Mannlegur breyskleiki ekki tekinn með í reikninginn

Það er að renna upp fyrir manni smám saman að fyrirsögnin hér að ofan er orsökin fyrir því að pólitískar stefnur hafa ekki gengið upp. Ennþá.

Það er ljóst að hinn eilífi vandræðagangur við að koma upp hinni einu sönnu stefnu við rekstur samfélags steitir á skerjum þeirra mannlegu galla sem við berum öll í mismiklum mæli.

Valdafíkn, peningagræðgi, stjórnuarárátta, fullkomnunarárátta, hefnigirni, einelti, kynþáttafordómar, skortur á umburðarlyndi, óþol fyrir greindarskorti annarra og fleiri flóknir mannlegir þættir hafa í gegnum tíðina spillt fyrir annars fullkomlega skipulögðum stjórnmálastefnum, kommúnisma, kapítalisma, félagshyggju eða hverju sem þetta kallast allt saman.

Það ætti því að vera næsta verkefni okkar að fara að viðurkenna mannlega galla, ekki bara sem hluta af tilverunni, heldur sem mikilvægum þætti í að koma upp stjórnkerfi sem tekur tillit til þeirra atriða sem hafa hingað til spillt möguleikum okkar til að þróa gott og réttlátt samfélag.

Athugasemdir

[Gant (IP-tala skráð) 2.1.2009 kl. 12:48]

Verst að maður hefur enga mannlega galla.

[Haukur Nikulásson, 2.1.2009 kl. 13:00]

Ef ég man rétt þá varstu ættaður úr dal Hobitta-álfanna Gant og þar af leiðandi ekkert mannlegur. Líklega er ég búinn að horfa of mikið á Lord of the rings.