Blaðið eða Fréttablaðið?

Þessi tvö fríblöð standa manni til boða á morgnana. Ég er löngu hættur að kaupa Moggann enda les ég það helsta úr honum á vefnum og finnst ekki óþægilegt að lesa á tölvuskjá. Mörgum finnst óþægilegt að lesa á tölvuskjá og þar ræður vaninn náttúrulega mestu.

Ég hins vegar gerði þá uppgötvun í morgun að mér finnst eiginlega miklu skemmtilegra að lesa Blaðið heldur en Fréttablaðið. Finnst mér vera mun meira af bitastæðum greinum í því heldur en Fréttablaðinu. Uppsetningin á Blaðinu er að mínu mati einhvern veginn líflegri. Ég stend mig auk þess að því að vera óánægður að fá ekki Blaðið á mánudagsmorgni og verð að láta Fréttablaðið duga.

Hver er þín skoðun á þessu?

Athugasemdir

[Ingvar Valgeirsson, 30.5.2007 kl. 10:42]

Mér líður einhvernvegin eins og Blaðið sé minna hlutlægt en Fréttablaðið. Orðalag, fréttaval, hvar fréttir eru staðsettar o.fl. í þeim dúr einhvernvegin hefur þessi áhrif á mig - veit ekki hvort þetta er endilega rétt, en ég fæ þetta gríðarsterkt á tilfinninguna - eins og Fréttablaðið sé að segja mér hvað mér á að finnast, en Blaðið segir mér bara hvað er að gerast. Er ég að bulla?

[Jenný Anna Baldursdóttir, 30.5.2007 kl. 12:10]

Blaðið er uppáhalds.

[Svartinaggur, 30.5.2007 kl. 12:28]

Ingvar, ég skil þig þá að þér finnist Blaðið minna hlutDRÆGT en Fréttablaðið. Orðið hlutlægt hefur nánast andstæða merkingu á við hlutdrægt, þ.e. nálgast að þýða það sama og hlutlaust.

[Brynjar (IP-tala skráð) 30.5.2007 kl. 16:54]

Ég var nú farinn að kalla fréttablaðið fasteignablaðið á tímabili, það var svo yfirflæðandi af fasteignaauglýsingum í því að ég sóaði ekki mínum tíma í að fletta í því. Svo bara er orðið svo mikið af rusli í fréttablaðinu að það eru kannski 4-6 síður sem maður rennir yfir, fletti bara framhjá restinni.

Blaðið er hinsvegar töluvert skárra, hægt að glugga í gegnum það án þess að fá tilfinninguna að það sé verið að þvinga upp á mann endalausum auglýsingum eða kostuðum greinum um einhverja rosalega sniðuga hluti.

[Sigurjón, 30.5.2007 kl. 18:28]

Þetta eru báðir sneplar.

[Haukur Nikulásson, 31.5.2007 kl. 11:13]

Ég er yfirleitt ánægður með að blöðin vitni í mig, en af einhverjum ástæðum er ég ekkert sérstaklega ánægður með að Blaðið skuli vitna í mig varðandi þennan pistil. Þeir birta hann í tómri sjálfhælni! - Mér er nær að vera búa til svona auglýsingar fyrir þá... ókeypis!