Eðlislægur kynjamunur hindrar að kynjajafnrétti verði að veruleika

Ég get nú ekki lengur orða bundist í umræðunni um kynjajafnréttið. Í eltingaleiknum um atkvæðin eru stjórnmálamenn farnir að missa sig í ímyndaðri pólitískri rétthugsun og ég leyfi mér að fullyrða að það er falskur tónn í frumvarpinu sem ætlað er að binda í lög fjölda kvenna í stjórnum fyrirtækja og stofnana. Hér er verið að lögfesta stjórnarsetu sem byggir á fremur kynferði viðkomandi en EKKI hæfileikum. Hér er rökleysa á ferðinni í lagasetningunni.

Eltingarleikurinn við kynjajafnréttið er dæmdur til að mistakast nema til komi grundvallarbreyting. Hún er falin í því að líffræðilegum mun karla og kvenna verði eytt með öllu. Til þess þarf að sjá til þess að enginn munur verði í fyrsta lagi á líkamsburðum og í öðru lagi á heilastarfsemi. Líklega er einn stærsti  þátturinn sá að karlmenn eru með meira vaxtahormón og testosterón sem valda því að þeir eru öllu jöfnu meiri að líkamsburðum og grimmari andlega. Báðir þessir þættir valda því að að þeir olnboga sig framfyrir konur, jafnvel með ósanngjörnum og óskammfeilnum hætti.

Ég tel vænlegri leið til árangurs að fólk átti sig á þessum eðlismun kynjanna og vinni að málunum frá þeim vinkli að ALLAR manneskjur fái notið sín eins vel og hægt er miðað við líkamlegt og andlegt atgervi sitt. Kröfur um ójafnrétti konum til handa er nú komið út í fáránlegar birtingarmyndir sem ég tel að vinni jafnvel gegn stöðu þeirra. Konur eru jafnfærar til allra sömu starfa og karlmenn, þær eru bara af almennum líffræðilegum ástæðum bara færri en karlarnir að sækjast eftir frama innan stjórnmála og fyrirtækja. Það er nú þegar búið að tryggja jafnrétti með lögum og það er því með öllu rangt að ganga lengra í þeim efnum.

Lögfræðilegt ofbeldi í gegnum Alþingi bætir ekkert í þessu efni og er til þess fallið að vekja andúð á annars góðum málstað kvenna.

Athugasemdir

[Matthildur Ágústa Helgadóttir Jónudóttir, 9.3.2007 kl. 15:43]

Er munur á heilastarfsemi karla og kvenna?  

[Haukur Nikulásson, 9.3.2007 kl. 16:05]

Af hverju er fleiri karlar í fangelsi en konur?

Af hverju fer miklu færri sögum af því að eiginkonur berji mennina sína en öfugt?

Ef hverju eru ekki fleiri konur t.d. skákmeistarar? 

Ég get farið endalaust í spurningar af þessu tagi. Ég held að við hljótum að samþykkja mun á heilastarfseminni eða hvað? 

[Ólafur Als, 9.3.2007 kl. 17:54]

Sæll Haukur,

án þess að ég elti ólar við staðfestan eða ímyndaðan mun á körlum og konum stendur upp úr að við kjósum, eða öllu heldur leitumst eftir jöfnum tækifærum öllum mönnum til handa. Þeir sem ekki geta tekið eðlilegan þátt í lífsins leik réttum við hjálparhönd. Ef sumar konur telja að fortíðin (siðvenjur o.fl.) hamli framgangi þeirra er takandi undir sjónarmið sem fela í sér stuðning en aldrei að ganga svo langt að beinlínis skerða annars manns rétt. Þessi sjónarmið kalla ég frjálslynd og tel þau reyndar að mestu runnin undan rifjum frjálshyggjumanna, fyrr og nú, en sjálfsagt að fleiri tileinki sér þau.

Í þeim efnum er vert að taka fram að þrátt fyrir að þú kallir þig jafnaðarmann sýnist mér fjölmörg baráttumál þín afar frjálslynd og borgaraleg og enn önnur sem fengin úr smiðju frjálshyggjunnar - en það er nú önnur saga og við getum spjallað um það síðar.

[Haukur Nikulásson, 9.3.2007 kl. 18:05]

Ég er nú að mestu sammála þér Ólafur. Ég ætla ekki að reyna að fikta í þeirri hugmyndafræði hvenær ég telst jafnaðarmaður, frjálslyndur eða frjálshyggjumaður. Eitthvert próf sem ég prófaði á netinu sagði að lokinni spurningahrinu að ég væri 85% frjálslyndur jafnaðarmaður ("liberal democrat"). Ég get svo sem alveg samþykkt það en finnst stundum að þessir pólitísku stimplar séu nú kannski ekki alveg til þess fallnir að segja til um það í öllum málum.

Stundum finnst mér að konur hafi svo margt fram yfir okkur karlana að við ættum í rauninni að vera meira en þær að nöldra. Þær eru fallegri, lifa lengur, eignast börnin, eru blíðlyndari (þar af leiðandi betri mannskepna) og ótal fleiri atriði sem sjálfsagt allir meira og minna vita. Þess vegna finnst mér krafan um kynjajafnræði bara aldrei ganga upp til fulls. Við getum gert okkar besta til að tryggja þeim jafna stöðu til lífs, náms og starfa og reynt að passa upp á að karlremban troði þeim ekki um tær. Þegar þetta er tryggt verða þær sjálfar að standa sig líkt og karlarnir. 

[Ólafur Als, 9.3.2007 kl. 18:34]

- ég hef nú stundum sagt, meira til gamans, að eins gott að konur uppgötvi ekki yfirburði sína gagnvart okkur körlunum...

[Púkinn, 9.3.2007 kl. 18:56]

Púkinn vísar í það sem hann sagði um svipað efni hér.  Hvers vegna sækja konur jafnt og karlar í þau láglaunastörf sem Púkinn býður, en aðeins karlar um hálaunastörfin?