Valdníðslan er hjá ríkisstjórninni ekki mótmælendum

Það er enginn efi í mínum huga að þessi ríkisstjórn fær engan vinnufrið hér eftir. Ég hitti engan lengur sem vill þessa stjórn áfram við völd. Ef hún hættir ekki með góðu, verður það gert með mótmælum þangað til þau duga. Ríkisstjórnin er löngu búin að missa allt traust og situr gegn betri vitund um umboð sitt. Það er bara valdarán.

Því fyrr sem hún boðar til nýrra kosninga verður hægt að byrja raunverulegt uppbyggingarstarf á þessu landi. Staðan er núna sú að Davíð Oddsson deilir út láninu frá IMF til einkavinanna til að moka yfir og fela götin eftir græðgisvæðingu undanfarinna ára.

Eiginlega ættum við frekar að vera hissa á því að ekki sé löngu soðið upp úr öllum pottum hér á landi.

Kryddsíld lokið vegna skemmdarverka

Sorglegt dæmi um stórmennskubrjálæðið

Það er af og frá að haldið verði áfram með þetta á kostnað almennings. Þetta hlýtur að vera fyrsta framkvæmdin sem víkur. Sem áhugamaður um tónlist fannst mér þessi hugmynd arfavitlaus og óhóflega dýr frá upphafi. Bruðl með rúma 14 milljarða sem enginn átti.

Sumum finnst að þetta megi vera opinn drullupyttur í miðborginni okkur til áminningar um hvernig stjórnmálamenn eiga ekki að haga sér með almannafé.

Það er líklega fljótlegast að setja upp ógagnsæja girðingu þarna og mála á það hús eða auglýsingar og fara síðan í hugmyndavinnu með hvaða hætti þetta dæmalausa bruðlhús verði saltað eða selt.

Húsið bíður óklárað

Á hvað getum við selt Ísland?

Það verður erfitt verk fyrir okkur sem viljum áfram sjálfstætt Ísland að verja það.

Það er deginum ljósara þegar stjórnmálaflokkur sem sérstaklega var stofnaður til þess, árið 1929 og ég studdi lengst af, telur það í lagi að gæla við sjálfstæðisafsal. Raunar tel ég það einkennandi fyrir þann lurðuhátt sem einkennir núverandi forsætisráðherra sem aðgerðar- og sinnulaus og spilltur hefur fylgst með sínum meðreiðarsveinum og einkavinum maka krókinn í ógeðslegustu spillingu síðustu ára. Nafnið Sjálfstæðisflokkurinn stefnir með þessu í að verða hlægilegt öfugmæli og lítilsvirðing við þá sem unnu að þessum markmiðum.

ESB aðild mun ekki færa þessari þjóð neina hamingju. Hún mun í mesta lagi færa okkur það að þurfa að hefja aftur sjálfstæðisbaráttu sem tók ekki nema 682 ár síðast að vinna!

ESB er ekki ríkjasamband frjálsra ríkja. Það er stöðugt í breytingum og þróun í átt að því að verða bandaríki Evrópu þar sem úrsögn yrði bara svarað með borgarastríði. Það er líka komið á daginn að ESB tekur ekki NEI sem gott og gilt svar. Svo skal haldið áfram að kjósa aftur og aftur þar til sambandið fær rétt svar. Þetta er margreynt í allri Evrópu. ESB notar óhikað alla fjármuni og meðöl sem þarf til að fá sínu fram. Þess vegna verður vörn sjálfstæðis Íslands mjög erfið.

ESB er eineltisklúbbur 27 ríkja sem ekki hafa það að markmiði að bæta heiminn, bara Evrópu. Þeir loka á frjáls viðskipti við þriðja heiminn og sjá til þess að halda þeim áfram í fátækt. Íslendingar eiga að sýna öllum heiminum vinsemd í því að bæta líf allra íbúa hans með því að taka þátt í störfum SÞ og nota þann vettvang til framfara á jörðinni. ESB getur aldrei orðið annað en leiðinlegt lokað og óþarfa millistig í þeirri viðleitni. Hér á að vera meiri framsýni.

Þegar öllu verðu á botninn hvolft verður kosið um áframhaldandi sjálfstæði annars vegar og hins vegar um það fyrir hversu hátt verð Ísland er falt kommissörum í Brussel.

Umsókn í þjóðaratkvæði?

Rétta leiðin til að þæfa og kæfa málin.

Þessi nefnd mun aldrei komast að því hversu gerræðislega Davíð Oddsson leiddi fall bankanna með dæmalausu hatri sínu og einelti gagnvart Jóni Ásgeiri. Á rúmri viku kom hann öllu á hvolf með samþykki Geirs H. Haarde sem stimplaði vitleysuna fyrir hönd ríkisstjórnarinnar, enda vanur að hlýða Davíð í einu og öllu.

Það þarf enga rannsóknarnefnd til að skilja ofangreint. Þess vegna segir maður óhikað að nefndarskipan þessi er lélegt yfirklór til að þæfa málið til ónýtis og tryggja að þeir verði aldrei dregnir til ábyrgðar. Nefndin fær heilt ár til að rannsaka það sem Davíð og Geir framkvæmdu í hugsunarleysi á 4 dögum. Eftir þann tíma verður málinu frestað um óákveðna alla nánustu framtíð.

Rannsóknarnefndin fullskipuð

Pabbi, pabbi hvar eru flugeldarnir okkar í ár?

Nú á tímum þrenginga eru sparnaðarráðin á hverju strái og Jón Magnússon þingmaður var harðlega gagnrýndur fyrir að tala niður flugeldasöluna.

Það er þó hægt að njóta flugeldanna án þess að standa í nokkrum útgjöldum á þessu sviði. Sjáið fyrir ykkur þetta heimilislega samtal:

Strákurinn: Pabbi, pabbi hvar eru flugeldarnir okkar í ár?

Pabbinn: Þeir eru úti og það er fullt af fólki að kveikja í þeim fyrir okkur.

Kemst hún inn bakdyramegin vegna spillingar?

Það er engin efi í mínum huga að Caroline Kennedy á ekkert erindi sem öldungardeildarþingmaður.

Hún á ekkert tilkall til þess í krafti hæfileika eða dugs til verka, því hún hefur aldrei unnið neitt utan heimilis. Þetta er einföld húsmóðir, reynslulaus með öllu í því sem viðkemur stjórnmálum.

Verði hún öldungardeildarþingmaður í stað Hillary Clinton verður það eingöngu byggt á ættartengslum í líkingu við gamalt kóngaveldi.

Ég trúi því reyndar ekki að óreyndu að hún fái þetta embætti, ríkisstjóri New York gæti aldrei þvegið þá vitleysu af sér.

Caroline Kennedy gagnrýnd fyrir viðtöl

Krafðist kosningar út á trausta efnahagsstjórn - en hvað nú?

Hann býr við það einstaka ólán að vera uppalin undirlægja mesta efnahagsskaðvalds og einræðisfrekjudalls sem þessi þjóð hefur alið.

Þessi brjóstumkennanlegi forsætisráðherra krafðist þess að vera kosinn út á trausta efnahagsstjórn. Þessi sami maður sér ekki núna rök þorra almennings fyrir því að hætta þegar hreinlega allt er komið á hausinn.

Mín tilfinning er sú að hann fær ekki að hætta. Honum er uppálagt að bjarga einkavinunum áður en nokkur völd eru gefin eftir. Lánið frá IMF er notað til þess í umsjá gamla einræðisherrans. 

Hvenær, ef ekki núna, eiga þessir menn að hætta?

Kviknakinn Geir og gullspilið

Grein Jóns Ásgeirs er bæði hófstillt og trúverðug

Ég hef ekki ennþá fundið hjá mér sérstaka þörf til að telja Jón Ásgeir óheiðarlegan í viðskiptum, hann segist sjálfur vera harðdrægur, en það er í sjálfu sér ekki lögbrot. Ég ætla heldur ekki að veita honum sérstakan heiðarleikastimpil sem ég veit bara ekkert um.

Ríkinu hefur heldur ekki tekist að gera hann að neinum sérstökum glæpamanni eftir 6 ára eltingarleik. Miðað við umfang rannsóknarinnar og kostnað er ríkið að stórtapa á þessu ofsóknum og hefur ekkert upp úr þessu dæmalausa einelti. Miðað við umfang viðskipta hans er uppskeran algjör tittlingaskítur. Misskiljið mig ekki, ég er samt viss um að aðrir auðmenn en hann verði uppvísir að ljótari glæpum þegar upp verður staðið.

Óvildin í garð þessa eina manns af hendi seðlabankastjórans, ríkjandi yfirformanns Sjálfstæðisflokksins, er megin orsök hins séríslenska bankahruns. Þótt efnahagslífið og bankarnir hafi verið veikir var óþarfi að hrinda öllu um koll með því dæmalausa offorsi sem Davíð Oddsson gerði á 4 dögum. Hann, upp á sitt eindæmi, er stærsta einstaka meinið í þessu öllu saman. Það þarf enga rannsóknarnefnd þingsins til að þetta sé flestum ljóst sem fylgjast með.

Það sem kemur mér mest á óvart við lestur greinar Jóns Ásgeirs, er hvað hann er hófstilltur í garð Davíðs Oddssonar, hreint með ólíkindum.

Reiði fólks er skiljanleg, en hún er að mínu mati oft í röngum farvegi. Hún á fyrst að beinast gegn ríkisstjórn, seðlabankanum og fjármálaeftirlitinu. Þegar búið er að skipta þessu liði út er fyrst hægt að skoða útrásarvíkingana með eðlilegum hætti og draga þá til ábyrgðar sem þar hafa brotið af sér.

Núverandi stjórn stendur nefnilega vörð um alla nema boðflennuna í einkavinavæðingarpartýi Davíðs.

Jón Ásgeir tekur dóma nærri sér

Stjórnin vill helst ekki finna neitt!

Það ætti flestum að vera ljóst fyrir löngu að ríkisstjórnin er ekki að gera neitt í því að koma réttlætinu yfir einn eða neinn. Þeir sem fengu bankana voru nefnilega þóknanlegir einkavinir og ef eitthvað finnst misjafnt hjá þeim, þá er eins líklegt að þeir fari að syngja um ráðamennina á móti.

Þetta er að sjálfsögðu stóra ástæðan fyrir því að stjórnin situr öll ennþá þrátt fyrir allt hrunið og bankamennirnir gera það meira og minna líka.

Það á ekki að skoða neitt of vandlega - Það gagnast nefnilega ekkert þeim sem ráða ríkjum. 

Rannsaka millifærslur

Smáskítleg launalækkun í stað brottrekstrar er ekkert réttlæti

Hvar í veröldinni fengi lið sem færi með allt á hausinn í kringum sig að sitja með þeim hætti sem ríkisstjórn Íslands gerir?

Þau sitja af því þau segjast ekkert hafa brotið af sér. Það sama geta knattspyrnustjórar sagt þegar þeir eru reknir. Það er bara ekkert hlustað á það. Þeir fá bara skófar á óæðri endann.

Sömu stjórnmálamennirnir sem hafa þakkað sjálfum sér hið falska góðæri í gegnum árin mega nú segja af sér vegna ekta kreppu sem þau geta eignað sér að næstum öllu leyti. Þau settu upp leikvöllinn að öllu leyti. Völdu frjálst fjármagnsflæði með EES samningnum, settu lög, völdu einkavinina sem keyptu ríkisfyrirtækin og bankana, settu upp sjónlausar eftirlitsstofnanir og ónýtan seðlabanka.

Toppurinn á klaufaganginum var að yfirforinginn í Seðlabankanum sparkaði svo fast í einu boðflennuna í partýinu að allt bankakerfið og traust á íslensku efnahagslífi dó nánast á einni nóttu löngu áður en til þurfti að koma.

Það hefur ekkert af þessu fólki axlað ábyrgð og sagt af sér með góðu. Ég er hræddur um að þau verði neydd til afsagnar með einhverju öðru en góðu...

Laun ráðamanna lækkuð

Santa Baby - Eartha Kitt

Lagið Santa Baby var gefið út árið 1953 en þá er Eartha Kitt söngkona sem gerir út á kynþokka í næturklúbbum New York borgar. Það er því undarleg tilviljun að hún yfirgefi jarðvistina þennan jóladag réttum 55 árum eftir að hún öðlaðist frægð fyrir þetta lag.

Söngkonan lést úr ristilkrabba en vann allt fram undir það að veikindin yfirbuguðu hana fyrir sex vikum. Hún leit á það sem sérstakt lán að fá að gera það sem henni fannst mest gaman og það var að skemmta fólki.

Eartha Kitt látin

Jólakveðja - Hugleiðing um meðalhófið

Mér varð hugsað til þess þegar ég ók með jólapakka á milli staða í hvers konar ógöngum jólahaldið er. 

Ég tilheyri óneitanlega þeirri kynslóð sem á nokkurn veginn stærsta þáttinn í þessu dæmalausa verslunaróhófi sem tíðkast rétt fyrir jól. Fólk sem á ekki peninga fyrir afborgunum af skuldum eða vðurværi hversdaqsins setur sig í enn stærri skuldir til að þjóna... hverjum? Guði? Vinum og ættingjum? - Nei rétta svarið er kaupmönnum. Allt fram að þessum jólum hefur þessi hátíð undið sig upp í eitt allsherjar neyslufyllerí, kröftugt en stutt og með langri þynnku. Ég man þá tíð að afi og amma í skyldurækni sinni voru skuldsett rúmlega hálft árið vegna kaupa á jólagjöfum. Ég býst við að núna séu  afar og ömmur jafnvel skuldsett með greiðsludreifingu allt árið til að standa sig í stykkinu.

Vinnan við að koma þessari jólahátíð á koppinn er orðin svo erfið og mikil fyrir suma að þegar aðfangadagur rennur upp þá eru margir svo farnir af kröftum og njóta ekki gleðinnar vegna þess hversu úrvinda af þreytu þeir eru.

Það er í mínum huga eitthvað svo stórkostlega rangt við að gleðja ættingja og vini bara svona einu sinni á ári, en skipta sér svo ekki af neinu þess á milli. Eru jólin og gjafastandið til að tryggja það að við séum að meðaltali góð?

Ég tel að hátíðahald mætti vera minna, oftar og jafnara.

Ég sendi lesendum bloggsins míns, bloggvinum og að sjálfsögðu ættingjum og vinum, bestu kveðjur um gleðileg jól og farsælt nýtt ár. Njótum stundarinnar, því ekki veitir af. 

Margir vilja liðsinna

Flokkarnir fá 20% hækkun á milli ára

Það þarf engan að undra að upp úr sjóði. Stjórnmálamenn þessa lands eru algerlega sjálfmiðaðir þegar kemur að þeim sjálfum. Þessi frétt úr DV upplýsir okkur um að þeir kannast ekki einu sinni við það þegar þeir halda áfram að hygla sjálfum sér á sama tíma og þeir skerða kjör annarra í þessu landi.

Ég hef áður gagnrýnt að fjárframlög úr ríkissjóði til stjórnmálaflokka sé brot á jafnræðisreglu. Þau beinlínis hindra nýliðun í stjórnmálum og það sýnir sig núna þegar raunveruleg þörf er á henni í ljósi þess að þeir sem nú sitja á þingi eru ekki bara ófærir um að stjórna heldur eru þeir umboðslausir vegna þess að þau neita að axla ábyrgð þegar allt fer á hausinn á þeirra vakt. 

Ég spái því að jól og áramót muni líða í friði og ró. Það þarf því engann að undrast framhaldið eftir áramótin: Þá verður fjandinn laus fyrir alvöru!

Óttast að uppúr sjóði

What a wonderful world - Louis Armstrong

Það verður ekki sagt að Louis Armstrong hafi sungið eins og engill. Fyrirfram myndirðu ekki láta þennan mann gera neitt annað en það sem hann var frægur fyrir og það var jazztrompetleikur í hæsta klassa. Þetta lag eftir Bob Thiele kom út árið 1968 og fór í fyrsta sæti breska listans, hvort sem um var að kenna eða þakka hinni ótrúlega grófu, en á sinn hátt sjarmerandi, rödd gamla trompetleikarans sem kallaður var Satcmo eða Pops. Hann var elsti listamaðurinn sem fór á topp breska listans þá 66 ára.

Eftir vinnusama helgi fyrir suma og annasama fyrir aðra er þetta lag ágæt afslöppun síðkvölds á sunnudegi.  

Niðurfelling væri sjúkt svindl á þjóðinni

Það er eins og allir séu búnir að gleyma því að kaup þessa fólks á hlutabréfum stjórnaðist af græðgi og engu öðru. Hafi þetta fólk ætlað að ávaxta fé sitt gat það bara sett í sparnað eins og aðrir sem ekki áttu þess kost að fá allt lánað eins og bankastarfsmennirnir. Engin veð voru tekin önnur en í bréfunum sjálfum. Ofan á allt saman má færa mjög sterk rök fyrir núna að hlutabréf bankanna fóru í ruglhæðir vegna kaupa starfsmanna og eigenda bankanna sjálfra.

98% þjóðarinnar þarf að borga það sem innan við 2% af henni sukkaði í fjármálum. Það er því með öllu ótækt að þetta lið haldi áfram að stjórna svokölluðum björgunaraðgerðum og nota lán frá IMF til að bjarga fyrst sínum málum.

Þessi ósvífni við frágang málanna er að kalla fram byltingu og ég er þeirrar skoðunar að það muni dragi til verulegra tíðinda um leið og jólasukkinu lýkur. Jólin eru bara lognið á undan storminum, það get ég svarið! 

Lykilstjórnendur bankans lifa í óvissu