Auðvelt að eyða peningum sem maður á ekkert í!

Hér er farin skemmtileg leið við að réttlæta þessa fundadellu sem nú orðið er hægt að leysa með símum og fjarfundabúnaði. Er ekkert af þessu fólki inni í nútímanum?

"Einstakt kynningarverð" á þotuleigunni þýðir að sá sem leigir vélina býst við meiri viðskiptum, sem þá eru að sjálfsögðu dýrari. "Einstakt kynningarverð" hljómar ekki trúverðugt svo ég taki vægt til orða. Þetta virkar eins og að leigusali þotunnar hafi tekið þátt í að fegra þennan kostnaðarlið... eftirá. Einnig er samanburðurinn við áætlunarflugið tekinn á hæsta verði til að draga saman enn frekar verðmuninn. Ég er viss um að flugfélögin hefðu líka verið til í að láta þá hafa "einstakt kynningarverð" líka. Það er jú samkeppni í ferðabransanum ennþá.

Eftir stendur að forsætisráðherrafrúin er tekin með! - Til hvers? Af hverju tók hann ekki bara öll börnin sín með líka til að hafa þetta alvöru fjölskylduvænt? Er þetta ekki vinnuferð? Mér finnst líka ógeðfellt að bjóða með fulltrúum háværustu fjölmiðlanna til að kaupa eða múta þeim til að fá hagstæða umfjöllun í staðinn.  Hér er fimm algerlega óþarfa "farþegum" bætt við og þau væntanlega notuð til að deila niður ferðakostnaði pr. mann og gera samanburðinn enn hagstæðari.

Með fullri virðingu fyrir forsætisráðherra þá er ólykt af þessum verknaði og yfirklórinu á eftir. Þetta væri ekki svona hefðu þau þurft að borga þetta úr eigin vasa. Þetta var úr okkar vasa!

Þotuleigan var 4,2 milljónir

Er Solla að fatta þetta fyrst núna?

Ég er einn þeirra sem þoli ekki núverandi tolla- og vörugjaldakerfi ríkisins. Þetta svo mikil tímaskekkja að það er óþolandi að það skuli ekki vera virk andstaða gegn þessu rugli í þinginu.

Ingibjörg Sólrún virðist skv. þessari frétt að fatta þessa dæmalausu vitleysu fyrst núna.

Það má spyrja sig þeirrar alvarlegu spurningar til hverra verka þessi kona var eiginlega kosin á þing? - Hverju hefur hún áorkað sem fer í sögubækurnar? - Komið á friði í miðausturlöndum með ferð sinni þangað? - Fjölgað í íslenska leynihernum og útrýmt Talibönum í Afganistan og friðað það ólánsland? - Var hún kosin til að fjölga starfsmönnum í utanríkisþjónustu? - Stækka sendiráðin? - Auka notkun ráðherra og fyrirfólks á einkaþotum til að komast á ónauðsynlega fundi sem leysa mætti með nútíma fjarfundabúnaði? - Kom hún í veg fyrir, eða gagnrýndi, hina stórkostlegu "afsláttarsölu" á eignunum á varnarsvæðinu?

Var hún orðin leið á því að gagnrýna vitleysuna í pólitíkinni og er núna bara sátt við að taka þátt í öllu bruðlinu og prjálinu eftir að hún komst að?

Getur einhver upplýst mig um einhver "afrek" hennar eftir að hún varð ráðherra? - Er hún yfirleitt launa sinna (og drjúgra dagpeninga) verð?

Svo allrar sanngirni sé gætt tel ég stóran hluta þessara spurninga megi alveg rata til Geirs Haarde í von um svör. Hann er yfir allt slíkt hafinn og verður bara réttlátlega reiður þegar hann er gagnrýndur og krafinn svara.

Tollfríðindi skili sér í vasa almennings

Alltaf gaman að sjá okkar mann standa sig vel

Ég var að spila með finnunum Simon og Mika í fyrradag á Campo de Golf de las Americas hér á Tenerife og þeir eru ánægðir með sinn finnska mann á Evróputúrnum.

Ég vona bara að Birgir Leifur haldi ró sinni og spili okkur til sóma. Þetta er besta frammistaða hans í talsverðan tíma. Break a leg!

Birgir á næst besta skori dagsins

Er fljótlegast að ljúga sig frá þessu?

Geir Haarde er fljótur að læra af fyrirrennara sínum. Besta vörnin þegar málstaðurinn er vondur er að látast vera réttlátlega reiður. Hann hefur sýnt þetta orðið nokkuð mörgum sinnum undanfarið og það er alltaf fylgni á milli þess hversu reiður hann er og hversu vitlaust mál hann er að verja.

Ef málið er ekki neitt þá hlýtur að vera auðvelt að svara:

Hvað kostaði leiguþotan?

Hversu margir eru á opinberum vegum?

Hversu mörgum fjölmiðlamönnum var boðið á kostnað ríkisins?

Hvers vegna þarf að fela þennan kostnaðarlið sérstaklega?

Hér vantar upp á að eini sýnilegur tilgangur þessa fundar er að Bush þrýsti á aðildarþjóðir (þ.m.t. íslendinga) að fjölga í hersveitum NATO og það muni því ENN frekar auka kostnað íslendinga við þennan fund.

Hvenær ætla íslendingar að sýna Bush að við séum ekki búnir að gleyma viðskilnaði þeirra á varnarsvæðinu? Er Geir strax búinn að gleyma því að hafa kysst Condoleezzu Rice fyrir varnarsamninginn sem var efnisminni en nýju fötin keisarans?

Munaði 100-200 þúsund krónum

Íslenskt efnahagslíf í fréttum BBC World News

Ég sá aðeins restina af frétt BBC World News í sjónvarpi hér á Tenerife sem bar yfirskriftina Iceland financial crisis.

Þið getið séð frétt BBC um sama eða svipað efni hér.

Einkaþota ráðherra kostar sex milljónum meira en áætlunarflug

Er þessu fólki treystandi fyrir fjármunum íslendinga þegar þau stjórna eigin málum með þessum hætti?

Manni finnst ekki bætandi á það tilgangsleysi sem aðild að NATO er í dag að ekki sé aukið við bruðlið með svona ferðaskipulagi.

Breyta þarf réttinum úr hringtorgum

Þegar maður ekur um hringtorg í Evrópu skynjar maður að það þarf að fara sérstaklega varlega um þau vegna þess að um þau gilda ekki sömu reglur og heima á Íslandi.

Reglan hjá okkur er sú að bifreið í innri hring á réttinn, en ekki í ytri hringnum eins og erlendis. Þetta stríðir á móti allsherjarreglunni varúð til hægri. Í hringtorginu gildir nefnilega varúð til vinstri og þetta er leiðinleg og alvarleg þversögn í okkar umferðarreglum.

Mér þætti gaman að heyra álit t.d. Sigurðar Helgasonar eða annarra málsmetandi manna hjá Umferðarstofu varðandi þetta mál.

Hvað veldur þessu ósamræmi? Varð þetta óvart eftir þegar hægri umferð var tekinn upp hér 1968?