Hróp og köll fyrir kosningar - Hvísl og pukur eftir kosningar

Það hefur verið fróðlegt að fylgjast með því hvernig umræðan í pólitíkinni breytist eftir kosningarnar. Stóru orðin og hrópin fyrir kosningarnar eru orðin að smá tísti og hvísli eftir kosningar. Sérstaklega er þetta áberandi hjá nýja stjórnarflokknum sem í einu vetfangi breytist úr kjaftforum mótmælendum með hnefa á lofti í skaplaust smáfólk með litla og lokaða munna vegna nýfengins aðgangs að stjórnkerfinu.

Öll stóru orð Samfylkingarinnar dóu í samningum um ríkisstjórnarþátttöku. Þau seldu allan pakkann eins og hann lagði sig. Við höfum á örfáum dögum séð allt deyja.

Íraksstríðið: Engar aðgerðir, pínulítið mjálm sem hefur enga þýðingu.

Varnarmálin: Áfram leitað að stórveldum til að halda í höndina á. Framboðsvitleysan til öryggisráðs SÞ heldur áfram með öllum þeim kostnaði sem henni fylgir.

Utanríkismálin: Taka þarf upp stjórnmálasambönd við helst allar þjóðir, jafnvel þó engin samskipti séu við viðkomandi. Til hvers er það nema til að auka útgjöld? 

Stóriðjustefnan: Allt á fullu. Upplýst um smánarverð á raforkunni til alframleiðenda, niðurgreitt af almenningi í landinu.

Fiskveiðistjórnunarkerfið: Engar breytingar sjáanlegar í nánustu framtíð. LÍU-mennirnir eiga þetta allt saman og það verður fest í lögum. Sjávarbyggðirnar má hreinlega fara að leggja niður í stað þess að horfa upp á þetta hæga og kvalafulla dauðastríð þeirra.

Til að bæta gráu ofan á svart eru 200.000 króna launahækkun á mánuði til handa seðlabankastjórum látin óátalin. Líklega bónusgreiðsla fyrir að takast að halda upp hæstu okurvöxtum í heimi. Miðað við orð höfð eftir Tómasi Árnasyni er starf seðlabankastjóra með letilegustu störfum sem um getur. Eru menn búnir að gleyma því þegar Davíð Oddsson lýsti því í sjónvarpi að síminn hringdi bara næstum ekkert á skrifstofunni hans í Seðlabankanum?

Ég hef verið spurður hvort ég hafi ekki verið ánægður með úrslit kosninganna? Hvað haldið þið? 

 

 

Athugasemdir

[Haraldur Haraldsson, 7.6.2007 kl. 15:13]

Haukur eigum við ekki að gefa þessu aðeins meiri tíma,en það er margt mjög satt sem þú segir þarna ,en skoðum málið betur,gefum þeim aðeins frið,en svo tökum við á þessu ef ekkert gengur eftir/Halli Gamli

[Ásthildur Cesil Þórðardóttir, 7.6.2007 kl. 15:30]

ÉG held að tímin lagi ekkert hér.  Mér finnst Haukur fara nokkuð nærri því sem ég hef verið að hugsa.

[Ingvar Valgeirsson, 7.6.2007 kl. 15:37]

Bíddu - hvað kaustu aftur?

[Haukur Nikulásson, 7.6.2007 kl. 23:03]

Ingvar, ég veit þú trúir því ekki en mér finnst það notalegt að hafa öðru hvoru rangt fyrir mér. Ég yrði óþolandi með öllu ef svo væri ekki

[Svartinaggur, 9.6.2007 kl. 21:34]

Er þá nokkuð annað eftir en að flytja til útlanda áður en þjóðarskútan sekkur alveg?