Voru allir Skagamennirnir úti á þekju samtímis?

Ég er hvorki áhangandi Skagamanna né Keflvíkinga svo það sé á hreinu.

Bjarni Guðjónsson átti að mínu mati sjálfur að taka af skarið og fara með boltann í eigið mark og ganga frá þessu máli strax. Hann er fyrirliði liðsins og átti að hafa næga reynslu til að gera það, en kaus að láta óánægju Keflvíkinga og föður sinn þjálfarann, koma í veg fyrir það og þess vegna gerðist hann sekur um stórfelldan dómgreindarbrest. Hann á svo sem ekki langt að sækja dómgreindarbrest, hann er sonur pabba síns, sem sjálfur forherðist í sömu vitleysunni á hliðarlínunni. Í útvarpsviðtali sem ég heyrði í dag birtist Guðjón manni sem óþverrakarakter af verstu sort. Synd að svona góðir knattspyrnumenn (og þjálfari) skuli hafa svona skelfilega óþverralegt innihald og sýna ekki nokkra iðrun í þessu máli sem hefur opinberað þá frammi fyrir alþjóð.

Þetta mál er subbulegur blettur á knattspyrnuna. Sem betur fer eru svona menn í minnihluta meðal knattspyrnuiðkenda. Við huggum okkur við það!

Mér þætti ekki óviðeigandi að KSÍ tæki málið fyrir. Það eru til fordæmi þess að sambandið taki upp mál er varðar svona óíþróttamannslega framkomu. 

Yfirlýsing frá ÍA

Dýrt að reka Teit?

Það sem hér fylgir eru bara getgátur og þær skuli lesnar sem slíkar. 

Það læðist að manni sá grunur að stjórnamenn KR hafi samið af sér við ráðningu Teits Þórðarsonar. Þeir réðu hann til 3 eða 5 ára og ef þeir reki hann þurfi að greiða honum laun út ráðningartímann.

Teitur talar eins og maður sem ætlar að láta reka sig. Hann er maðurinn með sterku samningsstöðuna og það virðist eins og það hafi gleymst að setja í samninginn að hann þurfi að vinna, það hafi bara ekki verið gert ráð fyrir því að hann tapaði alltaf. Mér sýnist að Teitur sé nægilega ósvífinn til að láta KR blæða, þeir hafi jú narrað hann til að taka þetta skítadjobb að sér hér á skerinu.

Það að Teitur sé ekki hættur er ábending á að það sé einhver samningslegur vandræðagangur þarna.  Sér Teitur ekki sóma sinn í að fara án krafna um stórkostlegar greiðslur samhliða þeim starfslokum?

Teitur: Mín staða óbreytt

Erfiður dagur á golfvellinum

Friðrik kom frekar seint á sunnudagseftirmiðdegi og virtist úrvinda af þreytu.

"Var þetta slæmur dagur á golfvellinum elskan?" spurði hún umhyggjusöm.

"Þetta gekk fínt til að byrja með. En svo fékk Halli hjartaáfall og dó á tíunda teig." svaraði Friðrik.

"En HRÆÐILEGT!" stundi frúi upp yfir sig.

"Það geturðu bölvað þér upp á!" sagði Friðrik "Þá fyrst gerðist þetta erfitt. Dræva á tíunda teig. Draga Halla. Slá á tíundu braut. Draga Halla. Vippa inn á tíunda grín. Draga Halla...." 

 

Ótrúlega hraður leikur og tæpur sigur þegar á reyndi

Þessi leikur gekk hratt fyrir sig. Sóknirnar voru stuttar, af því að varnirnar og markvarslan voru eins og gatasigti a.m.k. í fyrri hálfleik. Það segir sína sögu að skoruð eru 82 mörk í leiknum.

Serbarnir byrjuðu leikinn það vel að ég hélt um tíma að við værum að fá blauta tusku í andlitið á sjálfan þjóðhátíðardaginn, fyrir fullu húsi í brjálaðri stemmingu og með þvílíkt fánahaf að annað eins hefur ekki sést. Fánarnir trúlega í boði HSÍ vegna dagsins.

Það sem bjargaði íslenska liðinu í dag var að sóknin gekk þokkalega vel og þeir héldu haus til loka, en ekki mátti miklu muna.

Til hamingju með þennan sigur, við öll! 

Ísland sigraði Serbíu 42:40 og er komið á EM

KR þarf aukinn eldmóð - ekki meiri peninga!

Það er sorglegt að fylgjast með raunum KR-inga þessa dagana í fótboltanum. Ríkasta félag á Íslandi, með bestu pappírsleikmennina, reyndan þjálfara og fjölmarga og trausta stuðningsmenn, situr á botninum í deildinni og virðist varla eiga nokkra möguleika gegn nokkrum andstæðinga sinna. Hvað er að?

Heildin er skemmd. Skemmd af vannæringu. Næringin sem þeir þurfa heitir eldmóður. Samheiti yfir það þegar leikmenn ná í alla sína getu á réttum tíma. Þessi andlega næring verður að koma frá þjálfaranum og komi hún ekki er sjálfgert að hann fari. Það er engin spurning að þó að leikmennirnir beri blak af þjálfara sínum, sem oftar en ekki eru hinir geðþekkustu og vandaðir menn, verða þeir að víkja. Þetta er bara viðurkennd staðreynd í boltanum. Það er frekar fátítt að þjálfarar geti verið lengur en 3-5 ár með sama liðið. Eftir það kemur þetta andleysi oft upp og þá þarf að breyta til. Sami þjálfari nær sér þó oftast á skrið annars staðar ef hann hefur góðan persónuleika.

Það er hins vegar sjaldnar að andleysið sé jafn algert frá byrjun og nú virðist málið hjá Teiti Þórðarsyni. Og það má alveg taka fram að árangur og árangursleysi í fótbolta er stundum ekki í takt við þá vinnu sem menn leggja á sig. Menn hafa áður mátt sætta sig við að vinna mikið en vinna samt ekki neitt! 

Ísland í efsta sæti á Youtube - Þvílík ánægja!

Íslenska knattspyrnulandsliðið var í 37. sæti á styrkleikalista FIFA fyrir nokkrum árum. Nú erum við að nálgast 100. sætið með falli um nærri 60. sæti. Ástæðan er meðal annars frammistaða á borð við þessa sem er mest sótta myndbandið í heiminum á Youtube í dag.

Samt telur KSÍ að allt sé í himnalagi. Verið sé að byggja upp nýtt landslið! Það er gott að geta stungið höfðinu niður eins og strútarnir. Við hin sem höfum höfuðið uppúr þurfum að þola að allur heimurinn hlæi að okkur. 

Gott golfveður loksins komið!

Fyrsti golfhringurinn minn í þokkalegu veðri var í gærkvöldi og kominn 7. júní. Rok, rigning og blandan sem kölluð er slagveður hefur verið einkennandi síðustu daga. Sanngirnin er sú að allir keppa við sjálfa sig og aðra við sömu aðstæður.

Mitt í öllu þessu verður manni hugsað til þess hversu heppinn maður er að geta nöldrað yfir smámunum eins og íslensku sumarveðri. Maður hefur í rauninni allt með sér: Lifandi, við þokkalega heilsu, ágætlega gangfær og í góðum félagsskap. Hvað er hægt að óska sér meira?

Eyjólf vantar sjálfstraust - þess vegna á hann að hætta

Í öllum íþróttum þarf trúin að vera til staðar. Ekki guðstrú heldur trúin að þér takist það sem þú ætlar þér. Við sem höfum tekið þátt í íþróttum vitum að þegar við trúum að við getum hlutina þá takast þeir ótrúlega oft.

Eyjólfur hefur í hverju fjölmiðlaviðtalinu á fætur öðru talað um hversu "erfitt" þetta lið og hitt liðið séu. Þetta er ávísun á tap og niðurlægingu. Ef verkefnið er fyrirfram svona erfitt vinnst það aldrei. Svona vælugangur frá þjálfaranum gagnvart fjölmiðlum getur ekki virkað öðruvísi en letjandi á leikmennina.

Eyjólfur er geðugur maður sem náði ágætum árangri sem leikmaður. Hann er hins vegar ekki að gera sig sem þjálfari vegna skorts á sjálfstrausti. Geir Þorsteinsson, formaður KSÍ, er í einhverri undarlegri sjálfsafneitun við hlið hans og mætti þess vegna sjálfur hugsa sinn gang ef þetta er ásættanlegur árangur hjá landsliðinu. Ég gef ekki skít fyrir mismun á fólksfjölda í löndunum sem við keppum við, það eru jafnmargir leikmenn á vellinum. Allt atvinnumenn sem hvorki tekst að blása í eldmóði né sigurvilja.

Eyjólfur, er ekki komið nóg?

Íslendingar sáu aldrei til sólar í fimm marka tapleik

Heppnir að tapa ekki - Fengu Liechtenstein í höfuðið

Ég hef aldrei séð jafn lélegt íslenskt landslið og í dag. Það gekk ekkert upp nema markvarsla Árna Gauts og fyrri hálfleikurinn hjá Matthíasi.

Þeir hreyfðu sig ekki án boltans og voru ótrúlega latir að dekka andstæðingana sem voru miklu viljugri en okkar menn. Sendingar voru oftast arfaslakar og menn ótrúlega hikandi. Sem dæmi um aulagang horfði maður upp á sókn okkar manna daga upp vegna einfætts leikmanns sem lék honum til baka vegna þess að hann lagði ekki í að nota hægri fótinn, og þetta eru atvinnumenn!

Þrátt fyrir að tala um að vanmeta ekki andstæðinginn gerðu okkar menn það bara samt! Andstæðingarnir fengu fleiri og betri færi en við og miðað við allt þegar upp er staðið vorum við heppnir með jafntefli, það er jákvætt. Það vantar eldmóð í íslenska liðið til að ná árangri.

Í dag fékk Ísland Liechteinstein í höfuðið!

Jafntefli gegn Liechtenstein og Eiður í leikbann