Leikið á fiðlu meðan Róm brennur - Alþingismenn ERU í 6 mánaða fríi

Ég get ekki orða bundist yfir hneykslun minni á því að Alþingismenn fái svo löng frí á hverju ári að þeir ná ekki hálfs árs viðveru á Austurvelli. Bara sumarfríið þeirra eru tæpir 6 mánuðir fyrir utan jólaleyfi sem líklega er einn og hálfur mánuður til viðbótar. Nærri 7 og hálfur mánuður telst hæfilegt frí þingmanna á Íslandi.

Það er ótrúlegt að samtímis því að launin þeirra hækka fá þeir meira frí og að auki fá flokkarnir beina fjárstyrki af fjárlögum til að tryggja sér endurkjör til að halda þessum vinnubrögðum áfram. Auk þess að vinna svona lítið er líka búið að skaffa alþingismönnum aðstoðarmenn sem líka eru á árslaunum.

Þegar að kreppir, og þörf er á lausnum, eins og núna, fer svona háttalag verulega í taugarnar á manni.

Nafntogaðasta stríðstól seinni heimsstyrjaldarinnar

Þessi flugvél hafði alveg sérstakan blæ yfir sér þegar ég var gutti fyrir rúmum 40 árum. Borin var óttablandin virðing fyrir þessu aðal stríðstóli bandamanna úr seinna stríðinu (1939-1945) og þau voru ótal B17 Flying Fortress módelin sem drengir þess tíma settu saman. Man ég ennþá eftir vönduðu Airfix og Revell módelunum í því sambandi. Ég setti saman a.m.k. eina svona:

 

 

Fljúgandi virki í Reykjavík

Meira uppörvandi að skoða kvennalistann

Ísland er ekki að gera það gott í karlafótboltanum. Það horfir allt öðru vísi við hjá konunum: Þær íslensku eru í 18. sæti og næst á undan... já einmitt Spáni. Þar á eftir koma aðrar viðurkenndar knattspyrnuþjóðir eins og tékkar, skotar, hollendingar, Argentína, Portúgal og fleiri.

Þið getið skoðað listann hér. 

Evrópumeistarar Spánar á toppinn

Af hverju rekum við tvö stjórnsýslustig?

Oft verður mér hugsað til þess hversu mikill tími, fé og fyrirhöfn fer í togstreitu á milli ríkis og sveitarfélaga.

Það virðist vera hægt að gera deilumál úr öllu ef andstæðir stjórnmálaflokkar ráða annars vegar í ríkisstjórn og síðan hins vegar í sveitarstjórn. Það þarf jafnvel ekki flokkslega andstæðinga heldur ef í það er farið.

Ísland er fámennt land og hér búa 310.000 manns. Þetta er mannfjöldi á við hluta t.d. Kaupmannahafnar í Danmörku.

Ég tel að það eigi að huga að því að sameina stjórnsýslustigin í eitt. Einhverjum kann að þykja þetta eitthvað flókið, en það er það ekki. Þið getið rétt ímyndað ykkur hvað hægt er að spara í rekstri, ekki síst ef landið yrði samhliða þessu eitt kjördæmi sem myndi þá líka þýða að hætt yrði við sum óheyrilega vitlaus milljarðaverkefni eins og t.a.m. Héðinsfjarðargöng svo lítið dæmi sé tekið.

Ég velti því líka fyrir mér til hvers er sumt fólk í stjórnmálum? Til að maka eigin krók eða vinna að framförum og auknu réttlæti í samfélaginu? 

Rannsókn Baugsmálsins gefur ekki tilefni til að rýmka heimildir Björns til að leita!

Ég treysti ekki núverandi dómsmálaráðherra og lögreglustjóranum í Reykjavík til að fara með meira dóms- og löggæsluvald en nú er. Þeir hafa ítrekað sýnt vanhæfni í starfi.

Dómsmálaráðherra með því að sparka ítrekað í rassa saksóknara með ónýtt mál á hendur Baugi til sex ára og síðan nýi lögreglustjórinn sem afrekaði það að efna til alvarlegra óeirða við Rauðavatn við nokkra vörubílstjóra sem voru að mótmæla.

Þessir sömu vilja líka fá Taser rafbyssur til að vekja upp friðsælan íslenskan almenning til uppþota þegar piparúðinn er búinn!

Takk... en nei takk! 

Aukin umsvif glæpahópa

Hvað er rangt við að BERJAST FYRIR FRIÐI?

Ég skil stundum ekki bandaríkjamenn þó að ég telji mig hafa kynnst þeim mjög vel þegar ég starfaði fyrir Varnarliðið á Keflavíkurflugvelli. Þeir eiga það til að rjúka upp í ótrúlegan þjóðrembing þó svo að þeir hafi sjálfir komið að megninu til frá Evrópu og rutt burtu frumbyggjum indíána og síðan flutt inn þræla frá Afríku.

Mér finnst það kaldhæðni að halda því fram að hermenn bandaríkjamanna séu að þjást fyrir bandarísku þjóðina þegar þeir eru staddir í Vietnam, Afganistan og Írak! - Hér er ekki heil brú í röksemdarfærslunum.

Þeir eru að murka lífið úr öðru fólki í fjarlægum löndum fyrir valdhafana en ekki þjóðina. Þeir eru sendir þúsundir kílómetra út í heim til að berjast fyrir friði (eða var það olía, völd og áhrif...?)

Obama ver McCain

Ný forgangsröðun í ríkisútgjöldum löngu tímabær

Ég held að flestir séu mér sammála um að heilsugæsla og hjúkrun séu með mikilvægustu málaflokkum í opinberum rekstri. Við viljum öll tryggja að við njótum bestu mögulegu læknisþjónustu eins og hægt er á hverjum tíma eins og reyndar segir beinlínis í lögum.

Samt er ekki staðið við þetta loforð gagnvart þegnunum. Það eru ennþá biðlistar eftir aðgerðum þótt ríkið eigi nóg af peningum. Það er ekki ásættanlegt að fólk deyi á meðan það bíður eftir aðgerð. Raunar með öllu óþolandi.

Hjúkrun er langt nám og svo í framhaldinu krefjandi starf. Það vill helst enginn hugsa um veikindi og sjúkdóma, en þegar það kemur að manni sjálfum gerir maður fulla kröfu um að þú fáir vel haldið og klárt starfsfólk þegar kemur að einhverri umönnun og læknisþjónustu. Þetta er bara ekki alltaf virt sem skyldi.

Þegar kreppir að er mikilvægara en áður að ríkið leiðrétti forgangsröðun sinni í útgjöldum. Heilsugæsla og menntun eru forgangsatriði. Rekstur trúarbragða og kirkna, utanríkis- og varnarmálakjaftæðis, landbúnaðarstyrkir, ríkisútvarp, íþrótta- og menningardekur og margt fleira á ekkert erindi í ríkisreknum samfélagsrekstri lengur. Þetta má hverfa í hendur þeirra sem vilja njóta í formi einkarekstrar.

Með þessu myndu sparast milljarðar til að bæta heldur í heilsugæslu, menntun og félagsleg úrræði. 

Strax grafalvarlegt ástand