Fyrirboði að því sem koma skal?

Eitthvað finnst manni þetta klúður í meira lagi broslegt og ekki gæfuleg byrjun á formannsferli Sigmundar. Ég tel að flokkurinn hafi gert mistök með vali hans. Hann er að njóta þess að hafa verið áberandi í fjölmiðlum á liðnum árum og það virkar vel á marga.

Hann er hins vegar langt frá því að vera lipur í máli og er auk þess utan þings og lendir því í sömu leiðindastöðunni og Jón Sigurðsson. Höskuldur hafði að þessu leyti kjörstöðu til að koma skilaboðum á framfæri sem Sigmundur hefur ekki.

Atkvæði Páls hafa farið í heilu lagi á Sigmund og því augljósir flokkadrættir þarna í gangi. Höskuldur hefði að mínu mati verið gæfulegri kostur og höfðað til fleiri en Sigmundur af þeim sem ekki eru Framsóknarmenn. Sem væntanlegt EKKI-atkvæði flokksins er ég því sáttur við niðurstöðuna.

Sigmundur kjörinn formaður

Athugasemdir

[Sverrir Einarsson, 18.1.2009 kl. 16:50]

Aldur þeirra sem kusu er á þeim aldri að "Hann kemur svo vel fyrir í sjónvarpinu" viðhorfið ræður hver er kosinn því fór sem fór.......ekki að mér sé ekki sama hvað er að gerast í framsókn...kem ekki til með að kjósa þá.

[Haukur Nikulásson, 18.1.2009 kl. 17:15]

Ég veit satt að segja ekki hvernig Sigmundur á að verða trúverðugur fulltrúi nýrrar siðvæðingar.

Pabbi hans, Gunnlaugur Sigmundsson, er nefnilega einn þeirra sem hvað harðast verið á fullu í tvöföldum hlutverkum stjórnmálamanna og auðmanna og er í sama ósmekklega og vafasama græðgisgenginu og t.d. Finnur Ingólfsson. Hefur einhverjum dottið í hug að þeir hafi unnið fyrir fólkið í landinu?

Dettur einhverjum í hug að Sigmundur gangi fram í því að láta rannsaka störf föður síns við að sölsa undir sig einkarekstri þar sem ríkið var um tíma eini stóri viðskiptavinurinn? 

[Guðmundur Ragnar Björnsson, 18.1.2009 kl. 22:33]

Það er ekki rétt að flokkadrættir hafi verið í gangi. Sigmundur fékk meginþorra atkvæða Páls að því er virðist en það þýðir ekkert sérstakt. Ég vil taka það fram að það var fagnað alveg jafn mikið í salnum sem heild þegar Sigmundur var lýstur formaður og þegar Höskuldur var lýstur formaður. Það var mikil stemmning fyrir báðum þessum frambjóðendum og margir hreinlega í vandræðum með valið.