Gegndarlaus hagsmunagæsla hindrar samfélagsumbætur

Það er mörgum ljóst sem lesa þessa pistla mína að í mér blundar pólitíkus sem fær takmarkaða útrás og áheyrn. Ég eigna mér þó það að hafa nú í tvö ár skrifað hátt í 1000 pistla sem að mestu eru um stjórn- og samfélagsmál.

Það fer ekki hjá því að því meira sem maður fylgist með í þessari deild verður manni ljóst hversu erfitt mál er að standa í þessu. Fyrir utan hreinræktaða græðgi og spillingu er hagsmunagæsla svo stórt vandamál að hún beinlínis hindrar að samfélagið geti tekið framförum.

Á ríkið hafa verið settar nefnilega hinar ólíklegustu kröfur um fjárframlög og stuðning sem virðist ótækt með öllu að afnema. Og það þrátt fyrir að við séum gjaldþrota og þurfum virkilega á því að halda að réttlæta öll ríkisútgjöld upp á nýtt. Við erum tilneydd til að núllstilla útgjöld ríkisins, það er ekkert vit í öðru.

Mín skoðun er sú að fyrsta réttlæting fyrir ríkisútgjöldum sé spurningin um það hvort fjárútlátin hlúi að samfélaginu eða sé bara til að skemmta einstökum áhugahópum. Það er óvinnandi að standa í að deila út fé ef áhuga- og dekurmál eru á framfæri ríkisins. Hvar setur maður fótinn þá niður og segir nei?

Með þessari grunnhugsun tel ég ljóst að eftirfarandi myndi hverfa af framfæri ríkisins: Rekstur varnarmála, rekstur sendiráða að mestu, styrkir til landbúnaðar, menning og listir fullorðinna, íþróttir fullorðinna, trúmál og rekstur þjóðkirkjunnar í held sinni, Ríkisútvarp og sjónvarp og annað í þessum dúr. 

Það sem ríkið ætti að styðja eru heilbrigðis-, trygginga-, félags og menntamál. Auk þess löggæsla og dómskerfi, samgönguæðar og hóflega uppsettar ríkisstofnanir sem hafa raunverulegt samfélagslegt hlutverk.

Einhverjum kann að þykja þetta harkalegt og ég geri mér grein fyrir því að sem stjórnmálamaður fengi ég líklega ekki mörg atkvæði út á ofangreindar tillögur. Þetta er samt það sem skynsemin segir mér að eigi að breyta og gildir mig einu hvort það er til vinsælda fallið eða ekki.

Ofangreindar tillögur eru ávísun á verulega útgjaldalækkun ríkisins. Hugsun mín er sú að með þessu geti skattar lækkað og fólk hafi meira ráðstöfunarfé til að kaupa sjálft og mynda frjálsa hópa um þá liði í menningu, íþróttum, listum, trúmálum og öðrum hugðarefnum sem það sjálft kýs að fjármagna. Ég sé t.d. ekki ástæðu þess að ég, áhugamaður um popp- og rokktónlist, sé að niðurgreiða sinfóníuhljómsveit Íslands.

Stjórnmálamenn dagsins eru í fangar vinsældaöflunar. Þeir geta oft ekki beitt sér fyrir þjóðþrifamálum vegna þess að í hvert skipti sem þeir vilja fá einhverja vitleysu burt úr rikisrekstri burt þá styggja þeir hagsmunahópa og missa við það atkvæði og stuðning.

Lýðræði? - Lýðræði er bull. Lýðræðið er bara einn dagur á fjögurra ára fresti. Þess á milli ríkir einræði flokksforingja.

Spá 9,6% samdrætti

Eru auðmennirnir sekir um brot á lögum um verðbréfaviðskipti?

Mér sýnist að þetta tilvik sé orðið tilefni til rannsóknar með hliðsjón af lögum um verðbréfaviðskipti nánar tiltekið með tilliti til að minnsta kosti 5. 8. 11. og 14. greina þeirra laga.

Skv. því ætti að hefja rannsókn á þessu sem hreinu sakamáli. Mér sýnist líka að um hliðstæður sé að ræða þegar um er að ræða innherja og stærstu eigendur allra stóru bankanna.

Núna er tímabært að kíkja á gjörðir þessara auðmanna og þótt fyrr hefði verið. Vandamálið er að ríkisstjórnin er svo flækt í þennan leik að það verður ekkert að verki. Ríkisstjórnin hefur bara áhuga á að sakfella Jón Ásgeir, allir hinir eru meira og minna stikkfrí. Trúverðugt?

Milljarðalán án áhættu

Það gilda engin lög - Lögin eru nefnilega afnumin með lögum

Neyðarlögin sem ríkisstjórnin setti var bara til að halda völdum. Þau hafa ekki sýnt sig í að hafa haft annan tilgang. Það þurfti ekki að breyta lögum til að halda úti bankastarfsemi. Færir skiptastjórar hefðu séð um það með glans ekkert síður en "skilanefndir". Munurinn er allavega sá að skiptastjórar vita hvað þeir eru að gera en skilanefndirnar ekki. Nei, megintilgangurinn var að stela.

Það má líka spyrja til hvers skilanefndirnar eru? Jú, þær eru til að tryggja að ekki verði sótt að gamla bankanum með kröfur á meðan ríkið rakar út eignunum yfir í nýju ríkisbankana. Tveggja ára umþóttunartími þótti hæfilegur til að ljúka því verki.

Maður fyllist orðið magnleysi þegar hugsað er til þess að ríkisstjórnin og auðmennirnir virðast endalaust halda um völd og peninga þó allt sé í kaldakoli. Hvað erum við eiginlega að hugsa?  Hversu skaplaus er þessi þjóð? - Ætlar fólk endalaust að kóa með handónýtu liði?

Hvað skyldi vera langt í hreina og klára uppreisn gegn valdasýkinni?

Hundruð milljarða millifærðir á reikninga erlendra félaga

The Who - 5:15 - John Entwistle sýnir hvað bassaleikur er í alvöru

John Entwistle er líklega sá bassaleikari sem ég hef haft mestar mætur á. Allt frá því hann leikur bassasóló í laginu My Generation (1965) sem þótti afar óvenjulegt á þeim tíma þegar gítarsólóin voru að verða alls ráðandi.

Hér eru þeir félagar í The Who að leika lag sem nefnist 5:15 og hér tekur bassaleikarinn hljóðfærið sitt svo sannarlega til kostanna. Staðurinn er Royal Albert Hall og árið er 2000. 

Fyrirboði að því sem koma skal?

Eitthvað finnst manni þetta klúður í meira lagi broslegt og ekki gæfuleg byrjun á formannsferli Sigmundar. Ég tel að flokkurinn hafi gert mistök með vali hans. Hann er að njóta þess að hafa verið áberandi í fjölmiðlum á liðnum árum og það virkar vel á marga.

Hann er hins vegar langt frá því að vera lipur í máli og er auk þess utan þings og lendir því í sömu leiðindastöðunni og Jón Sigurðsson. Höskuldur hafði að þessu leyti kjörstöðu til að koma skilaboðum á framfæri sem Sigmundur hefur ekki.

Atkvæði Páls hafa farið í heilu lagi á Sigmund og því augljósir flokkadrættir þarna í gangi. Höskuldur hefði að mínu mati verið gæfulegri kostur og höfðað til fleiri en Sigmundur af þeim sem ekki eru Framsóknarmenn. Sem væntanlegt EKKI-atkvæði flokksins er ég því sáttur við niðurstöðuna.

Sigmundur kjörinn formaður

Er ekki nóg málfrelsi fyrir Eirík Stefánsson að góla endalaust á útvarpi Sögu?

Það er nú hægt að misbjóða manni herfilega. Eiríkur Stefánsson er á góðri leið með að verða að svipuðu þorpsfífli og þeir félagar hans Ástþór, Sverrir Stormsker og Jónína Ben. Þau eiga það öll sameiginlegt að geta stundum talað um mál er varða réttlæti og samfélagsumbætur. Samt eyðileggja þau þetta allt með tómum fíflagangi.

Er nokkur furða að Mogginn hampi þeim sérstaklega sem forsíðubloggurum? Þetta er einmitt það sem hentar íhaldinu og það er að mestu goparnir meðal stjórnarandstæðinga og mótmælenda eru hafðir sem mest áberandi til að fólk trúi því að þau séu að endurspegla hina almennu mótmælendur.  þau eru eiginlega bara vatn á myllu stjórnvalda fyrir trúðslegan yfirgang í fjölmiðlum.

Mogginn gerir sitt til að stjórna umræðunni með þessum hætti og mótar skoðanir þeirra einfaldari sem ekki sjá í gegnum það þegar hampað er vondum málflutningi mótmælenda beinlínis til að vinna stjórnvöldum stuðning.

Fjöldi manns á Austurvelli

Viðurkennir ábyrgð en axlar hana ekki - Vantar límuppleysi á stólinn?

Málflutningur þeirra sem eiga að bera ábyrgð er með ólíkindum. Geir Haarde lét það eftir Davíð Oddssyni að velta bankakerfinu ótímabært á 4 dögum og viðurkennir hér að hafa ekki stjórnað. Var hann ekki kosinn til að stjórna? Var hann bara kosinn til að vera stimpilberi fyrir Davíð Oddsson?

Geir Haarde: Þetta er löngu orðið gott hjá ykkur. Þið hafið ekkert gert af viti í neinum af þessum málum og fáið hér með mitt leyfi til að hætta. Það er meiri hagur fyrir þjóðina að þið misnotið eftirlaunaósómann sem þið skömmtuðuð ykkur heldur en að sitja áfram sem ráðherrar. Ef þetta er erfitt skal ég kaupa fyrir ykkur límuppleysi á ráðherrastólinn. 

Geir: Árið verður mjög erfitt

Kona sem týnir 185 milljóna króna eignarhlut er ekki treystandi

Ég veit ekki hvort maður eigi að hafa fleiri orð um þetta. Sagan á bak við kaup Birnu á eignarhlut í "gamla" Glitni hefur aldrei orðið trúverðug. Hvorki frá henni né Fjármálaeftirlitinu.

Sú stjórn bankans sem myndi endurráða hana væri stórlega skrýtin. 

Bankastjórastaða auglýst í febrúar

Hvar eru konurnar 5?

Eru ekki konur í Framsóknarflokknum? Eru þær ekki kjörgengar? 

Ég hef löngum haft efasemdir um að rétt sé að þröngva fram kynjajafnrétti í sambandi við stöðuveitingar og vegtyllur í stjórnkerfinu og raunar hvar sem er. Það er bara ekki raunhæft og ég tel það vera vegna líffræðilegs munar á körlum og konum.

Munur á hormónum spilar þarna stærstu rulluna. Testosteron magn karlmanna gerir þá frekari til forystuhlutverka og því verður ekki breytt nema að tilkomi erfðafræðileg breyting á ríkjandi ástandi. Samskonar líffræðilegur munur er líka sá sami og gerir karlmenn sterkari t.d. í íþróttum þar sem konur eiga ekki möguleika vegna styrkmunar. Samt er athyglisvert hversu konum gengur illa að jafna met sín gagnvart körlum þar sem líkamsstyrkur hefur ekkert að segja eins og til dæmis í skák.

Þessi ofangreindi munur gerir það einfaldlega að verkum að karlar sækjast frekar í sumar stöður í samfélaginu en konur eins og við sjáum hér á framboði Framsóknarmanna til formanns.

Draumur hinna metnaðarfyllri kvenna um hið fullkomna kynjajafnrétti er óraunveruleg draumsýn sem ekki verður uppfyllt í okkar samtíma. Það gæti gerst í fjarlægari framtíð þegar karlar munu þá jafnframt ganga með og ala börn.

Þegar kemur að því að bjóða fram til þings og þjóðar vil ég kjósa góðar, hæfileikaríkar og vel meinandi manneskjur til slíkra starfa og gildir mig einu hvort það er karl eða kona í því sambandi.

Kappræður formannsframbjóðenda

Framsókn gulltryggir að ég kjósi þá ekki

Ég er alltaf að verða meira undrandi á því að heyra að fólk ítrekað vilji fara í aðildarviðræður til að vita "hvað við fáum" eins og hóra á horni.

Ég er búinn að fara marga hringi í rökræðunum. Ég tel að næstu kosningar verði með þetta sem aðal mál. Fyrir okkur sem viljum halda vörð um sjálfstæði okkar utan ESB, en erum á móti spillingaróféti íhaldsins undanfarin ár, er manni vandi á höndum.

Það er því miður engin hófsamur flokkur til fyrir fyrrverandi lífstíðaríhald eins og mig, sem hef þó alltaf verið jafnaðarmaður í hjarta mínu.

Framsókn vill sækja um ESB

Þeim var bara nær að taka þessi lán!

Smám saman er manni að verða ljóst að það er að koma upp skipting á þessari þjóð. Annars vegar eru það þeir sem skulda allt og þá meina ég að skuldirnar eru allt að tvöfalt hærri en eignirnar og hins vegar þeir sem höfðu lokið fasteignakaupum sínum að mestu áður en bólan byrjaði 2003. Þeir eiga allt.

Ég hef heyrt ofan í talsvert af skuldlausu fólki sem segir að lántakendur eigi bara sjálfir sökina á eigin vandræðum í kjölfar hrunsins. Það hafi bara enginn neytt þau til að taka þessi lán. Það er í sjálfu sér rétt en samt stórkostleg einföldun á þeim margföldu svikum og blekkingum sem lántakendur sitja uppi með.

Það voru nefnilega bankarnir sem hvöttu lántakendur til að taka erlend myntkörfulán frekar en verðtryggð íslensk lán. Stjórnendur þessara sömu banka vissu fyrir löngu að þetta stefndi í algjört óefni. Meira að segja hálfvitar eins og ég voru að skrifa um þetta mögulega hrun áður en ómögulegt hefði verið að snúa dæminu við með skipulögðum hætti.

Fólk bað ekki um 18% stýrivexti sem eiga sér enga réttlætingu í íslensku efnahagslífi. Fólk bað ekki um að bankakerfið væri sett á hausinn á einni viku af úr sér gengnum, gömlum og sjúkum stjórnmálamanni í Seðlabankanum sem stjórnar meira að segja ríkisstjórninni með gamla boðhættinum sínum. Fólk bað heldur ekki um að gengi krónunnar félli niður úr öllu valdi vegna ónýtrar peningamálastjórnunar.

Í gamla daga voru sparifjáreigendur teknir í rassgatið, nú er snilldin hins vegar sú að taka skuldarana ennþá harkalegra með öfugum formerkjum. Það er ljóst að íslenska fjármálakerfið var ein risavaxin svikamylla með þátttöku stjórnmálamannanna sem settu upp kerfið og afhentu síðan einkavinunum bankana og ríkisfyrirtækin til að leika sér með í nýfrjálshyggjuleiknum. Sá leikur hefur nú endað með skelfingu. Enginn sætir ábyrgð á þessu svakalega tjóni og svikamyllan heldur áfram en nú undir nafninu björgunaraðgerðir stjórnvalda!

Kreppan getur dýpkað

Bush að styðja Blair sem forseta Evrópu

Það fer ekki á milli mála að Bush er að launa Blair fyrir undirlægjuhátt hins síðarnefnda við hið óvinsæla innrásarstríð í Írak sem efnt var til á lognum sökum á hendur Saddam Hussein og írösku þjóðinni.

Sagan mun geyma að Írakar áttu engin gereyðingarvopn og þeir voru heldur ekkert tengdir Al-Qaeda. Það eina sem stendur upp úr er að Saddam Hussein var vondur einræðisherra sem lét drepa eitthvað af eigin landsmönnum. Hann er þó, þrátt fyrir allt, ekki sekur um jafn mörg dauðsföll og George W. Bush sem nú er að yfirgefa Hvíta Húsið. Saddam Hussein var sakfelldur og hengdur á niðurlægjandi hátt en Bush er hinsvegar enn í umferð.

Tony Blair hefur verið nefndur sem líklegur fyrsti forseti Evrópu og það ætti að gleðja þá íslendinga sem hafa árum saman tuðað um inngöngu í ESB en hatast út í Íraksstríðið. Gangi ykkur vel að samræma landráðahugmyndina við forsæti Tony Blair í ofanálag.

Bush sæmir Blair orðu

Frábær þjónusta á St. Jósefsspítala

Ég kom við á spítalanum og fékk að heyra að þarna væri frábær þjónusta. Ég gat ekki betur séð en að aðstaða þarna væri hin prýðilegasta. Húsnæði er að vísu gamalt en þarna er öllu vel við haldið er lýtur að sjúklingum og starfsfólki.

Þessi spítali hefur notið mjög góðs orðspors í gegnum tíðina og það er hreint skemmdarverk að ætla að flytja starfsemina til Keflavíkur. Ég sé ekki fyrir mér sparnaðinn við þann gjörning. Það er ekki skemmtileg tilhugsun að starfsmenn, sjúklingar og aðstandendur þurfa að keyra alla þessa leið jafnvel daglega í misjöfnum veðrum yfir veturinn.

Það er sagt að flutningur á skurðstofubúnaði spítalans í Keflavík til höfuðborgarsvæðisins myndi kosta 5 milljónir króna sem eru algerir smámunir í samanburði við allan þann kostnað að flytja starfsemi St. Jósefsspítala í heild sinni suður með sjó.

Ekkert af þessu er þó raunverulega ástæðan. Hún er blákalt sú að Guðlaugur Þór er að koma þessari starfsemi í einkavæðingu með Róberti Wessmann sem ætlar að flytja borgandi útlendinga hingað til lands og þá er styst að fara með þá beint á Keflavíkurspítala.

Ég hef ekkert á móti því að hafa tekjur af útlendingum á Keflavíkurspítala. Einkavæðing vel rekinna eininga annars staðar á þó alls ekki að fórna í þeirri viðleitni. Guðlaugur er bara þarna með enn eitt dæmið um að spillingaröflin í íhaldinu er alls ekki hætt einkavinavæðingunni þótt allt draslið sé komið á hausinn.

Ríkisstjórnin í heild sinni er eins og pókerspilari sem er búinn að tapa öllu en situr ennþá við borðið og bíður eftir nýjum spilapeningum. Burt með ykkur! Þið eruð löngu búinn með ykkar tíma við borðið. 

Tímaspursmál hvenær starfsemi á St. Jósefs yrði hætt

Maður hefur illan bifur á þessari lestarferð

Það eru margir sem hafa áhyggjur af því að reynt verði að myrða Barack Obama verðandi forseta áður en hann verður settur í embætti forseta fyrstur þeldökkra manna.

þessi lestarferð með verðandi forseta er bull. Það er engin ástæða til að nota hann sem agn fyrir brjálaða rednekka eða Ku Klux Klan fylgjendur sem eru nægilega öfgafullir til að reyna hvað sem er til að koma í veg fyrir að "niggari" verði forseti.

Hræddur er ég um að það sé ekki á mínu færi að koma þessum varnaðarorðum til leyniþjónustunnar ef hún þá vill nokkuð í alvöru fá ráðleggingar.

Vegna rótgróins kynþáttahaturs og tilheyrandi brjálsemi meðal sumra Bandaríkjamanna er þörf meiri öryggisgæslu nú en nokkru sinni fyrr, því miður. 

Hættur steðja víða að Obama

Það væri sérstakur þjóðarhagur ef hún nýtti sér eftirlaunafrumvarpið

Hafi einhvern tíma verið eitthvað vit í Sollu sem stjórnmálamanni þá er það alveg horfið.

Hún sveik eina kosningaloforðið gagnvart mér sem ég vildi að hún héldi og það var að fella íhaldið úr stjórn. Hún bætti um betur. Upphafði þá til áframhaldandi óhæfuverka og studdi þá með ráðum og dáð til algers gjaldþrots þjóðarinnar.

400 milljónir setti hún í öryggisráðsvitleysuna, tugir milljóna notar hún í "friðarferðir" og kvennaráðstefnur, milljarðar fara í Varnarmálastofnun og sendiráðadellu um allar jarðir. 

Hún er svo ótrúlega duglaus, huglaus og undirgefin íhaldinu að það væri sérstakur þjóðarhagur ef hún sliti stjórnarsamstarfinu og ræki með því Davíð og Geir. Þá fyrst vekti hún einhverja ánægju meðal þess fólks sem kaus hana. 

Væntu of mikils af dómsmáli