Veiðiheimildirnar voru vanhugsuð fljótræðisgreiðasemi við einkavinina!

Það var flestum ljóst áður en Einar Guðfinnsson veitti Kristjáni Loftssyni heimild til hvalveiða að það væri glapræði á alla lund. Veiðiheimildin var í upphafi með óeðlilegt fyrirgreiðsluyfirbragð.

Íslendingar voru yfirleitt hættir að vilja borða þennan mat. Hvalkjöt var hvort eð er alltaf metið neðst af kjötmetinu hér áður fyrr. Kjötið þurfti forverkun til að losna við þráabragð sem skein síðan samt alltaf í gegnum alla matseld.

Það sem hins vegar styggir okkur íslendinga er að við þolum alls ekki að láta segja okkur fyrir verkum um það hvernig við förum með náttúruauðlindir okkar. Það er óskoraður réttur að veiða hvali ef okkur sýnist svo um það geri ég ekki ágreining og einnig er orðið nokkuð ljóst að hvalir eru langt í frá í nokkurri útrýmingarhættu. Þó að við hættum hvalveiðum þýðir ekki að við séum að beygja okkur fyrir rugluðum náttúruverndarsinnum.

Nú virðist næstum öllum ljóst að þessu er sjálfhætt af því að við bara étum þetta ekki lengur og fáum heldur ekki aðra til að gera það. Til hvers þá að veiða hval?

Ekki gefin út ný hvalveiðileyfi vegna markaðsaðstæðna

Athugasemdir

[Fannar frá Rifi, 24.8.2007 kl. 12:46]

Þú hefðir átt að smakka hrefnu grillkjötið sem selt var í tilbúnum pakkningum vel kryddað og gott. Tilbúið beint á grillið. Kjötið hreinlega bráðnaði í munni. Ég vil stórhveli á diskinn minn.

[Haukur Nikulásson, 24.8.2007 kl. 13:07]

Mín vegna má alveg veiða eina hrefnu handa þér Fannar, ég sé ekki neina ástæðu til að neita þér um uppáhaldsmatinn þinn!

[Sigurjón, 24.8.2007 kl. 13:50]

Skrýtið.  Ég vissi ekki betur en að hrefnan hafi selst upp, a.m.k. í flestum búðum...

[Óskar Þorkelsson, 24.8.2007 kl. 13:54]

Set svar mitt hér inn líka en hafði svarað joninc áðan um sama efni.

Hvalkjötsát landsmanna er stórlega ofmetið.. það veit ég eftir að hafa reynt á það sjálfur sem kjötstjóri í einni af betri kjötverslunum landsins.. 30 kg á mánuði kannski á meðan lærisneiðar fóru í 300 kg, kótilettur í 200 kg súpukjöt í 400 kg.. og þá er allt hitt eftir.. meira að segja folaldakjöt seldist miklu meira en hvalurinn. Oftast nær þurfti maður að henda því sem fram var borðið.. svo 30 kg sala á móti 10 kg rýrnun.. segir sig sjálft að þetta borgar sig ekki.

Óráðs-sía sjávarútvegsráðherra og greiðasemi sem hefur skaðað ímynd landsins

[Haraldur Haraldsson, 24.8.2007 kl. 14:17]

Þarna erum við ekki sammála Haukur við eigum að veiða Hvalin og læra aftur að borðan/þetta er besti matur/við gætum lika fætt hin sveltandi heim með þessu eru það ekki lika aðstoð við fátækan heim er það ekki betra en stirkja striðið i Irak/og viðar /Kveðja Halli gamli

[Haukur Nikulásson, 24.8.2007 kl. 14:55]

Ég er ekki viss um það Halli að náttúruverndarsinnar yrðu ánægðir með þá þróunaraðstoð sem fælist í ókeypis hvalkjöti.  Þó það sé bara vegna þess hversu framandi matur þetta er fyrir aðra en rúmlega miðaldra íslendinga.

Mér datt í hug að ef íslendingar þyrftu fæði útlendis frá sökum hungursneyðar að maurastappa að hætti frumbyggja á Amazon svæðinu myndi ekki fara ofan í okkur þótt svangir værum. Þar er maurastappa með því betra sem sumir þeirra fá og er víða hátíðarmatur (heimild: Fljótin falla í austur).

[Fannar frá Rifi, 24.8.2007 kl. 23:39]

"Þó það sé bara vegna þess hversu framandi matur þetta er fyrir aðra en rúmlega miðaldra íslendinga." þannig að það væri betra að gefa sveltandi fólki ekkert dýra prótein bara vegna fordóma vegna þess af hvaða skeppnu kjötið kemur???? nei er það nú full langt gengið. hvalir eru spendýr hafsins. bæði rándýr og grasbýtar. etum við ekki kinda og kúakjöt??? að vilja ekki borða kjöt af hvölum en borða af öðrum dýrum er hræsni.

[Haukur Nikulásson, 25.8.2007 kl. 00:05]

Fannar, ég hef sjálfur enga fordóma, ég er bara að ætla útlendingum það að vera svolítið sérvitrum í matarvali eins og okkur.

Þú mátt heldur ekki gleyma því að almennt séð eru orðinn 20-30 ár síðan hvalkjöt var almennt í boði hér á landi. Finnst þér í alvöru skrýtið að fólk hiki við að borða svona kjöt?

Sjálfur er ég 52 ára (á þessu ári) og var alinn á hvalkjöti í foreldrahúsum en keypti aldrei sjálfur eftir að ég fór að búa upp úr 1975, hafði enga löngun til þess. Ég sé ekki ástæðu til að finnast neitt athugavert við það að þú viljir fá að borða hvalkjöt en það er fullangt gengið hjá þér að kalla það hræsni að vilja ekki hvalkjöt. Hjá mér er það smekksatriði og hefur ekkert með dýrategundina að gera. Ég get, trúlega líkt og þú, lagt þessi dýr að jöfnu. Kjötið af þeim bragðast bara ekki eins.

[Óskar Þorkelsson, 26.8.2007 kl. 11:30]

einu sinni var fæðuskortur í póllandi eftir fall kommunismans, austurblokkin hafði sett einhverskonar boykott á pólland og vesturveldin versla bara við þá sem eiga peninga.. þá kom litla íslan viljugt til hjálpar og sló sér á brjóst til riddara í skínandi herklæðum frelsarans.. við ætluðum ða losa sambandið við rollufjall eitt mikið sem stóð einhverstaðar inni á fjölmörgum frystum norðan heiða.. KEA tók að sér vinnsluna og allir voru ánægðir. Íslendingar afar stoltir af framtakinu og voru miklar hetjur í eigin augum og sendu einhver 2-300 tonn af gömlu  íslensku ærkjöti skekklega niðursoðnu og eflaust verið vel merkt íslandi og rauða krossinum.. en gallinn á gjöf Njarðar var sá að pólverjar éta ekki ærkjöt, gamlar rollur og gáfu pólverjar þessa gjöf í skiptum fyrir svínakjöt frá Bulgaríu eða Rúmeníu.. sem segir okkur nákvæmlega hvað mundi gerast ef íslendingar tækju upp á þeim fjanda að gefa hvalkjöt í hjálparstarfsemi af góðseminni einni saman.  Sennilega heimskulegasta hugmynd sem komið hefur fram lengi.

tek það fram að ég ét hvalkjöt. Ég ætlast bara ekki til að allir geri það og reynsla mín segir mér einnig að afar fáair íslendingar éta þetta kjöt nema að þeir séu boðnir til veislu af einhverjum sérvitringum eins og mér sem enn éta þennan fjanda ;)

[Ævar Rafn Kjartansson, 27.8.2007 kl. 03:40]

Við þurfum ekkert að ræða það að hvalveiðar Íslendingar núna voru bara til þess að Kristján Loftsson styrktaraðili Sjálfstæðismanna fengi einhvern part peninga sinna til baka. En þegar hvalspik kostar 2000 kr. hér þá er maður ekki til í að sprikla með. +Eg styð hvalveiðar ef þær eru arðvænar en að kaupa hvalspik fyir 2000 kr. kg er kjánalegt. Seljum frekar náttúrulausum evrópubúum óveidda hvali.

[Sigurjón, 27.8.2007 kl. 21:13]

Þrátt fyrir þetta allt eru nokkur ár síðan við hófum veiðar í hval.  Fyrst í vísindaskyni og svo í fyrra í atvinnuskyni.

Háværar og pirrandi raddir voru allan tímann uppi um að þetta myndi skaða ferðaþjónustuna og bla bla bla...

Í dag er staðan sú að fjöldi ferðamanna er orðinn vandræðalega mikill hér og ekkert nema bjartsýni ríkir í atvinnulífinu.  Ég bíð enn eftir þessum skaða sem hvalveiðarnar áttu að valda. 

[Sigurjón, 27.8.2007 kl. 21:15]

,,...veiðar á hval" átti þetta að vera.