Sárleg vöntun á eðlilegri samkeppni

Svona fréttir þurfa ekki að koma neinum á óvart. Lyfja og Lyf og heilsa vildu sameiningu á sínum tíma en Samkeppnisstofnun heimilaði það ekki. Þau hafa í staðinn bara unnið saman án sameiningar og skipta með sér markaðinum og ákveða verð á öllu lyfjatengdu þrátt fyrir allt. Aðferðirnar við að koma öllum öðrum út af þessum markaði eru flestum ljósar. Ég ráðlegg stjórnendum þessara fyrirtækja helst að tjá sig ekki í fjölmiðla því þá losna þeir við að ljúga opinberlega. Þeir virðast gleyma því að nútíma tækni geymir mjög vel allt sem þeir segja.

Lyfjabransinn er ekkert einn í þessu samráði og samkeppnisleysi. Olíufélögin halda áfram að sverma að Atlantsolíu, Tryggingafélögin drápu FÍB tryggingar með samráði, Bankarnir eru allir í bullandi samráði og sameiginlegum einokunarrekstri kortafyrirtækja, sala matvæla og heimilistækja er brátt að verða komin á sama stig og danska einokunarverslunin og svona mætti lengi telja.

Ég tel að samkeppni sé ennþá örlítil í sérvöru og iðngreinum en að öðru leyti eru íslendingar ofurseldir einokun á flestum sviðum og stundum er þeirri verstu sem stjórnað er af ríkinu. Það eru því engar patentlausnir fólgnar hvorki í einkavæðingu né ríkisrekstri.

Á endanum er það alltaf græðgin sem ræður för og skiptir þá engu hver er haldinn henni.

Hótuðu gjaldþroti

Athugasemdir

[lipurtá, 27.7.2007 kl. 09:35]

já græðgin er bannvænn krónískur sjúkdómur. Þeir sem sýkjast eiga litla von um bata, sérstaklega þar sem sjúkdómnum fylgir mikil afneitunarhæfni og kerfi sjálfsréttlætinga svo að hinn sjúki gerir sér venjulega enga grein fyrir ástandinu. Eina lækningi er gagnger hugarfarsbreytin og andleg vakning en slíkt hendir fæsta nema þeir lendi í raunverulegum lífsháska.

[Ævar Rafn Kjartansson, 28.7.2007 kl. 00:09]

Svo var talað un danska einokun. Þetta er skipulagðara lævísara, falskara og arðvænlegra. En passlega löglegt miðað við lamaðar reglugerðir og lög um samkeppni.

[Ingvar Valgeirsson, 29.7.2007 kl. 22:46]

Svo má spyrja sig - hvort er betra:

1. Samkeppnisaðilinn setur á stofn apótek, risastórt og setur mann á hausinn með tilheyrandi hörmungum.

Eða:

2. Samkeppnisaðilinn lætur mann vita að hann sé að fara að opna og setja mann á hausinn. Býður í kompaníið svo maður geti þó allavega selt það á eitthvað í stað þess að fara á kúpuna og missa íbúð og bíl.

Maður spyr sig...

[Ævar Rafn Kjartansson, 29.7.2007 kl. 23:33]

Er þetta ekki bæði kúgun? Smurt eða ósmurt.

[Sigurjón, 30.7.2007 kl. 02:26]

Er ekki smurt betra en ósmurt?