Stjórnmálaafl fyrir ESB andstæðinga

Það er ljóst að næstu kosningar munu snúast um aðild að ESB.

Eins og staðan er núna á Íslandi virðist meirihluti íslendinga haldinn stórkostlegri vanmáttarkennd vegna bankahrunsins sem er séríslenskt efnahagsvandamál. Einræðisseggurinn Davíð Oddsson ýtti þessu úr vör á meðan Geir Haarde og Ingibjörg Sólrún héldu pönnukökupartý í New York til að freista þess að fá kosningu í öryggisráðið.

Það er ljóst fyrir löngu að Sjálfstæðisflokkurinn mun ekki standa undir nafni sínu mikið lengur. Hann er að láta undan Evrópusleikjum Samfylkingarinnar og það er því ljóst að það þarf stjórnmálaafl á Íslandi sem er tilbúið að verja fullveldi Íslands. Því miður eru Vinstri grænir ófærir um að vera þetta afl þrátt fyrir andstöðu við ESB, flokkurinn er ekki stjórntækur vegna almennrar andstöðu hans við næstum ÖLL framfaramál.

Ég hef lengi verið þeirra skoðunar að minnimáttarkennd íslendinga er útbreitt vandamál. Svo mikið er vantraust á núverandi ráðamönnum að fjöldi fólks telur sig betur kominn með stjórn í Brussel heldur en í Reykjavík, þetta er óþolandi aumingjagangur! Maður verður hreinlega reiður að upplifa þennan aumingjaskap!

Íslendingar eiga að vera í samneyti við allar þjóðir á jafnéttisgrundvelli, fella niður tollmúra og sérhagsmunagirðingar og hætta þátttöku í því einelti sem felst í að tilheyra klíkubandalögum sem hafa það að markmiði að halda öðrum þjóðum frá réttlátum möguleikum til að bæta sín kjör. ESB er eineltisbandalag með engin sjáanleg göfug markmið á heimsvísu, bara Evrópuvísu. Þetta hlýtur hugsandi og vel meinandi fólki að vera alveg ljóst.

Jafnaðarmannaflokkur sem er gegn ESB aðild er það sem vantar nú. 

Drög lögð að umsókn um ESB-aðild?

Ríkisstjórn Íslands viðurkennir óheiðarleg vinnubrögð

Þetta gat ekki farið öðruvísi. Ríkið hélt að þeir kæmust upp með kennitöluflakk og óheiðarleika gagnvart umheiminum og fékk alla upp á móti sér, nema þá íslendinga sem ekki eiga til neina sjálfsgagnrýni.

Traustið verður samt ekki endurheimt með þessari ríkisstjórn, hún verður að víkja sem fyrst. 

Icesave-deilan leyst

Jeff Wayne - Innrásin frá Mars - Flott tónleikaútgáfa

Á sínum tíma kolféll maður fyrir þessari tónlist við sögu H.G. Wells: Innrásin frá Mars (War of the worlds). Þessi tónlist var gefin út sem söngleikur árið 1978. Jeff Wayne samdi þetta snilldarverk.

Hér er lagið The eve of the war flutt af stórum hópi tónlistarmanna sem gera þetta mjög vel. Richard Burton er sögumaður og Justin Hayward (Moody Blues) syngur.

Þessar 8 mínútur eru vel þess virði að hlusta. Þessi tónsmíð eldist bara mjög vel.

RÚV bjóði upp á fréttamenn með skilning á viðfangsefninu

Mér finnst leiðinlegt að horfa upp á fréttamenn opinbera vankunnáttu sína á viðfangsefnum í viðtölum eins og því sem Sigmar átti við Björgólf.

Ég er farinn að skilja hvers vegna fólk treystir sér ekki til að mæta í viðtöl hjá fréttamönnum sem hafa haft atvinnu af því í gegnum tíðina að tala fremur en að hlusta og skilja. Reyndar tókst Björgólfi nokkurn veginn að koma frá sér staðreyndum málsins þrátt fyrir að Sigmar reyndi að gjamma hann út í horn. Vandamál Sigmars er að skilja ekki helstu hugtök og hann var niðurlægður þegar Björgólfur þurfti að skýra fyrir honum á barnamáli muninn á greiðsluþroti og gjaldþroti.

Fréttamenn RÚV (og Egill Helgason meðtalinn) eru ófærir um að vinna að vitlegum fréttum um fjármál, það hefur sannarlega sýnt sig. Þeir eru nánast nothæfir í það eitt að atast í fólki þegar almenningur vill fá útrás fyrir reiði, hvort sem hún er verðskulduð eða ekki.

Íslendingar hafa nú vikum saman fengið að hlusta á málflutning allra helstu aðila að hinu séríslenska bankahruni og fyrir mér er niðurstaðan alveg á hreinu. Þetta fólk á skilyrðislaust að víkja af vettvangi sem ýmist óhæft, sinnulaust, dómgreindarlaust og jafnvel sekt um valdníðslu: Davíð Oddsson, Geir Haarde, Björgvin G. Sigurðsson, Árni Mathiesen, Jónas Fr. Jónsson, stjórn Seðlabanka Íslands í heild sinni sem og stjórn Fjármálaeftirlitsins. Ríkisstjórnin er síðan sek um skort á eftirliti, dómgreindarbresti og sinnuleysi.

Það er óþolandi með öllu að þetta sama fólk haldi áfram að ráðskast með öll mál eftir að hafa komið öllu á rassgatið. 

Skuldir lenda ekki á þjóðinni

Ef Davíð fer - þá fer Geir líka

Það er orðið meira en lítið skrýtið hversu mjög Geir heldur verndarhendi yfir Davíð. Svo mjög finnst manni að það sé líklegt að Davíð hafi þannig tak á Geir að hann hreinlega geti ekki látið Davíð fara án þess að falla sjálfur með honum.

Það hlýtur að vera öllu hugsandi fólki spurn: Hvað hefur Davíð á Geir sem gerir hann svona ósnertanlegan?

Hver veit það? 

Stjórnendur Seðlabankans víki

Fyrir hvern eru þá 18% stýrivextir?

Það hreint hlálegt að íslenskir skuldarar búi við 18% stýrivexti frá Seðlabankanum sem telur sig vera að þjóna skilyrðum Alþjóða gjaldeyrissjóðnum sem er þó ekki að gera neitt!

Hvenær á að koma okkar séríslenska efnahagsvandamáli út úr Seðlabankanum? 

Ísland stendur frammi fyrir gjaldþroti

Glæpir borga sig ekki - Ríkisstjórnin er glæponinn!

Ég skil ekki hvers vegna ríkisstjórnin situr enn og bröltir í drullupollinum rúin öllu trausti bæði heima og erlendis.

Það gerist ekkert fyrr en þessi stjórn er farin frá.

Glæpirnir sem framdir voru í stuttu máli:

• Davíð Oddsson sparkaði í Glitni þegar bankinn bað um lán. Sekur um stórkostleg afglöp í starfi og valdníðslu.
• Geir H. Haarde studdi Davíð í að knésetja Glitni. Hann kom því hruninu formlega í gang með samþykki sínu.
• Árni Mathiesen neitaði að tryggja flutning IceSave málsins til Bretlands með 200 milljóna punda eignayfirfærslu.
• Neyðarlögin á Alþingi var stórþjófnaður með lögum ("kennitöluflakk") með aðstoð og blindu skilningsleysi stjórnarandstöðunnar.

Hvernig getur nokkur búist við því að aðrar þjóðir vilji aðstoða óheiðarlegt þjófagengi?

Enn og aftur er hægt að segja: Burt með ríkisstjórnina! 

Samningar um Icesave eina leiðin

Ekki endilega sanngjörn gjaldtaka

Það er ekkert sjálfsagt við það að vera með sérstaka gjaldtöku af nagladekkjunum sjálfum þegar við erum sum sem keyrum t.d. undir 8000 km á ári. Það væri þá nær að haga gjaldtöku hreinlega eftir eknum kílómetrum en ekki að refsa þeim sem vilja öryggi í akstri sem oft á tíðum er mjög lítill.

Vilja innheimta gjald vegna nagladekkja

Aftur, aftur og aftur: Ríkisstjórnin segi af sér enda búinn að margsanna sig ónýta

Það hlýtur að vera komið að þeim tímapunkti að þessi ríkisstjórn fái áfallahjálp. Allt sem hún hefur gert frá því Glitnir óskaði eftir lánveitingu hefur verið vitleysa á vitleysu ofan. Hér er ekkert verið að leita að sökudólgum, þeir hafa blasað við okkur allan tímann í allri sinni sjálfumgleði, síðast við að reyna framboð til öryggsráðsins á meðan Davíð kom skriðunni af stað hér heima.

Þegar á reyndi þorðu stjórnvöld ekki að grípa til heiðarlegra aðgerða og þess vegna stöndum við nú í þeim döpru sporum að enginn treystir okkur. Óheiðarlegu neyðarlögin eru nú að naga okkur illilega í bakið og þeir íslendingar sem ekkert hafa til saka unnið sitja uppi með óstarfhæft samfélag með þjófstimpil á rassgatinu. Þetta áttum við ekkert skilið.

Stjórnin sem kom okkur á botninn þykist ennþá geta staðið björgunarvaktina. Nú má hún axla sína ábyrgð og segja af sér áður en allt verður kolvitlaust á götunum og við missum allt í stjórnleysi. Þetta er því miður raunveruleg hætta. Bregðist við henni!

(Mikið djöfull er leiðinlegt að margendurtaka sig svona). 

Afgreiðslu umsóknar frestað

Ísland er fjárhagsleg RÚST - Ríkisstjórnin segi af sér strax!

Ég hef aldrei upplifað jafn ónýtt dæmi og þá ríkisstjórn sem nú situr. Það kemur nákvæmlega EKKERT út úr þeim og þykjast þau þó vinna af kappi. 43 dögum eftir að Davíð og Geir hrundu íslenska bankakerfinu eru skemmdavargarnir enn að þykjast vera við björgunarstörf. Nákvæmlega öll mál eru í uppnámi vegna þess að farið var af stað með óheiðarlegum hætti um leið og vandræðin blöstu við.

Ég velti því fyrir mér hversu oft þessi ríkisstjórn hefði átt að segja af sér fyrir sín ósannindi og afglöp undanfarið? Hversu djúpt á að sökkva þjóðarskútunni áður en óhæf ríkisstjórnin sér að sér og hættir? Hversu margir telja eiginlega að þetta fólk ráði eitthvað við ástandið? Hvenær telst eiginlega nóg komið?

Hver í þessari ríkisstjórn vill bera ábyrgð á hættunni af þjóðaruppreisn?

Vegið ómaklega að ráðherrum