Golf er stundum eyðilegging á góðum göngutúr

Ég er hættur í fótbolta og farinn að spila golf. Eftir því við hvern þú talar þá er þetta ýmist elli- eða þroskamerki. Sannast sagna fannst mér að ég væri orðinn of gamall og vitur til að nenna lengur að eiga í fótboltameiðslum stundum mánuðum saman og það væri bara kominn tími á þetta enda þá kominn um fimmtugt.

Golfið er á köflum ágæt blanda af góðum göngutúr, góðu veðri, góðum félagsskap og gó... nei köflóttu spili. Golfhringurinn á nesinu með Arnari og KR-ingunum var einn sá skrautlegasti á ferlinum. Ég ætla ekki að lýsa öllum hörmungunum en ein holan var leikin svona:

Við erum á 7. teig og það er meðvindur. Boltinn var kominn á tíið. Síðan fór í gang aftursveifla og svo átti að taka á því í framsveiflunni. Þegar dræverinn átti eftir u.þ.b. 20cm í boltann lak hann fram af tíinu, kylfan rétt fleytti skallann á honum og hann ýttist út af teignum og lá í kverkinni fyrir neðan, illsláanlegur. Upphafshöggið náði ekki nema einum metra. Það brast á hlátur hjá meðspilurunum, enda ekki furða. Boltinn hafði eins og viljandi laumað sér burt af tíinu.

í erfiðri stöðu fór boltinn næst 5 metra og ég ekki kominn fram yfir kvennateig, þriðja högg fer inn á braut og stoppar rétt við brautarglompu, heppinn! Í næsta höggi tekst mér að setja kylfuhælinn í boltann og hann skondrast því beint í glompuna sem ég hafði verið svo "heppinn" að sleppa við. Ég komst upp úr glompunni í næsta höggi og klára holuna á 9 höggum.

Þessi golfhringur var með þeim lakari á sumrinu og þá reynir á að félagsskapurinn, veðrið, göngutúrinn og aðrar aðstæður séu í góðu lagi. Annars myndi maður bara hreinlega tapa sér! 

Athugasemdir

[Sigurjón, 15.8.2007 kl. 00:49]

Var það Churchill sem sagði að golf væri góð leið til að spilla góðum göngutúr?

[Haukur Nikulásson, 15.8.2007 kl. 09:37]

Það getur vel verið að hann eigi þá staðhæfingu. Hún getur bara á stundum verið svo innilega sönn!