Reykingabannið er stór hluti vandans

Það fer ekkert á milli mála í mínum huga að bann við reykingum á veitingahúsum er stór ástæða þess að meiri læti eru í miðbænum. Fólk fer þá út af veitingahúsum til að reykja og auðvitað verður það bæði pirrað þess vegna og er náttúrulega sýnilegra úti við. Auk þess má ekki hafa með sér dýrkeypt áfengið með í reykjarstundina. Ekki minnkar pirringurinn við það að vera neyddur til að klára úr glasinu til að komast í reykinn.

Það er ekki hægt að halda öllu og sleppa engu. Á meðan ríkið okrar svona mikið á áfengi og tóbaki er ekki hægt að bjóða fólki upp á að ekki megi njóta þess samtímis. Hér þarf eitthvað að láta undan, því ekki batnar ástandið í kuldanum í vetur. Þá verður pirringurinn meiri og auk þess má búast við að heilsu fólks sé hætta búin með þessu reglugerðarrugli. Núverandi ástand er engum boðlegt.

Hverjar eru lausnirnar:

1. Banna allan innflutning, sölu og notkun á tóbaki á þeim forsendum að þetta sé tilgangslaust og lífshættulegt fíkniefni.

2. Leyfa veitingastöðum að koma upp vel loftræstum reykherbergjum.

3. Leyfa veitingastöðum að hafa það í valdi sínu að leyfa eða banna reykingar á meðan tóbak er selt sem löglegur vímugjafi. Gestir og starfsfólk verði þá sjálft ábyrgt fyrir því hvort það vill þola reyk eða ekki.

Tillaga Stefáns Eiríkssonar lögreglustjóra um lokunartíma kl. 2 að nóttu er í versta falli barnaleg. Ég á ekki orð yfir þá forsjárhyggju sem maðurinn lætur sér detta þarna í hug. 

Ég vil ennfremur lýsa þeirri skoðun minni að fólk sem kaupir húsnæði í miðbænum, þar sem veitingahúsin eru ríkjandi, mátti allan tímann vita af þessu ónæði sem fylgir helgarfylleríi sem hefur varað hátt í heila öld á þessum slóðum. Ég hef takmarkaða samúð með þeim í þessu tilliti. Sjálfum hefur mér aldrei langað að vera í svona mikilli nálægð við helgarsukkið.

Einhver sagði: If you can't stand the heat - Get out!

Hiti í gestum miðborgarþings í kvöld

Athugasemdir

[Haukur Nikulásson, 17.9.2007 kl. 22:03]

Ég fer afar sjaldan í miðbæinn á helsta sukktímanum. Hættur að nenna því. Ég skal játa á mig kvikindisskap þegar ég segi að þeir sem ekki þola lætin í miðbænum eigi bara að koma sér í burtu þaðan.

[Óskar Þorkelsson, 17.9.2007 kl. 22:25]

mikið er nú gott að reykja ekki.. en þessi lausn að loka kl 02.00 er bara til þess að spara yfirvinnutíma lögreglunnar.. leysir ekki nokkurn skapaðan hlut. Gleðskapurinn fer bara út í blokkirnar í staðinn !

p.s. Mætti halda að villi vitlausi og bjössi litli hafi átt hlut að máli

[Bjöggi (IP-tala skráð) 17.9.2007 kl. 22:59]

Ég bý á þessu svæði og ég er alveg sammála þér, ef maður þolir ekki lætin þá á maður bara að koma sér í burtu. Fjölskyldan mín hefur búið í miðbænum í áratugi og höfum við oft séð ástandið verra. Fyrir svona 10-15 árum var algengt að skemmdarverk væru unnin á húsinu og garðinum, eitthverju stolið úr garðinum, æla í garðinum, mannaskítur, dautt fólk, blóðpollar, drukkið fólk að ryðjast inn til manns osfrv. Höfum ekki lent í neinu svoleiðis undanfarið, fyrir utan eitt atvik þar sem nágranninn ruglaðist á húsum og svaf á ganginum hjá okkur, en svoleiðis gerist fyrir bestu menn. Ég hef aftur á móti orðið var við meiri háfaða og "almennan sóðaskap". Þá er maður að tala um einstaka dós, bréf utan af skyndibitum og einstaka brotin flaska og svo rosalega vond áfengis og reykingarlykt sem gýs upp um helgar, sem ég fann ekki áður.

Ég man líka þegar skemmtistöðunum var öllum lokað á sama tíma var ofbeldi mikið vandamál. Um hverja helgi heyrði maður af fólki sem var búið að berja og það lá milli heims og helju á sjúkrahúsi. Ég þekki eina stelpu sem varð fyrir heilaskaða á þessum tíma og eina stelpu sem olli annari heilaskaða á þessum tíma, þetta var rétt áður en reglum um opnun skemmtistaða var breytt. Það var nefninlega í tísku að ganga í hermannaklossum á þessum tíma og sparka í höfuðið á fólki.

[Haraldur Haraldsson, 17.9.2007 kl. 23:35]

Sammála þessu flestu sem Haukur segir/ ef þetta erum um það bil 10-20 þús mans með atkvæðisrétt ,af hverju er þá´ekki bara kosið um þetta að loka öllu og ,hvar a´á fólkið að vera,i heimahúsum að drekka og berjast/Halli gamli

[Elías Þórsson (IP-tala skráð) 18.9.2007 kl. 01:55]

Ég sem ungur maður sem stundar bæinn mikið og bý rétt hjá hjartamiðbæjarins verð að vera sammála þér Haukur. Það er verið að reyna að leiðrétta efitirmála reykingabannsins með hörku í staðinn fyrir að sýna bara smá skilning. Reykingabanni fylgir augljós læti og rusl, þar sem fólk sem áður var að rusla inni á skemmtistaðnum og var þar að öskra og æpa er núna að gera nákvæmlega það sama en það gerir það fyrir utan staðina. Maður tekur líka eftir því að oft er um helmingur skemmtistaðagesta statt fyrir utan staðina, vegna reykingabannsins og því er komið þannig hjá flestum stöðum að reykinga,,rýmin" eru einfaldlega bara gangstéttin fyrir utan skemmtistaðinn og oft þarf fólk bara að drulla sér aftur í röð til að komast inn, svo þá þykir tilvalið að pissa bara fyrir utan áður en farið er að standa í þessari löngu, löngu röð. Enginn myndi fara út í nýstingsgaddi til að pissa, ef hægt er að gera það inni á skemmtistaðnum sjálfum.

[halkatla, 18.9.2007 kl. 02:10]

afhverju er aldrei hægt að gera neitt á Íslandi minna heimskulegt en það sem var áður? ég verð að koma með eina svona einfeldningsspurningu útí blá-nóttina.