Voru allir Skagamennirnir úti á þekju samtímis?

Ég er hvorki áhangandi Skagamanna né Keflvíkinga svo það sé á hreinu.

Bjarni Guðjónsson átti að mínu mati sjálfur að taka af skarið og fara með boltann í eigið mark og ganga frá þessu máli strax. Hann er fyrirliði liðsins og átti að hafa næga reynslu til að gera það, en kaus að láta óánægju Keflvíkinga og föður sinn þjálfarann, koma í veg fyrir það og þess vegna gerðist hann sekur um stórfelldan dómgreindarbrest. Hann á svo sem ekki langt að sækja dómgreindarbrest, hann er sonur pabba síns, sem sjálfur forherðist í sömu vitleysunni á hliðarlínunni. Í útvarpsviðtali sem ég heyrði í dag birtist Guðjón manni sem óþverrakarakter af verstu sort. Synd að svona góðir knattspyrnumenn (og þjálfari) skuli hafa svona skelfilega óþverralegt innihald og sýna ekki nokkra iðrun í þessu máli sem hefur opinberað þá frammi fyrir alþjóð.

Þetta mál er subbulegur blettur á knattspyrnuna. Sem betur fer eru svona menn í minnihluta meðal knattspyrnuiðkenda. Við huggum okkur við það!

Mér þætti ekki óviðeigandi að KSÍ tæki málið fyrir. Það eru til fordæmi þess að sambandið taki upp mál er varðar svona óíþróttamannslega framkomu. 

Yfirlýsing frá ÍA

Athugasemdir

[Gísli Sigurðsson, 5.7.2007 kl. 21:45]

Ég sé reyndar ekki á hvaða forsendu KSÍ ætti að taka á málinu. Eins og málið er blásið upp í fjölmiðlum nú er Bjarni orðinn fórnarlamb í þessu máli og Keflvíkingar skúrkarnir. Ég viðurkenni að leikmenn Keflavíkur hlupu á sig og veiktu sinn málstað bæði í leiktímanum og ekki síður að leik loknum. Þannig að ef KSÍ tæki á málinu gæti það allt eins orðið á þeim nótum að Keflvíkingum yrði refsað og yfirlýsing gefin út að knattspyrnuforystunni þætti leitt hvernig málið varð til.

[Vilhjálmur Andri Kjartansson (IP-tala skráð) 5.7.2007 kl. 22:12]

Er ekki í lagi með menn hér? Reyna að koma þessu yfir á ÍA. Það er alveg ljóst að þetta var slysamark og viðbrögð keflvíkinga eru út í hött, svona haga menn sér ekki. Mér er alveg sama hvað saginn gerði eftir markið menn haga sér ekki svona í íþróttum. Keflvíkingar eiga að skammast sín fyrir þessa framkomu og það á að dæma þennan Einar örn í minnst 5 leikja bann fyrir stórhættulega tæklingu. Það geta ekki verið annað en siðleysingjar sem verja málstað keflavíkur.

[Grímur Kjartansson, 5.7.2007 kl. 22:26]

Það er komið nóg af stóru orðunum sem fréttamenn eru að æsa menn uppí
KSÍ - Geir ætti að koma á sáttafundi til að þessu ljúki

[Haukur Nikulásson, 5.7.2007 kl. 22:32]

Aðalatriðið stendur alltaf eftir hvað svo sem menn vilja segja um afleiðingarnar: Skagamenn skiluðu ekki þýfinu af því fórnarlambið reiddist og telja það bara réttlæta úrslitin.

Menn er ekki að hugsa um hvað orsakaði atburðarásina í upphafi, heldur vilja menn dæma út frá afleiðingunum og ruglinu í framhaldinu.

[Haukur Nikulásson, 5.7.2007 kl. 22:36]

Vilhjálmur, mér finnst það jafn óviðeigandi að þú kallir mig siðleysingja og það að ég myndi kalla þig hálfvita í lögfræðinámi. Ég bara leyfi mér það ekki.

[Rögnvaldur Hreiðarsson, 5.7.2007 kl. 22:43]

Veit ekki hvernig þú Vilhjálmur skilgreinir siðleysi. En það hefur ekkert með siðleysi að gera þó menn gangrýni það sem Bjarni og svo Guðjón gerðu. Framkoma keflvíkinga var án efa afleit en algerlega virðist sumum útilokað að sjá að hér skipta máli orsök og afleiðing.

Ekkert og alls ekkert getur losað skagamenn undan þeirri skömm sem þeir hafa sett á þetta gamla stórveldi sem við berum öll mikla virðingu fyrir. Og þá skiptir engu máli hversu mikið menn ætla að tala um keflavík í þessu samhengi. Keflavík þarf ekki að verja heiður skagamanna.

Það geta engir gert fyrir þá. Og þess vegna legg ég eindregið til að skagamenn hætti að tala um keflavík. Og geri það sem mörgum finnst að þeir þurfi að gera. Og það er að verja heiður sinn. Guðjón hefur reyndar fyrir löngu sýnt að honum er ekki annt um slíkt.

[Eyjólfur Kristinn Vilhjálmsson, 6.7.2007 kl. 00:29]

Ég er bara ekki alveg að sjá að þetta mark hafi verið slys.  Það voru að minnsta kosti 8004 aðrir möguleikar á að koma boltanum annað hvort á markmanninn eða hreinlega útaf án þess að skora mark.  Og afsökunarbeiðnin fannst mér frekar aum.  Það sést vel á upptökunni af þessu atviki að maðurinn lítur upp áður en hann skorar þetta glæsimark.  Hegðun Keflvíkingana er hinsvegar óafsakanleg þó að nokkuð ljóst sé að svona atvik reiti menn til reiði.  Svo er alltaf gaman að velta því fyrir sér hvað Gauji hefði gert EF þetta hefði gerst hinumegin á vellinum, karlinn hefði klikkast, það er nokkuð ljóst. 

[Vilhjálmur Andri Kjartansson (IP-tala skráð) 6.7.2007 kl. 02:01]

Auðvitað er það siðlaust að verja gjörðir keflvíkinga, hvað er það annað en siðleysi að senda mann inn á til að slasa leikmann skagamanna? Hvað voru leikmenn keflvíkinga að slá í Bjarna eftir markið? er það bara í lagi?

Rögnvaldur markið sem ÍA skoraði var að mínu mati slysamark en gefum okkur að svo sé ekki réttlætir það þá hegðun keflvíkinga? Er í lagi að slasa menn ef það koma upp ósættir með atriði í keppnum? Markið var löglegt en það má þó deila um ásetning Bjarna en hegðun Keflvíkinga er ekkert sem þarf að deila um, leikurinn er til á bandi

Haukur ég kallaði þig aldrei persónulega siðleysingja en ég tók fram að þeir sem verja málstað keflavíkur geta ekki verið annað en siðleysingjar. Það ver enginn heilbrigður maður lið sem vísvitandi reynir að slasa aðra leikmenn og gengur bersersgang inni í búningsklefa. Hvaða álit þú hefur á mér eða telur mig vera er fyrst og fremst þitt og verður alltaf þitt en segir lítið um mig.

[Haukur Nikulásson, 6.7.2007 kl. 09:20]

Vilhjálmur, þú trúir bara bullinu úr Guðjóni og lætur sem það sé sannleikur málsins og spinnur svo út frá því. Það gengur bara ekki. Guðjón á feril í alls kyns óknyttum ,jafnvel gagnvart syni sínum Bjarna Guðjónssyni. Hann veður yfir hann í þessu máli og strákurinn á greinilega bágt með að fylgja þessari línu. Það kom fram í máli Bjarna að hann vildi núlla út markið en kallinn hann Guðjón kom í veg fyrir það. Guðjón hefur ítrekað sýnt óheiðarleika og fautaskap, bæði innan sem utan vallar.

[Ægir Ármannsson (IP-tala skráð) 6.7.2007 kl. 11:33]

Sælir allir.

 Einkennilegt hvernig þessu máli er snúið, núna eru Keflvíkingar ljótu karlarnir, var nú reyndar ekki á leiknum en horfði á þetta í sjónvarpi og sannast sagna þykir mér þeta ekki stórmannleg framkoma af hendi skagamanna.

 Við getum haft okkar skoðanir á ví sem á eftir fór en mín skoðun er að viðbröggð Keflvíkinga eru skiljanleg og þá serstaklega eftir að Keflvíkingum var ljóst að skagamenn ætluðu ekki að gefa mark.

Eitt atriði sem ekki hefur verið rætt um að í sjónvarpsútsending sést að Guðjón er að kalla á Keflvíkinginn sem er með boltann þegar skagamaðurinn liggur á vellinum og maður getur rétt ímyndað sér hvað hann var að biðja um þ.e. að sparka boltanum útaf. Ef það er rétt og gaman væri að fá það staðfest þá vakna aðrar spurningar sem menn verða að hugsa um.

 Kveðjur

[ÓÁS (IP-tala skráð) 6.7.2007 kl. 13:45]

 

Eftir að hafa horft á leikinn,viðbrögð Bjarna,Viðbrögð Keflvíkinga,og viðbrögð forráðamanna beggja liða þá er ekki hægt að segja annað en,það er sama hvað þið vælið,það er leyfilegt að skora svona og ekki við Bjarna Guðjónsson að sakast að það megi.

Hins vegar má velta fyrir sér viðbrögðum forráðamanna Keflavíkur sem breyða yfir að  ráðist var á Bjarna líkamlega og andlega og óumdeilanlegt að leikmaður keflavíkur reyndi með óyggjandi hætti að meiða hann en fékk rautt spjald fyrir,ég held hvorki með ÍA eða Keflavík og finnst fótbolti á Íslandi með eindæmum lélegur,en hverju töpuðu Keflvíkingar ? fyrst og fremst mannorði sínu í íþróttum,enginn vafi að Bjarni biðst afsökunar,en það nægir ekki keflvíkingum,enginn vafi að viðbrögð Bjarna voru að gefa Keflavík mark,en Bjarni er ekki guð almáttugur og maður gefur ekki villidýri sem ræðst á mann verðlaun svo keflvíkingar ættu að líta í eigin barm og það er hætt við að glerhúsið sem þið búið í brotni yfir ykkur...............annars er þetta búið og gert og ekki hægt að taka gerðan hlut til baka,en hægt að snúa sér að því að þetta eigi sér ekki stað aftur !!!! enginn hefur leyst það. Kannski væri best að félögin stæðu að því að setja á óskrifaðar eða skrifaðar reglur um að boltinn ætti að spilast í innkast aftur í svona tilvikum. En sirkusinn vill athygli að hverju brosir keflvíkingurinn sem fékk rautt spjald fyrir glórulausa tæklingu á Bjarna þegar hann labbar með hliðarlínunni eftir að hafa verið rekinn útaf ? líklega stoltur af að hafa verið skipt inná og rekinn útaf stuttu síðar ? Margt sem keflvíkingar mættu huga að í eigin liði leysir ekki þeirra mál að leysa vandamál annarra.

[Ingvar Valgeirsson, 6.7.2007 kl. 15:04]

Það sem mér finnst helst siðlaust í þessu máli hlýtur að vera það að þessi boltavitleysa öll sé styrkt með opinberu fé, beint úr vösum okkar skattborgaranna. Ef fullorðið fólk vill endilega hlaupa um hálfbert, eltandi leðurskjóðu fulla af lofti, á það að gera það á eigin kostnað - og reyna svo að haga sér siðsamlega á eftir, ekki væla eins og smákrakkar út af því að "hinn" gerði eitthvað sem hann mátti ekki.

Hananú!

[Anton Þór Harðarson, 6.7.2007 kl. 18:09]

Sammála Ingvari

En Var eittvað ólöglegt við þetta mark, voru einhverjar reglur um leikinn brotnar.