Eru bankarnir enn að taka stöðu gegn krónunni?

Sumir velta fyrir sér þeirri spurningu hvers vegna gengi krónunnar hækki ekki þrátt fyrir hagstæðan vöruskiptajöfnuð mánuð eftir mánuð?

Sumir velta jafnvel fyrir sér af hverju talað er um að bankarnir séu núna bólgnir af gjaldeyri sem geymdur er á erlendum reikningum en skili sér ekki heim og sé skipt í krónur?

Sumir velta fyrir sér, eftir að útflytjendum hafi verið hótað öllu illu ef þeir ekki skiluðu gjaldeyrinum, að það eina sem hafi tekið við sé að bankarnir sitji á þessu sjálfir núna og séu þess vegna að taka stöðu gegn krónunni?

Hvernig má það vera að veruleg haftastefna í gjaldeyri og hagstæður vöruskiptajöfnuður megni alls ekki að hafa jákvæð áhrif á gengið?

Er það virikilega orðin staðan að ríkið (sem á jú alla bankana) hafi svo litla trú á krónunni að í raun sé búið að afskrifa hana án þess að láta nokkurn kjaft vita af því?

Er ekki kominn tími til að einhver fari að segja sannleikann um gjaldeyrisviðskipti banka og stórfyrirtækja?

Athugasemdir

[Lúðvík Júlíusson, 5.9.2009 kl. 09:22]

Viðskiptajöfnuður er neikvæður um ca 10 milljarða þegar búið er að taka áhrif vegna gömlu bankana út. Samkvæmt þessu er krónan enn of sterk og ætti að lækka meira.

Það er ekki nóg að afgangur sé að vöruskiptajöfnuði, það verður að vera afgangur af viðskiptum við útlönd.

[Haukur Nikulásson, 5.9.2009 kl. 09:44]

Lúðvík, hvernig færðu út "áhrif vegna gömlu bankanna"?

[Lúðvík Júlíusson, 5.9.2009 kl. 11:30]

Sæll Haukur,

hér er linkur í frétt Seðlabankans.  Hún lýsir vel stöðu þjóðarbúsins.

[Haukur Nikulásson, 5.9.2009 kl. 19:39]

Lúðvík, þetta á ekki að hafa áhrif því um er að ræða að mestu áfallna vexti á skuldir gömlu bankanna sem eru í greiðslustöðvun og það eru engir fjármunir að fara úr landi þess vegna. Viðskiptajöfnuður sem er neikvæður vegna gömlu bankanna er tómt mál að tala um í sambandi við eðlilega gengisþróun.

[Lúðvík Júlíusson, 5.9.2009 kl. 19:49]

Í frétt Seðlabankans segir:
"Reiknuð gjöld gömlu bankanna námu 63,5 ma.kr. og tekjur 27,8 ma.kr. og eru því neikvæð áhrif á þáttatekjujöfnuð vegna þeirra um 35,7 ma.kr. Þáttatekjujöfnuður án áhrifa gömlu bankanna var því neikvæður um 35,9 ma.kr. og viðskiptajöfnuður neikvæður um 10,3 ma.kr."

Viðskiptajöfnuður án áhrifa gömlu bankanna er neikvæður um 10,3 milljarða.  Þessir peningar eru að fara úr landi, þetta eru auknar skuldir þjóðarbúsins, auka vaxtagreiðslur og lækka gengi krónunnar enn frekar.  Þess vegna getur krónan ekki styrkst og ætti að lækka.