Stórfelldur smáþjófnaður borgar sig

Mér er farið að blöskra hvernig siðlaus smáþjófnaður er að verða landlægur um allt í þessu þjóðfélagi.

Meðal þeirra hörðustu eru bankar, sparisjóðir, símafyrirtæki, tryggingarfélög og fleiri sem hafa lært þá tækni að best sé að hagnast með því að stela litlum upphæðum í hvert sinn af þúsundum viðskiptavina. Meðal vinsælla heita á þessum smáþjófnuðum eru afgreiðslugjald, þjónustugjald, eftirlitsgjald, seðilgjald, fit-kostnaður o.fl. sem mönnum hefur dottið í hug í sakleysislegum gjaldanöfnum. Enginn þessara viðskiptavina finnur nægilega mikið fyrir þjófnaðinum til að gera neitt í þessu upp á eigin spýtur. Fólk nöldrar svolítið hvert í sínu horni augnablik, en snýr sér svo að öðru.

Það er t.d. athyglisvert að bankarnir geti rukkað yfirdráttarvexti og fit-kostnað af síhringikortum. Ef kort er síhringikort á það hvorki að komast fram yfir inneign né heimild. Vandamálið er að bankarnir hafa heimilað sumum viðskiptavinum sínum að sleppa við hringingar (t.d. trúlega stórmarkaðirnir á álagstímum) og þar af leiðir að síhringikortin standa alls ekki undir nafni. 

Neytendasamtökin og neytendastofa ættu að vera fyrir löngu búnir að gera rannsókn á þessu ef það væri einhver bógur í þessum stofnunum.

Athugasemdir

[Ingi Geir Hreinsson, 7.9.2007 kl. 10:51]

Hjartanlega sammála!

[Sigurjón, 8.9.2007 kl. 00:37]

Vanafesti landans er ekki lagi lík.  Neytendasamtökin kjósa Jóhannes Gunnarsson aftur og aftur, þrátt fyrir að hann komi nokkrum sinnum í sjónvarpið, hrauni yfir bændur í landinu og sitji svo bara við tölvuna.  Hvernig ætlazt fólk til þess að neytendamál séu í lagi þegar þeir kjósa yfir sig þess háttar dauðyfli?  Þetta er sama sinfónían og með stjórnmálamennina; fólk kvartar og kveinar í 3 ár, 365 daga og svo þennan eina dag þegar það hefur raunverulega valdið, kýs það sömu leppalúðana yfir sig!  Fuss!  Ég ætla að flytja...

[Katrín Snæhólm Baldursdóttir, 8.9.2007 kl. 09:47]

Ég er flutt en samt fer þetta rosalega í taugarnar á mér..þþað er alls staðar svindlað ef því verður við komið. Og fólk lætur svindla á sér. Ef allir rifu bara kjadt yfir meðferðinni á sér og gæfu ekki tommu eftir yrðu fyrirtækin á endanum að bakka. En það mun ekki gerast. Við erum upp til hópa latir aumingjar sem stöndum ekki upp fyrir rétti okkar og virðingu.