Sunrise - Uriah Heep á tónleikum í Japan 1973

1973 var ég tiltölulega nýkominn með bílpróf og farinn að fara á rúntinn með nýja Sony bílsegulbandið mitt í gamla en nýuppgerða rauða '59 Voffanum mínum. Þetta var eitt fyrsta kassettubandið sem gat spilað báðum megin þ.e. hafði Auto-Reverse. Þetta hljómar kjánalega nú en var ótrúlega flott á þessum tíma. Ég var nefnilega talsvert öfundaður af þessu tæki. Ég er nokkurn veginn viss um að 70% af spilatímanum í bílnum hafi verið undirlagt af uppáhaldshljómsveit minni á þessum tíma: Uriah Heep. Þeir áttu mjög góðan tíma þegar þeir gáfu út plöturnar Demons & Wizards og Magicians Birthday.

Hér eru þeir með sína bestu liðsuppstillingu á tónleikum í Japan: David Byron, Ken Hensley, Mick Box, Gary Thain og Lee Kerslake. Lagið er Sunrise. 

 

Athugasemdir

[Magnús Geir Guðmundsson, 12.8.2008 kl. 20:28]

Gaman að lesa þessa endurminningu þína Haukur, á sjálfur tvo bræður á þínum aldri og annar eignaðist einmitt svona tæki í bílinn sinn og AUÐVITAÐ voru Heep þar í aðalhlutverki auk Purple, Nazareth, Slade m.a. ÉG var nú bara pottormur þarna fyrir 35 árum, en lengi býr að fyrstu gerð, eins og þar stendur, hlaut auðvitað glæsilegt tónlistarlegt uppeldi hjá þeim að hlusta á þessa og marga aðra snillinga, Zeppelin, Bítlana, Presley, BTO og margamarga fleiri. Heep skipa enn sérstakan sess og þá ekki síst þessar tvær plötur þó margar fleiri séu fínar líka.(fyrstu plöturnar Very 'eavy, very 'Umble og Look At Your Self gefa D&W og MB lítið eftir, þó sú fyrsta sé öðruvísi en það sem á eftir kom. En svo er þarna á milli Sailsbury minnir mig, sem líka er þokkaleg)

[Haukur Nikulásson, 12.8.2008 kl. 20:44]

Ég átti þessar plötur allar á kassettum, Magnús, tvær plötur hefðu aldrei nægt í 70 prósentin ella. Allt hitt sem þú nefnir fékk líka pláss á kassettum í bílnum. Í þá daga keyptu menn vinylplötur og þær voru bara spilaðar í kassettuupptökur og svo lagðar til hliðar.

[Magnús Geir Guðmundsson, 17.8.2008 kl. 19:29]

Já, held að þessir tveir bræður mínir hafi ekki keypt sér spilara fyrr en seinna,kringum '75 kannski eða síðar, kassetturnar réðu ferðinni lengi vel Elsti bróðir okkar, mun eldri en hinir tveir, var hins vegar snemma bæði búin að kaupa spilara og kassettutæki miklu fyrr, vel fyrir '70! Hann enda af Bítlakynslóðinni og á t.d. allar Bítlaplöturnar vandlega varðveittar í upprunaútgáfum!