára verður búið að flytja nægilega margt fólk til Íslands til að kaffæra okkur sem þjóð.

Við eigum að taka upp dollar sem gjaldmiðil. Ef Davíð er ekki búinn að eyða láninu frá Alþjóða gjaldeyrissjóðnum er þar ágætis stofn. Dollar er meira notaður á heimsvísu en Evra svo mikið er ljóst. 

Flækir umsóknarferlið

Ríkisstjórnin er raunverulega stærsta þjófagengi Íslandssögunnar

Þetta er náttúrulega létt brjáluð staðhæfing en við nánari skoðun er það ekki. Hún er sönn. Hvernig?

Þegar neyðarlögin voru sett á Alþingi var með einfaldri lagasetningu öllum eignum (en ekki skuldum) bankanna stolið. Þessar eignir voru lánveitingar þeirra til íslenskra fyrirtækja og einstaklinga. Skv. lögum bar þeim að ábyrgjast sparifé og til þess þurfti fjármagn sem var tilvalið að taka þarna með valdi.

Í fréttum stöðvar 2 var viðtal við ungan mann sem skuldaði rúmar 50 milljónir í íbúðinni sinni sem upphaflega kostaði 25 milljónir en selst líklega ekki núna fyrir 20.

Hvaðan komu þessar 50 milljónir sem maðurinn skuldar? Jú, úr bankanum. Hvar fékk bankinn þær?

Bankinn fjármagnaði þessi lán með erlendum sambankalánum. Nú þegar ríkið er búið að fleygja þeim í gjaldþrota gömlu bönkunum verða þær ekki greiddar upphaflegum lánveitendum. Þetta þýðir nýju þjófabankar ríkisins skulda ekkert af þessum 50 milljónum. Það er búið að stela stofninum af þeim peningum.

Það er eins og fólk almennt geri sér ekki gerin fyrir því hversu stórkostlegur þjófnaður var framin í nafni lands og þjóðar með neyðarlögunum. Ljóti hluturinn er hins vegar sá að ríkið ætlar ekki að deila þýfinu með almenningi í þessu landi heldur innheimta að fullu og setja fjölda fyrirtækja og einstaklinga á hausinn. Við getum ekki til lengdar horft upp á þennan ósóma. Eitthvað hlýtur að láta undan. Á endandum verða til tveir hópar í landinu, þeir sem eiga allt og þeir sem skulda allt.

Ég hef mikið íhugað hvað hægt er að gera til að gæta réttlætis með málin. Og þá verður að taka með í reikninginn að flestar vitleysur ríkisstjórnarinnar eins og setningu neyðarlaganna er ekki lengur hægt að leiðrétta. Allur skaðinn af þeim með tilheyrandi hryðjuverkalögum breta er óafturkræfur.

Skuldakröfur sem ríkið fékk fyrir ekkert er ekki á neinn hátt réttlætanlegt að það innheimti að fullu, þetta er nefnilega þýfi! Mér finnst sorglegt að það sé stolið í mínu nafni. Enn sorglegra er að vera kallaður virðingarlaus þjófur í alþjóðasamfélaginu og síðan skikkaður af höfuðpaurum glæpsins til að borga allt að fullu. Yfirþjófurinn, ríkisstjórnin, ætlar að sanka þessu að sér og svo verður haldið áfram að útdeila til einkavinanna eins og fyrrum. Það breytist ekkert. Sama klíkan ræður áfram. Almenningur situr eftir að mestu skaplaus og skilningssljór um stóru mynd þessa stærsta þjófnaðarmáls Íslandssögunnar.

Eina vitlega úrræðið sem ég sé er að stórfelld niðurfærsla skulda almennings og fyrirtækja. Mér finnst tímabært að þeir þingmenn sem hafa eitthvert inngrip í stóru myndina og hafa auk þess snefil af réttlætistilfinningu eiga að grípa hér inn í tafarlaust áður en fólki þverr algerlega móður í að taka þátt í nokkru endurreisnarstarfi.

Birtið lögfræðiálitið í heild sinni

Varðandi jafn stórt mál og raun ber vitni finnst mér eðlilegt að gera þá kröfu að lögfræðiálitið verði birt svo við getum sannreynt að Geir ljúgi ekki eina ferðina enn.

Hvað gæti verið svona mikið leyndarmál ef ekki stendur til að höfða málið? 

Vonlaus ríkisstjórn líka

Mér finnst það klúður að spyrja ekki um tengslinn á milli neyðarlaganna okkar og hryðjuverkalaga breta sem sett voru daginn eftir. Af hverju spyrja blaðamenn ekki réttu spurninganna? 

Það ber allt að sama brunni hjá þessari ríkisstjórn. Eftir allan gorgeirinn setur hún skottið niður og flýr af hólmi. Það eru endalausar uppsprettur hjá þeim að rökstyðja aumingjaganginn og ennþá er ekkert fararsnið á stjórninni.

Það jaðrar við að stjórnmálamenn þurfi helst að fremja fjöldamorð í beinni sjónvarpsútsendingu til að maður hafi minnstu von um að þeir verði settir af.

Miðað við frammistöðu undanfarinna mánaða kemur þetta held ég engum á óvart.

 

Vonlaust dómsmál gegn Bretum

Neyðarlögin á Alþingi næg vörn fyrir bretana?

Það virðist gleymast hjá fólki í hvaða röð atburðirnir í kringum bankahrunið gerðust.

Bretar settu hryðjuverkalögin sín á íslensk fyrirtæki eftir að neyðarlögin voru sett á Alþingi. Þeir voru býsna vel upplýstir, því þeir brugðust við án nokkurrar tafar. Ólíkt íslenskum stjórnvöldum sem hafa bara unnið hratt við gerð mistaka og síðan hægt eða ekkert að vitlegri málum. Það er sorgleg vitneskja að heyra að margir þingmenn hafi ekki einu sinni lesið neyðarlögin áður en þeir samþykktu þau.

Neyðarlögin eru sóðalegasta atlaga að réttarkerfi Íslands á síðari tímum. Almennum lögum um viðskipti og gjaldþrot var kippt úr sambandi til að ríkið gæti stolið eignum og viðskskiptakröfum bankanna en skúrað af sér á sama tíma skuldbindingar þeirra við erlenda banka sem lánuðu mest allt lánsfjársukkið til Íslands.

Mál á hendur bretum gæti fallið um sjálft sig vegna setningu neyðarlaganna okkar en það í sjálfu sér afsakar ekki Það að láta ekki á það reyna. Þetta eru réttlætanleg útgjöld í ljósi stöðunnar og óafsakanlegt með öllu að láta ekki til skarar skríða nú þegar.

Vítaverð hagsmunagæsla

Fjölskyldur setji eigin neyðarlög

Stundum veltir maður því fyrir sér hvernig hægt er að bera saman rekstur einstaklings, fjölskyldu, fyrirtækis, sveitarfélags og ríkis. Þarfirnar eru svipaðar í flestu tilliti, mismunurinn felst fyrst og fremst í fjölda þeirra sem koma að hverju rekstrardæmi.

Ef fólk gerði sér almennt grein fyrir því að sömu lögmál gilda í raun fyrir rekstur allra þessara eininga þá væri ekki jafn mikil vanmáttarkennd í samfélaginu gagnvart þeim sem slá um sig með viðskipta- og hagfræðihugtökum og raun ber vitni. Fólk dregur sig þess vegna í hlé frá umræðunni og telur sig ekki skilja málin.

Vandræðagangur í rekstri hefst með því að eyða meiru en aflað er. Þetta á við allar rekstrareiningarnar sem ég taldi upp áður. Eini munurinn er að tölurnar eru stærri þegar þú kemur að ríkisrekstri.  Það er stundum verið að gera einföld mál flókin í umræðunni til að fela raunveruleikann á bak við slæma stjórnun eins og þjóðin er að upplifa þessa daga.

Mér finnst að það hafi farið að mestu framhjá almenningi hversu stórkostlegt svínarí neyðarlögin á Alþingi voru og ætla til samanburðar að heimfæra þau yfir á t.d. litla fjölskyldu og þá litið málið svona út:

Fjölskyldan í litla koti á ekki lengur reiðufé til að borga skuldir. Hún hefur fjárfest í nýju húsi, bíl og  sumarhúsi með stórum lánum. Nú fást ekki frekari lán og þá eru góð ráð dýr. Á fjölskyldufundi er ákveðið með neyðarsamþykkt að borga ekki húsnæðislán og kreditkortaskuldir til að eiga fyrir mat og eins til að börnin í  fjölskyldunni fái áfram sína vikulegu vasapeninga. Þar sem neyðarsamþykktin er bindandi með lögum fjölskyldunnar er bankanum og ríkinu óheimilt að innheimta hjá fjölskyldunni húsnæðislánin og kreditkortaskuldirnar og fjölskyldan er þar með orðinn skuldlaus að mestu þ.e. ef frá er tekin skyldan gagnvart vasaspeningum barnanna.

Þessi samanburður er settur svona fram til að skilja hveru kolröng neyðarlögin voru. Þau ganga þvert á allt almennt viðurkennt siðferði í viðskiptum. Þetta er í raun ljótari verknaður en það kennitöluflakk sem oft hefur verið gagnrýnt hjá vafasamari fyrirtækjum. Neyðarlögin gengu lengra og ósóminn er toppaður með því að þeir sem eru að öllu leyti ábyrgir fyrir stöðunni með stjórnleysi, dómgreindarleysi, sinnuleysi og græðgi sitja enn við borðið og stjórna.

Afleiðingarnar af þessu er að ríkið ætlar að leysa til sín allar eignir hins skulduga almennings í gegnum bankana sem þeir stálu með húð og hári. Sömu stjórnendurnir sitja síðan áfram með nýjar lántökur frá Alþjóða gjaldeyrissjóðnum til að moka inn í sömu einkavinina og áður fyrr. Það hefur ekkert breyst nema að nú skuldar íslensku almenningur allt sem þeir leika sér með.

Í gamla daga voru sparifjáreigendur hýrudregnir, nú eru skuldararnir teknir í staðinn. Hvað haldið þið að við þolum 25% vexti lengi? Og það í vaxandi atvinnuleysi og kreppu? Það þarf ekki bjartsýnismann til að sjá að þetta gengur ekki. 

Hversu ofsafengið má taka íslenska þjóð í rassgatið áður en hún bregst eðlilega við svona niðurlægingu af hendi stjórnvalda?

Davíð Oddsson stjórnar í boði Ingibjargar Sólrúnar og Samfylkingarinnar

Ég er eiginlega farin að halda að Ingibjörg Sólrún sé masókisti. Hún njóti þess að kveljast undir Davíð Oddssyni yfirformanni Sjálfstæðisflokksins og einræðisherra og Geir H. Haarde sýndarformanni og sýndarforsætisráðherra.

Það er eiginlega óskiljanlegt hvers vegna Solla er svona eftirlát við mann sem skemmti sér svo dável við að niðurlægja hana á borgarstjórnarárum sínum. Ég óttast að eitthvað af þessum minningum og vitneskjan um "skítlegt eðli" peningamálastjórans hafi horfið í veikindum hennar.

Ef skammtímaminnið er ekki í sem besta lagi má minna hana á að íhaldið setti allt á hausinn ótímabært og Samfylkingin hefur bara að mestu verið áhorfandi í dæminu. Hún treystir sér ekki til að gera það sem rétt er og það sem er enn verra, hún virðist ekki hafa marktæka ráðgjafa sem geta ráðlagt henni um framhaldið.

Nú er hún á leið í sjúkrameðferð sem hefði eiginlega átt að hefjast með því að boða til kosninga áður en hún fór. 

Hér fyrir neðan er pistill sem ég tók í leyfisleysi af vefsíðu Jónasar Kristjánssonar og vona að hann fyrirgefi mér það þar sem ég birti hann í heild sinni:

Allt í boði Ingibjargar
Margt samfylkingarfólk misskilur ástandið. Það er allt í boði Ingibjargar Sólrúnar Gísladóttur. Að svo miklu sem hrunið hér er stærra en kreppan í öðrum löndum. Geir Haarde og Davíð Oddsson eru prívat og persónulega í hennar boði. Það er í hennar boði, að engin ber ábyrgð á neinu, enginn er rekinn, engar eignir eru frystar, enginn er handtekinn. Algert aðgerðarleysi fjármálaeftirlitsins er í boði Ingibjargar Sólrúnar. Það er í hennar boði, að útrásarvíkingar stýra skilanefndum bankanna. Svo talar hún ekki um neitt annað en Evrópusambandið. Henni finnst óbærilegt að tala um neitt annað.

Mótmælt á Austurvelli

Hvernig væri ástandið ef Ingibjörg Sólrún hefði ekki miðlað málum?

Ég verð að segja alveg eins og er að líklega væru þeir allir búnir að drepa alla og sá síðasti væri um það bil að gefa upp öndina af elli.

Ingibjörg Sólrún er búinn að þvælast þarna um talsvert mikið og kyssa júða og arabahöfðingja á víxl með þeim árangri að enn finnst fólk þarna á lífi. Þeir allavega drepa ekki neinn á meðan hún kyssir þá.

Hún er líka búinn að setja mikinn pening í að reyna fá sæti í öryggisráðinu og svo er hún búin að stofna Varnarmálastofnun, kaupa loftrýmiseftirlit og reka utanríkispólitík af miklum myndarskap.

Ég segi enn og aftur, ef íslendinga nyti ekki við væri stórkostlegur ófriður fyrir botni Miðjarðarhafs, Afganistan og Írak. Að auki myndum við stöðugt horfa til himins af ótta við fljúgandi rússneska birni.

Við erum svo sannarlega að verja milljörðunum okkar vel í varnar- og utanríkispólitík. 

Nýr kafli í hörmulegri sögu

Tímabært að afmá þessa smán Bandaríkjamanna

Ég hef alltaf haft skömm á þessu viðskiptabanni Bandaríkjamanna sem og því að beita svona aðferðum í samskiptum þjóða yfirleitt.

Oftast er verið að refsa heilli þjóð vegna vondra aðgerða stjórnvalda og þarf ekki að minna íslendinga á að nú fáum við að taka út sambærilega refsingu í lífskjaraskerðingu vegna dómgreindarleysis stjórnvalda, blindu eftirlitsaðila og óhóflegri græðgi auðmanna. Þessa eitraða blanda bitnar á þeim sem ekkert hafa til saka unnið.

Barack Obama virðist óneitanlega vera að gefa nýja von um betra stjórnarfar í Bandaríkjunum ekki veitir okkur af eftir stjórn eins versta forseta sem Bandaríkin hafa valið sér í allri sinni sögu.

Castro vill ræða við Obama

Mannlegur breyskleiki ekki tekinn með í reikninginn

Það er að renna upp fyrir manni smám saman að fyrirsögnin hér að ofan er orsökin fyrir því að pólitískar stefnur hafa ekki gengið upp. Ennþá.

Það er ljóst að hinn eilífi vandræðagangur við að koma upp hinni einu sönnu stefnu við rekstur samfélags steitir á skerjum þeirra mannlegu galla sem við berum öll í mismiklum mæli.

Valdafíkn, peningagræðgi, stjórnuarárátta, fullkomnunarárátta, hefnigirni, einelti, kynþáttafordómar, skortur á umburðarlyndi, óþol fyrir greindarskorti annarra og fleiri flóknir mannlegir þættir hafa í gegnum tíðina spillt fyrir annars fullkomlega skipulögðum stjórnmálastefnum, kommúnisma, kapítalisma, félagshyggju eða hverju sem þetta kallast allt saman.

Það ætti því að vera næsta verkefni okkar að fara að viðurkenna mannlega galla, ekki bara sem hluta af tilverunni, heldur sem mikilvægum þætti í að koma upp stjórnkerfi sem tekur tillit til þeirra atriða sem hafa hingað til spillt möguleikum okkar til að þróa gott og réttlátt samfélag.

Rikisfjölmiðillinn má alveg vera óhlutdrægari en þetta

Ég tel að mjög margir hlýði á ræður forsætisráðherra á gamlaárskvöldi og forsetans á nýársdag. Það er yfirleitt ekki mikið í þessum ræðum annað en að tala hlýlega og uppörvandi til þjóðarinnar og guma af afrekum liðins árs.

Hefðbundið hefur Morgunblaðið verið litað Sjálfstæðisflokknum eiginlega allar götur frá stofnun og fólk oftast sætt sig við það. En nú er hægt að gera aðrar kröfur til þessa miðils því hann er í raun orðinn ríkisfjölmiðill vegna þess að honum er beinlínis haldið á floti af ríkisbankanum nýja Glitni.

Með þetta í huga er athyglisvert að sjá hvernig Mogginn fjallar annars vegar um ræðu forsætisráðherrans í Sjálfstæðisflokknum og forsetans úr gamla Alþýðuandalaginu.

Geir Haarde fær 1046 orða grein um ræðu sína og tilvitnun í hana á meðan forsetinn fær 101 orð. Pólitískt er hægt að rífast endalaust um það hvor ræðan er betri eða bitastæðari en Morgunblaðið fær falleinkunn fyrir það hversu mjög hann litast af því að stjórnast af ónýtum pótintátum Sjálfstæðisflokksins. Mogganum er beinlínis í mun að láta sjá að hann fyrirlítur forsetann eins og aðrir Sjálfstæðismenn.

Stór hluti ræðu Geirs í gærkvöldi fór í að stilla sér upp við hlið Guðs, látna biskupsins og silfurliðsins úr handboltanum. Sorrý Geir, þetta er bara sorglegt PR múv! (Kristján, þetta er vond fjölmiðlaráðgjöf hjá þér!).

Ég hef aldrei kosið forsetann, ég hef hins vegar oft kosið Geir þó það sé eftirsjá í því núna. 

Þjóðarátak nýrrar sóknar

Beatles - Get back

Ég stenst ekki mátið. Get back frá árinu 1969 er tekið upp beint á þaki plötufyrirtækis þeirra Bítlanna, Apple. Lögreglan stoppaði giggið snarlega enda fyrirtækið í virðulegu viðskiptahverfi.  Það þarf varla að taka fram að þetta lag fór í fyrsta sæti vinsældalista flestra landa heims þ.á.m. Bandaríkjanna og Bretlands.

Gleðilegt nýtt ár - Happy new year - ABBA

Þetta lag ABBA frá 1980 endaði ágætis áramótaskaup þessa árs með íslenskum texta.

Ég óska öllum gleðilegs árs!