Kaupið varlega í útlöndum - Reynslusaga frá Tenerife

Nú er maður kominn heim úr 10 daga ferð til Tenerife, sem var skemmtileg, nærandi og eftirminnileg.

Einnig fékk maður ókeypis námskeið. Námskeiðið var í verslun. Nokkuð sem ég hélt að ég væri sérfræðingur í, en fékk samt óvænta skólun sem ég ætla að lýsa fyrir ykkur. Kannski getið þið nýtt þessa reynslu til að forðast óprúttna sölumenn á sólarströndum.

Þegar rölt er um ströndina á Playa de Americas eru búðirnar og veitingahúsin að skipta með sér athygli þinni. Sölumenn bæði veitingahúsa sem verslana standa á gangstígnum og reyna að draga þig inn. Harðastir allra eru indverjarnir með raftækjabúðirnar. Sem tækjadellukall leyfði ég mér að skoða stafrænar videotökuvélar og í augnabliks andvaraleysi var ég teymdur inn í eina slíka búð. Tilboðið hljómaði mjög vel €180 fyrir Sony DCR-SR40 videotökuvél (listaverð nálægt $990 vissi ég síðar). Ég vissi reyndar ekki hvað væri eðlilegt verð en uppsöfnuð vitneskja sagði mér að þetta væri þess virði að skoða. Um leið og ég ætlaði að ganga frá kaupunum hóf sölumaðurinn að sýna mér aðrar "nýjar" vélar og var sérstaklega umhugað að fá mig til að kaupa glænýtt módel af minni og handhægari vél með hærri pixlafjölda. Pixlafjöldinn væri jú aðalatriðið við kaup á slíkri vél (það er reyndar bara eitt af mörgum atriðum sem menn athuga). Hann tengdi vélarnar við sjónvarp og það fór ekki á milli mála að myndin á sjónvarpsskjánum var "nýju" vélinni í hag (hann hagræddi bara birtustigi til að villa um). Brátt voru þeir orðnir tveir að ólmast við að fá mig til að kaupa þessa nýju vél í stað Sony vélarinnar og beittu ýmsum brögðum eins og þeim að reyna að sannfæra mig um að konan myndi örugglega vilja handleika minni og flottar vél, hvort ég ætlaði virkilega að kaupa eitthvað sem konunni líkaði ekki, hvort ég ætlaði ekki að kaupa HD ready tökuvél og fleira sem var farið að hljóma eins og að verið væri að tefja fyrir því að ég keypti vélina sem ég var að skoða. Að endingu var þrefið við þá um verð á "nýju" vélinni farið að fara í taugarnar á mér og um það bil sem ég var að gefa eftir í baráttunni við þessa tvo útsmognu sölumenn kíkti ég á nafn framleiðandans og sá að það var ekkert sem var þekkt í þessum bransa: Sharpixel. Þegar ég benti þeim á að þetta væri óþekktur framleiðandi fullyrtu þeir að þetta væri Sharp. Ég sagðist ekki treysta þessu og vildi ganga frá upphaflegum kaupum, en þá drógu þeir skyndilega í land og sögðu að vélin væri ekki til og þeir yrðu að halda "sýningareintakinu" hjá sér. Það yrði að panta hana og það tæki nokkra daga. Ég ákvað þá að hætta við og fór eftir að við höfðum rifið VISA miða sem átti bara eftir að strauja. Sem sagt engin viðskipti fóru fram.

Þegar ég sagði öðrum frá þessu var mér bent á að ég hefði verið hársbreidd frá því að kaupa ódýra  MP4 tökuvél á fjórföldu verði. Ég hefði aldrei verið látinn fá Sony vélina, hún væri bara beita til að plata þig inn til að kaupa ónýtt dót á uppsprengdu verði.

Það hafa margir gert góð kaup í vélum á Kanaríeyjum. En miðað við mína reynslu þá hafa örugglega margir verið teknir í görnina með plati af því tagi sem reynt var á mér. Yfirleitt skammast menn sín fyrir að hafa verið plataðir og þegja þess vegna yfir því.

Sem betur fer slapp ég með skrekkinn, fylgist samt vandlega með því að ekki komi skrýtin VISA færsla frá þessum náungum því þeir skrifuðu hjá sér VISA númerið og fengu undirskriftarsýnishorn að sögn vegna ábyrgðarmála. Eftir að heim kom sá ég að upplýsingar sem Sumarferðir höfðu dreift (og ég EKKI lesið) bentu á þessar aðferðir óprúttinna kaupmanna. Þeir eru ótrúlega þolinmóðir að veiða þig í netið sitt og skjalla þig upp úr skónum á meðan.

Ég vil því nota þetta tækifæri og benda fólki á að kaupa þessi tæki af þekkingu og vita hvað þau kosta áður en farið er, helst alveg niður á módelnúmer viðkomandi tækis og kaupa bara frá framleiðendum sem eru þekktir. Notið ekki kreditkort, heldur einungis reiðufé.