Þetta eiginlega ekki mannlegt!

Tiger Woods kláraði enn eitt PGA meistaramótið með sigri í dag og skorið var 22 undir pari.

Hann heldur því blákalt fram að hann æfi meira en aðrir og því uppskeri hann samkvæmt því. Ég sé ekki ástæðu til að efast um sannleiksgildi þeirrar staðhæfingar hans.

Sjáið hvernig honum tókst til á 16 holu á Masters mótinu 2005: 

 

Ekki furða að við vinnum ekki...

... með svona einfætta leikmenn náum við aldrei langt.

Hermann: Áhorfendur voru stórkostlegir

Spánverjar ákváðu að Eiður væri áfram meiddur!

Hér er mál í uppsiglingu sem ekki verður séð fyrir endan á strax.

Hér virðast Spánverjar vera að draga tennurnar úr íslenska landsliðinu með aðstoð forráðamanna spánska félagsins Barcelona. Þetta hlýtur að draga dilk á eftir sér þar sem búið var að lýsa því yfir að hann væri orðinn leikfær þó ekki hefði hann úthald í fullan leik.

Ég á jafnvel von á því að keppinautar Spánar um efstu sæti riðilsins láti fara fram rannsókn á þvi með hvaða hætti þetta ber að og þá reynir á það hvort stjórn KSÍ hefur manndóm í sér til að segja satt í þessu máli.

Það er auk þess ámælisvert að stjórn KSÍ noti nafn Eiðs Smára fram á allra síðustu stundu til að selja miða á leikinn. Er engin sómatilfinning lengur í þessu málum? 

Barcelona óskaði eftir því að Eiður spilaði ekki í kvöld

Höfum við Þróttarar áhuga á einkavæðingu?

Athyglisverð er athugasemd Pálma um Þrótt.

Spurningin er hvort almennir félagsmenn Þróttar séu tilbúnir að einkavæða félagið? Er Pálmi tilbúinn að setja pening í félagið? Sumir hafa þar látið sig dreyma um meistaradeildarsæti og þá er eins gott að það komi einhver að málum með nægilega feitt veski til að gera það mögulegt.

Pálmi Haraldsson: „Ég er ekki að kaupa Newcastle"

Golf er stundum eyðilegging á góðum göngutúr

Ég er hættur í fótbolta og farinn að spila golf. Eftir því við hvern þú talar þá er þetta ýmist elli- eða þroskamerki. Sannast sagna fannst mér að ég væri orðinn of gamall og vitur til að nenna lengur að eiga í fótboltameiðslum stundum mánuðum saman og það væri bara kominn tími á þetta enda þá kominn um fimmtugt.

Golfið er á köflum ágæt blanda af góðum göngutúr, góðu veðri, góðum félagsskap og gó... nei köflóttu spili. Golfhringurinn á nesinu með Arnari og KR-ingunum var einn sá skrautlegasti á ferlinum. Ég ætla ekki að lýsa öllum hörmungunum en ein holan var leikin svona:

Við erum á 7. teig og það er meðvindur. Boltinn var kominn á tíið. Síðan fór í gang aftursveifla og svo átti að taka á því í framsveiflunni. Þegar dræverinn átti eftir u.þ.b. 20cm í boltann lak hann fram af tíinu, kylfan rétt fleytti skallann á honum og hann ýttist út af teignum og lá í kverkinni fyrir neðan, illsláanlegur. Upphafshöggið náði ekki nema einum metra. Það brast á hlátur hjá meðspilurunum, enda ekki furða. Boltinn hafði eins og viljandi laumað sér burt af tíinu.

í erfiðri stöðu fór boltinn næst 5 metra og ég ekki kominn fram yfir kvennateig, þriðja högg fer inn á braut og stoppar rétt við brautarglompu, heppinn! Í næsta höggi tekst mér að setja kylfuhælinn í boltann og hann skondrast því beint í glompuna sem ég hafði verið svo "heppinn" að sleppa við. Ég komst upp úr glompunni í næsta höggi og klára holuna á 9 höggum.

Þessi golfhringur var með þeim lakari á sumrinu og þá reynir á að félagsskapurinn, veðrið, göngutúrinn og aðrar aðstæður séu í góðu lagi. Annars myndi maður bara hreinlega tapa sér! 

Er metnaðurinn að vera hæstlaunaði varamaðurinn?

Manni virðist af umræðunni að peningarnir séu orðnir svo mikið aðalatriði að það skipti hreint ekki máli hvort hann fái að spila eða ekki. Ég held að flestir séu meðvitaðir um að launaseðillinn skipti máli bara einn dag í mánuði. Alla aðra daga sé spurning hvort þú sért hamingjusamur í því sem þú fæst við.

Ég held að flestum okkar verði morgunljóst til hvers hugur Eiðs Smára stendur varðandi þetta eftir þennan vetur. Ætlar hann að láta peningana alfarið ráða ferðinni?

Ég vona sannarlega að þessi geðþekki maður taki rétta ákvörðun. 

Segir launakröfur Eiðs Smára háar

Svona samkeppni getur verið jákvæð á endanum

Það hentar sumum íþróttamönnum að vera í svona stífri samkeppni. Það heldur þeim á tánum. Ekki skyldi mig undra að þeir héldu fyrstu tveimur sætunum til loka mótsins.

Hamilton-Alonso ástandið „verra“ en rimmur Senna og Prost

West Ham örugglega ekki "westi" staðurinn fyrir Eið Smára

Ég hef ekki trú á að Eiður eigi framtíð hjá Barcelona og hafði það einhvern vegin ekki þegar hann fór þangað. Það var viðbúið, sem og reyndist, að honum væri ætlað hlutverk varamanns.

Eið skortir hvorki hæfileika til að leika knattspyrnu né líkamlegt atgervi til að endast í þessari íþrótt. Hann virðist helst skorta eldmóðinn og ákveðnina. Því miður tel ég hans helsta veikleika vera skort á þeim hroka sem gjarnan einkennir íþrótta- og listamenn í fremstu röð.  Þessi hroki (sem sumir kalla bara sjálfstraust) hjálpar fólki að ná hæstu hæðum í sinni grein. Þeir bestu einfaldlega trúa alltaf að það sem þeir eru að gera hverju sinni gangi upp.

Ég hef fulla trú á að þessi skipti til West Ham gæti orðið Eið til góðs. Hann fengi loksins það leiðtogahlutverk sem hann þarf til að ná á þann topp sem býr í honum. Hann þarf hins vegar að virkja andlega hlutann til fulls.

Viðræður West Ham og Barcelona um kaup á Eiði sagðar hafnar

Trúðu KR-ingar myndunum um Kf. NÖRD?

Maður veltir því fyrir sér hvort sjónvarpsþættirnir um kf. NÖRD hafi verið svo sannfærandi fyrir KR-ingana að þeir hafi trúað því að Logi gæti gert stórlið úr antisportistum? Það hljómar allavega betur en að gera nördalið úr stórstjörnum.

Kannski er upplagt að Sýn búi til raunveruleikaþátt þar sem Logi stýrir liði í botnbaráttu. Úr því sem komið er næsta víst að KR-ingar muni búa við dramatísk lok á þessu knattspyrnusumri.

Oft staðið til að ég tæki við KR

Framtíðarkylfingur með gott hugarfar

Þessi strákur lofar sannarlega góðu. Hefur hárétt hugarfar í þessa íþrótt, kemur vel fyrir og er hvetjandi fyrir klúbbinn okkar.

Íslandsmeistarinn á 15 höggum undir pari