Þetta eru helstu stærðir bankahrunsins

Um síðustu áramót var eigið fé bankanna þriggja skv. þeirra reikningum 710 milljarðar.  Eignir voru 11.352 milljarðar og skuldir 10.642. Meðal skulda eru innlend og erlend innlán upp á 3.527 milljarða.

Við gjaldþrot skreppur eignaliðurinn saman og það lítur út fyrir að eignir upp á 11.352 geti fallið niður í 10-15% af bókfærðu verði, þetta er kallað stundum hrakvirði. Það þýðir að gjaldþrotið sem við blasir sé hugsanlega upp á 9.000 milljarða króna m.v. áramótin 2007-8. Til að ala ekki á of mikilli svartsýni ætla ég ekki að uppfæra þessar tölur eða gengi til dagsins í dag.

Þessi upphæð er 28 milljónir á hvert mannsbarn í landinu, þar með talið eru börn, gamalmenni og öryrkjar. Innlánin sem ríkið þarf að semja um eða ábyrgjast geta numið allt að 11 milljónum á hvert mannsbarn í landinu. Um þetta er verið að semja við fjárhagssendinefndir breta og hollendinga.

Hafi einhver trúað því að botninn sé kominn aðeins þremur vikum eftir bankahrunið má hinn sami búa sig undir vonbrigði. Staða þjóðarinnar er núna sú að við eigum að vera þakklát fyrir máltíð og húsaskjól.

Það má með sanni segja að nú þurfi að hefja nýja þjóðfélagsskipan sem byrjar ekki bara á núlli, heldur í stórum mínus.

Hafi einhvern tíma verið þörf á krafti og samstöðu þá er það núna.

Bankastjórarnir með of há laun

Athugasemdir

[Thee, 23.10.2008 kl. 12:05]

Þetta er einmitt það sem maður óttast.

[Haukur Nikulásson, 23.10.2008 kl. 13:48]

Ég kíkti aðeins á 6 mánaða uppgjör bankanna og þá eru innlánin orðin 4.174 milljarðar í bókum þeirra (voru 3.527) þetta er 18% hækkun á sex mánuðum. Hlutfall erlendra og innlendra innlána verður ekki ráðið af ársreikningunum.

Alla ársreikninga og árshlutareikninga gömlu bankanna má ennþá finna á vefjum nýju bankanna, eins og það komi "nýju" bönkunum eitthvað við

[Ævar Rafn Kjartansson, 23.10.2008 kl. 17:23]

Þetta er svo absúrd að maður er enn í afneitun eða heiladauður út af þessu!

[Ágúst H Bjarnason, 24.10.2008 kl. 14:42]

Takk fyrir að setja þetta fram þannig að allir skilji.

11 miljónir á hvert mannsbarn er 44 milljónir á hverja 4-manna fjölskyldu.

Ég er með þá tilllögu að útrásarmennirnir og eignamennirnir komi til hjálpar og greiði í landssjóð 99% af eignum sínum en haldi eftir 1%.  Þeir sem eiga t.d. 100 milljarða greiða 99 milljarða en mega í sárabætur halda eftir 1 milljarði. Þeir hlytu að vera hæstánægðir með það.  Hvað skyldi mikið geta safnast á þennan hátt?

[Haukur Nikulásson, 24.10.2008 kl. 16:26]

Ekki veit ég hvernig hægt er að krefjast þess að auðmennirnir komi með sitt til baka. Mig grunar að þeir muni kenna Davíð og ríkisstjórninni um það að hafa fellt spilaborgina sem þeir svo sem réttilega gerðu óháð því að þetta var allt á brauðfótum.

Uppgjör þessara mála verður með þeim hætti að það munu allir vísifingur stefna í allar áttir og allir neita ábyrgðinni. Býstu við einhverju öðru?

Við fáum enga friðþægingu. Við bara borgum í formi hærri skatta og lífskjararýrnunar.

Í næstu kosningum verður svo sama liðið kosið upp á nýtt. Gullfiskaminni kjósenda mun ekki bregðast frekar en fyrri daginn. Sjáðu bara til.

[Ágúst H Bjarnason, 24.10.2008 kl. 16:39]

Auðvitað er þetta bara óskhyggja hjá mér, en þeir yrðu menn að meiru ef þeir kæmu með mestan hluta af sínu. Kannski líður þeim bara vel núna hvar sem þeir annars fela sig. Kannski alveg samviskulausir....  Kæmi það svo sem ekki mjög á óvart.

Svo mega auðmennirnir íhuga þetta.

[Haukur Nikulásson, 24.10.2008 kl. 17:48]

Ég held að það sé borin von til þess að þeir taki nokkuð til sín í þessu efni. Mér heyrist andinn vera sá að þeir séu bara fórnarlömb vondra ákvarðana hér heima fyrir og geta fært fyrir því sterk rök.

Peningafíkn er eins og áfengisfíkn. Á meðan hún er virk getum við ekki búist við að þeir afhendi peningana sína frekar en bytturnar láti áfengið af hendi.

[Rakel Sigurgeirsdóttir, 25.10.2008 kl. 13:29]

Góður punktur þessi samlíking þín á peningafíkn og áfengisfíkn. Það skuggalegasta í þessu samhengi er þó hvað stjórnvöld eru illa haldin af meðvirkninni. Tek undir það sem hefur komið fram, m.a. hjá Jóni Baldvini, að þjóðin þarf á vinveittri en erlendri rannsóknarnefnd að halda til að fara rækilega ofan í kjölinn á þessum klíkubandalögum stjórmála- og athafnamanna. Það þarf að fá það á hreint hvort og/eða hvernig þessi innbyrðis hagsmunatengsl hafa komið niður á þjóðinni.