Hamingjustund í Furugerði 1 hjá eldri borgurum

Ég rakst á setningu sem sagði að 80% af því sem skrifað væri í bloggi væri neikvætt. Mér finnst því tilvalið að skrifa á jákvæðari nótum í þetta sinn.

Við Gunnar Antonsson spiluðum og sungum fyrir eldri borgara á Góugleði þeirra í gærkvöldi í Furugerði 1. Við höfum gert það áður og viðtökurnar þarna voru þannig að okkur fannst við vera bara sannkallaðar stjörnur. Þetta eru þakklátustu og vinalegustu áheyrendur sem maður getur hugsað sér.

Tveir eldri herramenn úr hópnum voru búnir að hita upp mannskapinn með frábærum flutningi á bæði söng- og gamanlögum. Þannig var það til að auðvelda okkur að halda síðan bara áfram. Starfsfólkið þarna gerir sannarlega sitt besta til að fólkinu líði sem best. Þarna var bara smitandi gleði.

Fyrir okkur Gunnar var þetta hamingjustund sem við erum mjög þakklátir fyrir.

Sofnaði Gunnar vegna valdþreytu?

Gunnar Birgisson er maður framkvæmdanna og vinsæll meða fjölmargra (aðallega í Kópavogi) sem telja hann vera ímynd hins duglega framkvæmdamanns sem lætur verkin tala og nennir ekki hlusta á neitt kvak um einhver skítleg smáatriði.

Gunnar er lengi búinn að sitja við völd og virðist vera orðinn svo valdþreyttur að hann nennir ekki  lengur að fylgjast með því að hans gjörðir eða annarra þoli einhverja gagnrýna skoðun. Hann nennir ekki að fylgjast með einhverju leyfadóti frá Reykjavíkurborg áður en hann heimilar sínum mönnum að róta að vild. Gunnar er nefnilega löngu búinn að komast að þvi að moldviðri af þessu gengur yfir á nokkrum dögum og svo fellur allt í sama farið.

Í öllu því byggingarfári sem nú er í gangi þarf ekki að koma neinum á óvart að það er mikil eftirspurn eftir þroskuðum trjágróðri. Menn sem eru að byggja með látum nenna nefnilega ekki að bíða eftir því að horfa litlar trjáhríslur vaxa í garðinum sínum. Margir eiga nefnilega nóga peninga til að kaupa stærri tré. En þau fást ekki svo glatt og því sérlega vel til fundið að "breikka" aðeins skurðina í landi Reykjavíkur og fjarlægja örlítið fleiri tré. Hver átti að taka svo sem eftir því?

Það þarf enga snillinga til að bera saman framkvæmdirnar saman við umhverfið og slá mati á það hversu mikill trjágróður hefur hugsanlega verið fjarlægður. Mér finnst ekki líklegt að Skógræktarfélag Reykjavíkur sé að ljúga upp þessu mati.

Það er sama hvernig þetta mál er skoðað. Það er ólykt af því öllu og hefst hjá sama manninum sem nennir ekki lengur að fela slóðina sína.

Hvenær fæðist nýja framboðið?

Við erum mörg að vinna í stofnun nýs framboðs jafnaðarmanna og þarf ekki að leyna því að óskastaðan er að fá Jón Baldvin Hannibalsson, Ómar Ragnarsson, Margréti Sverrisdóttur og fleiri góðar manneskjur til að leiða slíkt framboð. Það eru ekki allir búnir að taka endanlega ákvörðun um framboð sín í því máli, til þess liggja að sjálfsögðu ýmsar ástæður sem ber að virða.

Margir telja meiri líkur en minni séu á því að hægt verði að gera þetta að veruleika og því rétt að anda rólega. Það þarf nefnilega að vanda til slíks verks og samræma marga hluti áður en gengið er í þetta dæmi af alvöru. Vinna þarf hlutina í réttri röð út frá aðalatriðum en ekki smámunasemi. Fólk þarf að koma væntingum sínum svolítið á jörðina til að málin gangi rétt upp.

Þróun mála bendir sterklega í þá átt að Samfylkingunni hafi ekki tekist að verða í alvöru sameinað afl Alþýðuflokksins, Alþýðubandalagsins og Kvennalistans. Við höfum mörg á tilfinningunni að stærsti kjarni gamla Alþýðubandalagsins séu nú í Vinstri grænum, Kvennalistinn hafi öll tök á Samfylkingunni og þeir sem aðhylltust hreinni jafnaðarstefnu úr Alþýðuflokknum séu landlausir og bíði þess vegna eftir nýjum flokki. Það fer heldur ekkert á milli mála að óánægðir jafnaðarmenn úr Sjálfstæðisflokknum munu ekki eiga með samleið með Samfylkingu Ingibjargar Sólrúnar.

Forystumenn hinna flokkanna segja að það sé feigðarflan að bæta við stjórnmálaflokki. Slíkt rýri möguleika á að fella ríkisstjórnina. Þau sömu hafa fengið þrjár tilraunir sem ekki hafa tekist. Svona málflutningur er því bara yfirlætislegur hroki því það á enginn flokkur kjósendur. Kjósendur ráða því bara hreint sjálfir hvort þeir mynda nýja flokka eður ei.

Afrekaskrá gömlu flokkanna Sjálfstæðisflokksins og Framsóknarflokksins beinlínis argar á tiltekt í ótrúlega mörgum málum sem og forvarnarstarf gagnvart frekara óhófi í einkavinavæðingarmálum og stóriðjumálum.

Hófsamir jafnaðarmenn munu vonandi fá sinn 20-25% flokk ef allt gengur eftir. Það er ekkert ómögulegt í þessum málum og full ástæða til bjartsýni. Þetta vonandi skýrist á nokkrum dögum í viðbót. Stuðningsfólki þess fólks sem ég taldi í fyrstu málsgrein ráðlegg ég að halda ró sinni og leyfa málum að þróast í rétta átt án of mikils æsings.