5 ára reykingabindindi fagnað - með stórum vindli?

Í dag eru fimm ár síðan ég hætti að reykja. Sé það skoðað með augum einhvers annars er þetta hvorki mikill áfangi né afrek. Það eru núna fimm ár síðan ég fullvissaði sjálfan mig um að það væri hrein og klár heimska að soga ofan í sig eitur með þessum hætti.

Þetta er hins vegar hægara sagt en gert og það vita alvöru tóbaksfíklar. Eftir á að hyggja taldi ég mig berjast við tóbaksfíknina á 10 sekúndna fresti allan minn vökutíma í heilan mánuð! Eftir það fékk maður einhver löngunarhlé. Ég var áður búinn að reyna plástra sem ollu bara svima og ég ákvað þá að nú skyldi þetta tekið bara "cold turkey". Það hefur gengið til þessa dags.

Eitt af því helsta sem ég sakna er að eiga ekki í fórum mínum þær tvær milljónir króna sem ég ætti að hafa sparað með því að hætta að reykja. Ef einhver hefur rekist á þær mætti viðkomandi koma þeim til skila. Í staðinn skal ég glaður skila 10 kílóunum sem óvart settust utan á mig.

Eftir að maður náði sér út úr virkri tóbaksfíkn er ég líka orðinn þess fullviss að sumir eigi svo bágt með að láta undan ríkisrekinni eiturbyrlun að það ætti að banna tóbaksnotkun með lögum. Forræðishyggja í þeim efnum sé jafn réttlætanleg og þeirri að skikka menn til að aka hægra megin í umferðinni.

Vindillinn að þessu sinni verður úr súkkulaði og karamellu. 

Athugasemdir

[Haraldur Haraldsson, 29.9.2008 kl. 13:49]

Til hamingju Haukur með áfangana!!!,eg hefi aldrei reykt en gæti samt lagt ein 30 kg i bankann/Kveðja Halli gamli

[Ingvar Valgeirsson, 29.9.2008 kl. 15:33]

Ætli milljónirnar tvær hafi ekki bara farið í nammi?

[Haukur Nikulásson, 29.9.2008 kl. 15:37]

Takk fyrir góðar óskir Halli.

Tvær millur í nammi...? Hmmm... Varla fékk ég 10 kílóin ókeypis.

[Marta Gunnarsdóttir, 29.9.2008 kl. 19:12]

Til lukku, vona að ég verði svona staðföst bráðlega.

[Sigurjón, 1.10.2008 kl. 00:18]

Til hamingju með árin 5.  Það er 3 og hálft hjá mér...

[Jón Agnar Ólason, 1.10.2008 kl. 12:47]

Til lukku með árangurinn, bloggvinur góður; ég ber ómælda virðingu fyrir fólki sem brýst frá því að vera bundið á höndum og fótum af tóbaksfíkn og til betra lífs. Ég þekki þetta sem betur fer ekki af eigin raun en hef séð hversu forfallið fólk getur orðið. Ég á þrjá mjög góða vini sem reyktu öll talsvert en eru hætt í dag, og þau eru sammála um að það þýði ekki að trappa sig niður eða plástra á sér rassinn. Það verði bara að klippa á ósiðinn, feisa músíkina sem kaldur kjúlli í einhvern tíma og afeitra sig með hörku.

Flott hjá þér!

[Ágúst H Bjarnason, 1.10.2008 kl. 21:02]

Ég man ekki eftir að hafa séð þig reykja í gamla daga Haukur

Til hamingju með afmælið!