Bandaríkjamenn halda áfram að ögra heimsfriði sem fulltrúi "alþjóðasamfélagsins"

Oft hefur verið sagt að ekki sé rétt að kasta grjóti úr glerhúsi.

Það sem einum er leyft er öðrum bannað. Bandaríkjamenn, Rússar, Bretar, Frakkar, Pakistanar, Indverjar og trúlega Ísraelsmenn ráða allir yfir kjarnavopnum. Þessum vopnum þarf öllum að eyða til að við getum verið róleg. Á meðan þessi vopn eru til ógna þau tilveru okkar.

Það er hins vegar ekki trúlegt að þjóð, sem er ein allra sek um að nota þessi vopn á almenna borgara, skuli hóta öðrum sem eru þó fyrst og fremst að koma upp orkuframleiðslu. Áróðurinn sem bandaríkjamenn beita þessa daga er óhuggulega skyldur þeim ögrunum sem nasistarnir beittu gagnvart pólverjum við upphaf seinni heimsstyrjaldarinnar. 

Bandaríkin bregðast ókvæða við kjarnorkuyfirlýsingu Írana

Athugasemdir

[Ingvar Valgeirsson, 10.4.2007 kl. 08:37]

Það kemur kannski til af því að lýðræðislega kjörinn forseti Írans hefur sagt að það sé á stefnuskrá hans að eyða vissu nágrannaríki sínu, sem og hefur komið fram að Íran hefur útvegað hryðjuverkasamtökum eldflaugar og önnur vopn.

En samt skrýtið, þar sem kjarnorka er jú að mörgu leyti veglegri kostur til orkuramleiðslu en kol, gas eða olia.

[Haukur Nikulásson, 10.4.2007 kl. 08:52]

Þú þarft ekki að fara langt eftir hótunum foringja hins frjálsa heims sem talaði um "öxulveldi hins illa". Það sem er vont í þessu eru þessar sífelldu gagnkvæmu ögranir sem á endanum geta farið úr böndum. Bush er raunveruleg ógn við Írani, hann er jú BÚINN að taka Írak.

[Ásthildur Cesil Þórðardóttir, 10.4.2007 kl. 11:18]

Góð samlíking hjá þér með glerhúsið.  Og þarna er ég alveg sammála þér, hræsnin ríður ekki við einteyming.