...og hverjar eru skuldirnar?

Hvernig væri svolítil alvöru blaðamennska hér? Hverjar eru skuldir bankanna? Hver er þá hrein eign þeirra? Hvernig er samsetning eignasafnsins?

Er ekki kominn tími til að blaðamenn geri eitthvað annað en að éta upp, alveg óbreytt, forsoðnar tilkynningarnar frá fjármálafyrirtækjunum? 

VIÐBÓT:

Úr því ég spurði um skuldirnar ákvað ég að leita að svörum í uppgjörum bankanna þar sem þau er að finna á netinu.

Heildareignir bankanna þriggja eru 9502 milljarðar. Heildarskuldir eru 8833 milljarðar. Þetta gerir 669 milljarða í bókfærðu eigið fé sem er að meðaltali tæplega 7.6%. Hæst er bókfært eiginfjárhlutfall Kaupþings (7.9%) og lægst hjá Glitni (6.9%) en Landsbankinn er þar á milli með 7.6%.

Ég kíkti á sambærilegar tölur hjá Den Danske Bank og sé að þeir standa verr í þessu sambandi en íslensku bankarnir. Þeir eru með aðeins 3.3% eiginfjárhlutfall í samanburði. Danske Bank stóð fyrir rógsherferðinni á hendur íslenska efnahagsundrinu (sem kannski var meira sönn en menn kærðu sig um að vita) en voru sjálfir að kasta grjóti úr glerhúsi á sama tíma.

Ég tel eins og áður að ekki megi mikið bregða útaf í hlutabréfamarkaði og gengismálum til að ekki fari illa fyrir íslensku bönkunum. Á meðan bjartsýnin ríkir standa þeir vel en um leið og hún dvín getur farið illa.

Ímyndið ykkur 200 kílóa suomoglímukappa á pinnahælum í fyrsta skipti. Á meðan hann hreyfir sig ekki er hann stöðugur og virkar ógnarsterkur, en er trúlega á hausnum um leið og hann hreyfir sig.

Samanlagður hagnaður viðskiptabankanna 89,6 milljarðar króna

Athugasemdir

[Bjarni Kjartansson, 1.8.2007 kl. 09:48]

Veit um fréttamann, sem hefur verið að reyna að komast að hinum ýmsu málefnum tengdum þessu stórskrýtna ,,HAGKERFI" okkar.

Þar ríkir algerlega og nánast ómeðvitað samsæri þagnarinnar.

EF einhver sem er málsmetandi, tjáir sig um málefnin, líkt og Ragnar Önundason gerði, er nánast kominn tappi uppí alla sem vita og kunna trikkin.

Spurning:

Hvað er á bakvið svonefnd ,,Krónubréf"? 

Eru það ,,eignir" bankana?

Hverjar eru ,,eignir" banka?

Eru það skuldir Heimilanna hérlendis?

Semsagt brauðstritarar landsins.

Ekkert fæst upp um það og eftirlitið með bönkunum er í algerri Skötumynd.

Samkvæmt Bankalögum er fjármálastofnunum ÓHEIMILT að eiga fasteignir, félög í fasteignarekstri eða nokkuð slíkt.

SAMT eiga bankarnir haug af fasteignum, fasteignafélögum OG ERU EKKERT AÐ FELA ÞAÐ.

Fjármálaeftirlitið lætur sem þetta sé ekki svo.

Svo eru menn að gera grín að Strútnum.

Fussum svi

Miðbæjaríhaldið

Vill að allir fari að lögum.-, ekki bara sumir.

[Haukur Nikulásson, 2.8.2007 kl. 21:02]

84. gr. laga um fjármálafyrirtæki frá árinu 2002 kveða á um að eigið fé skuli ekki vera undir 8% af áhættugrunni. Ég velti því fyrir mér hvort bankarnir standist þetta ákvæði eða ekki. Lögin skýra ekki til fulls hvernig áhættugrunnur er reiknaður en einhvern tíma var ég í þeirri trú að krafan væri að heildareignir væru a.m.k. 8% hærri en heildarskuldir þ.e. eiginfjárhlutfall ætti að vera minnst 8% sem bankarnir ná ekki miðað við ofangreindar tölur. Einhver kann eflaust að skýra þetta betur.