Hvað þurfa þessir kappar að gera áður en þeir eru handteknir?

Aumingjagangur yfirvalda í kjölfar hrunsins er skiljanlegur. Stjórnvöld framleiddu "auðmenn" úr hópi einkavina sinna og hafa því aldrei getað beitt sér að nokkru einasta viti að því að upplýsa þá efnahagsfölsun sem átt hefur sér stað síðustu ár.

Vandamálið er nefnilega að þeir sem eru sekastir allra sleppa. Það eru Davíð og Halldór, mennirnir sem skópu jarðveginn og völdu persónulega þá einkavini sem fengu bankana og ríkisfyrirtækin. Þeir sleppa endalaust í skjóli þeirra "vina" sinna á Alþingi sem ennþá stjórna. Það er algjört ráðleysi í stjórnkerfinu í bland við ákvarðanafælni og blindu á raunverulega stöðu mála. Núverandi staða mála ríkisins er nefnilega gjaldþrot eftir atlögu þessara manna.

Ég er farinn að halda að liðið á þinginu hreinlega trúi því ekki ennþá hversu spilltir þessir kappar voru. Það sé eiginlega nákvæmlega sama hvað gögn og sannleikur komi upp á borðið, ekki skal hróflað við neinum.

Ég tel að alltof margir séu sekir um stórfellda efnahagsglæpi og þar með landráð gegn almenningi og ríkinu.

 

FME rannsakar allsherjar markaðsmisnotkun banka

Er svona þvættingur boðlegur?

Útgjöld til sendiráða er sama tímaskekkjan og útgjöld til þjóðkirkjunnar. Það er ótrúlegt að ekki skuli vera hróflað við þessu bulli í rekstri íslensks samfélags.

Hversu kyrfilega þarf þessi þjóð að fara á rassgatið áður en gripið er til einhverra vitlegra aðgerða í útgjöldum samfélagsins.

Þeir sem trúa á Guð, Jesús og Biblíuna geta gert það í fullkomnum friði án þess að það þurfi að naga það úr minnkandi sjóðum samfélagsins. Prestar, sem eru á tvisvar sinnum hærri launum en t.d. lögreglumenn, gera ekkert nema að fá borgað fyrir það aukalega. Þú færð ekki giftingu, fermingu, jarðarför eða skírn inn í laununum þeirra. Slík viðvik eru rukkuð sérstaklega.

Sendiráð hafa ekki lengur sama gildi og áður vegna betri samskiptatækni. Íslendingum væri í lófa lagið að selja öll sendiráð erlendis og kalla allt starfslið heim. Það væri meira en nægilegt að leigja pláss hjá sendiráðum hinna norðurlandanna fyrir einn starfsmann í mesta lagi.

Urður Gunnarsdóttir má alveg vita það að réttlætingin sem hún býður upp á skv. þessari frétt er argasta bull!

Sendiráð upp á 1,5 milljarða

Still going strong!

Við félagarnir nutum þess heiðurs að spila á eftir þessum höfðingja í afmælisveislu fyrir nokkrum vikum. Nafntogaðra upphitunarnúmer fæst ekki á Íslandi.

Hálft í hvoru átti ég von á að aldurinn væri farinn að segja til sín hjá honum í söngnum. En það var sko öðru nær. Einn á píanóinu stóð hann sig afburða vel, hélt tóninum óaðfinnanlega og fór með sitt prógram þannig að allir hrifust með. Þetta var svo sannarlega maðurinn sem kunni til verka, fékk fólkið með sér og átti salinn. Það fylgdi því viss beygur að þurfa síðan að spila á eftir honum.

Indjánahöfðinginn "Hangandi hönd" hefur fylgt manni frá því maður byrjaði fyrst að hlusta á tónlist í sunnudagsþáttum Svavars Gests upp úr 1960 og var þar samtíða Ómari Ragnarssyni sem var þar líka með sínar óborganlegu gamanvísur. Þeir voru stjörnurnar þá... og eru enn!

Bestu óskir með daginn!

 

Raggi Bjarna með veislu

... og eitt kjördæmi... og eitt stjórnsýslustig... og svo framvegis!

Þessi tillaga er í ætt við það sem maður vonar að verði raunin. Það er að tekið verði ærlega til hendinni við að koma Íslandi á viðunandi plan í sambandi við opinbera stjórnsýslu og kostnað við hana.

Útgjöld til opinberra mála var fyrir löngu komin út í tóma vitleysu og það þarf að taka dægur- og dekurmálin og fleygja þeim út.

Þjóðin þarf að koma sér í auknum mæli í alvöru verðmætasköpun og hún felst ekki í því að halda úti allt of bólginni stjórnsýslu.

Ísland eitt skattumdæmi

Er gjöfin bein afurð af höfundarmáli Joe Satriani á hendur þeim?

Mér finnst líða grunsamlega stuttur tími frá því að sættir náðust í höfundarréttarmáli því sem Joe Satriani hetjugítaristi höfðaði gegn Coldplay vegna meints lagsstuldar, að þessari höfðinglegu "gjöf" þeirra síðarnefndu til góðgerðarsamtaka.

Að mér læðist sá grunur að þetta hafi verið "sáttin" sem Joe Satriani bauð upp á.

Samsæri... slammsæri...

Coldplay gefur milljón pund

Enn einn sendiboðinn tekinn úr snörunni - Gott!

Svei mér þá ef Skúli Eggert hafi ekki bara vaxið í áliti hjá mér sem var svo sem ágætt fyrir. Það eru ekki margir opinberir embættismenn sem kunna að biðja fólk afsökunar. Öll eigum við rétt á gera mistök og þess vegna er mjög gott að geta beðist afsökunar.

Ég gleðst líka fyrir hönd Jóns Jósefs að þurfa ekki að hanga í snörunni með þetta mál. Hann er að vinna þarft verk því vöndlarnir sem auðmennirnir eru búnir að vinda upp eru mjög flóknir að rekja til baka.

Vonandi fara menn að taka upp handjárnin fyrir þá sem raunverulega eiga þau skilið og ekki mikið seinna en strax. Ég hef þó enga trú á því að það verði gert í tíð þessarar ríkisstjórnar. Vinsamlegast afsannið mig í því efni sem fyrst! 

Ríkisskattstjóri biðst afsökunar

Hafiði heyrt þetta áður? - TOLD YOU SO!

Ég nenni ekki langri færslu á Borgarahreyfingu svo langt er um liðið síðan ég afskrifaði að það kæmi nokkuð af viti út úr þessari hreyfingu.

Það hlýtur að fara stórkostlegur bjánahrollur um þá sem eftir sitja af hreyfingunni. Þá sem lögðu á sig mikla vinnu og horfa upp síðan upp á alla þingmennina segja sig úr liðinu en ætla samt að sitja á þingi sem fastast algerlega umboðslausir með öllu og hirða góð laun og bitlinga.

Daginn fyrir síðustu kosningar (24.4. 2008 2009) skrifaði ég þetta:

"Ég mun því líklega drattast á morgun til að kjósa Borgarahreyfinguna þó ég hafi í raun megnustu óbeit af því að kjósa fólk á þing sem lítur á sig sem einnota stjórnmálamenn."

Með öðrum orðum: Told you so!

Klofningur í Borgarahreyfingu

Er Magma leppað skúffufyrirtæki þeirra auðmanna sem ennþá ganga lausir?

Það virðist vera alveg sama hvar borið er niður í samfélaginu og stjórn þess. Auðmennirnir ganga allir lausir og nú gruna marga að skúffufyrirtækið Magma sé leppuð eign íslensku fjársóðanna sem settu þetta samfélag allt  á hausinn.

Þetta er trúlega bara byrjunin á því að íslendingar eru að missa tökin á eigin auðlindum.

Þetta er enn einn sorgardagurinn á þessum síðustu og verstu tímum. Og ég býst við fleiri slíkum, þannig blasir uppgjöfin við manni þessa daga.

Sala í HS Orku samþykkt

Fyrir hverja er Guðlaugur að beita sér núna?

Guðlaugur Þór Þórðarson hefur ekki staðið sig svo vel í að verja hagsmuni hins almenna íslendings að maður hlýtur að spyrja sig að því fyrir hverja hann er að vinna núna?

Ég hef ekki orðið var við að þingmaðurinn sé í krossferð fyrir hina snauðari landsmenn í vandræðum. Þeir sem áttu fé í Landsbankanum í Luxembourg voru varla að geyma þar sínar fátæklegu krónur eða hvað?

Vill fund um Landsbanka

Egill Helgason þolir engin andmæli á Eyjunni - fleygir þeim út!

Ég er kominn á þá skoðun að Egill Helgason sé bara kerling þegar kemur að rökræðum. Hann fleygði athugasemd frá mér út af Eyjunni næstum því samstundis. Hann vaktar greinilega síðuna því athugasemdin var varla inni nema í tvær mínútur!

Athugasemd mín við umfjöllum um Silfrið í dag var svona:

"Egill er greinilega mjög hrifinn af því að hlusta á sjálfan sig tala útlensku því hann er dottinn í það draga upp hvern útlendinginn á fætur öðrum í drottningarviðtöl í Silfrinu sem eiga að hafa vit fyrir okkur. Það hefur ekkert komið út úr þeim, hversu gáfulega sem þeir hljóma... á misbjagaðri ensku.

Ennþá eru handjárnin ónotuð þrátt fyrir að búið sé að ráða t.d. snillinginn Evu Joly.

Ég geri ráð fyrir að Egill krefjist þess að hr. Stiglitz og frú Ulanov verði líka ráðin af ríkinu til starfa eftir starfsviðtal í Silfrinu hjá honum. "

Þetta er ekki í fyrsta skipti sem hann fleygir út frá mér athugasemd. Í fyrra skiptið fleygði hann út athugasemd með þeim rökum að hún væri bara bull. Alltaf þarf þetta að tengjast því að hann er að verja Samfylkinguna og er auk þess skítviðkvæmur fyrir gagnrýni.

Ég tel að kippa eigi svona kerlingu, eins og Agli, burtu með eina umræðuþáttinn um stjórnmál á RÚV, þ.e. ríkisfjölmiðli sem ég er tilneyddur til að borga fyrir.

Ég er löngu orðinn pirraður á því að útlendingar sem nenna að skoða mál íslendinga í korter eða svo séu eftir viðtal hjá Agli orðnir að slíkum sérfræðingum að við hreinlega verðum að ráða þá í vinnu á og helst á launum sem alls ekki þekkjast lengur meðal venjulegra íslendinga.