Kauphöll Íslands að verða að lítilli möppu hjá NASDAQ

Kauphöll Íslands sameinaðist OMX fyrir skömmu og nú blasir við sú nöturlega staðreynd að hún sé núna bara orðin að lítilli möppu sem er að detta ofan í skúffu hjá NASDAQ í bandaríkjunum.

Ég hef áður lýst þeirri skoðun minni að ekki þurfi mikið að gerast til að íslenskir bankar verði stærri erlendum bönkum að bráð út í hinum stóra heimi. Þar með skrúfast fyrir skattatekjur til Íslands vegna einkavæðingarinnar. Sala bankanna mun þá í ljósi tímans verða sambærileg við það að pissa í buxurnar sínar til að halda að sér hita í frostinu. Enn og aftur blasa við staðreyndirnar um hið falska íslenska efnahagsundur sem ég óttast að verði að hreinu aðhlátursefni þegar fram í sækir. Íslenska efnahagsuppsveiflan hefur nefnilega ÖLL verið tekin að láni hjá erlendum bönkum.

Ég vil helst hafa rangt fyrir mér í þessu efni.

Nasdaq yfirtekur OMX

Athugasemdir

[Guðjón Sigþór Jensson, 25.5.2007 kl. 08:02]

Já þetta eru skjótar breytingar.

Óskandi er að engin verulega slæm afleiðing leiði af þessari breytingu sem alltaf hefði mátt búast við. Varðandi íslensku bankana þá eru þeir orðnir mjög alþjóðlegir, megintekjustofnar þeirra eru erlendis. Svo framarlega sem skattaumhverfi þeirra sé þeim sem og öðrum fyrirtækjum hagstætt má ætla að þeir verði áfram skráðir á Íslandi.

Sjálfur hefi eg haft efasemdir um þessa óvenjulegu velgengni íslenskra fyrirtækja á erlendri grund. Er virkilega staðreynd að engum öðrum klókum viðskiptamönnum hafi uppgötvað þessi kauptækifæri og þeir íslensku? Nú er formúlan sú að kaupa ódýrt, kaupa upp fyrirtæki með leyndar eða vanmetnar eignir með úreltan rekstur sem er aðlagaður nýjum stjórnunarstíl og framleiðsla/sala nútímavædd og þessi fyrirtæki seld þegar þau eru komin á gott flug. Þá er stundum innleystur góður hagnaður.

Við þurfum að ná til okkar gullkálfa sem færa fleiri stoðir undir samfélagið. En svona rekstur þarf ekki endilega að vera mengandi á við stóriðju eða hafa í för með sér fórnir á náttúruperlum landsins. Lúxembúrg er gott dæmi um lítið land sem ekki er auðugt af náttúruauðæfum en er vel í sveit sett fyrir ýmiskonar viðskipti og miðstöð fjármála. Ætli það sé ekki lagaumhverfið sem þarf að vera hagstætt og stöðugt sem máli skiptir?

Mosi alias

[Sigurjón, 25.5.2007 kl. 12:30]

Ég held að það sé alveg rétt hjá þér Guðjón.

[Ágúst H Bjarnason, 27.5.2007 kl. 18:37]

Sæll Haukur, Hvernig líst þér á að Arabar kaupi Kauphölli Íslands?  

Kauphöllin í Dubai sögð vilja kaupa OMX

Breska blaðið Sunday Times segir í dag, að fyrirtækið Dubai International Financial Centre, sem rekur kauphöllina í Dubai í Sameinuðu arabísku furstadæmunum, sé að íhuga að leggja fram tilboð í sænska félagið OMX, sem rekur kauphallir á Norðurlöndunum og í Eystrasaltsríkjunum, þar á meðal á Íslandi.

Bandaríski verðbréfamarkaðurinn Nasdaq lagði í síðustu viku fram 3,7 milljarða dala tilboð í OMX og hafa stjórnir beggja fyrirtækjanna fallist á tilboðið.

Blaðið segir, án þess að vitna til heimilda, að arabíska fyrirtækið, sem er í eigu stjórnvalda í Sameinuðu arabísku furstadæmunum, hafi beðið breska bankann HSBC að veita ráðgjöf í tengslum við hugsanlegt tilboð.

[Ágúst H Bjarnason, 27.5.2007 kl. 18:39]

Þessi frétt var í Mogganum í dag og RÚV.