Nú má STOKE ER DJÓK höfundurinn éta eitthvað ofan í sig

Ég get alveg samglaðst Stoke að fara upp í úrvaldsdeildina. Þeir leika jú í gamla góða Þróttarabúningnum og þess vegna skildi ég aldrei af hverju Hlyni (Ceres4) stórköttara Þróttar og meðlimur í Merzedes Club var svo uppsigað við félagið að uppnefna þá sem djók.

Nú má Hlynur með heiðri og sóma éta þetta ofan í sig á þessari stundu. Hvað skyldi verðmæti félagsins hafa aukist eftir leik dagsins? Nú hefðu einhverjir betur setið á hlut sínum í félaginu.

Ég hefði líka alveg getað unnt hinum umdeilda Guðjóni Þórðarsyni að fara með liðið upp. Hann vann í því eins og kría í mannaskít en vannst ekki tími til þess vegna skilningsleysis eigendanna á því að vinna með knattspyrnuprímadonnum sem eru jú óaðskiljanlegur hluti þeirra sem við þetta starfa.

Ég stenst því ekki mátið í dag að vera ósammála hinum bloggskrifurum og vera kátur yfir þessum gleðidegi fyrrum íslendingaliðsins í Þróttaragallanum.

WBA og Stoke City í úrvalsdeildina

Athugasemdir

[Vilhjálmur Óli Valsson, 4.5.2008 kl. 17:30]

Ég er sammála þér með að ekki er hægt annað en að samfagna Stoke og stuðningsmönnum félagsins að þessum áfanga sé náð.

Hitt er annað mál að þessum árangri er náð þegar Íslendingar eru hættir að skipta sér af málum þarna. Það verður að segjast eins og er að ástæðan fyrir því að þetta gerðist ekki fyrr er sú að misvitrir menn sátu í stjórn félagsins með Gunnar Gunnarsson í broddi fylkingar og ekki leit hann út fyrir að hafa mikið vit á knattspyrnu.

Þessi stjórn og eignaraðild Íslendinga voru landi og þjóð til minnkunnar.

[Vilhjálmur Óli Valsson, 4.5.2008 kl. 17:35]

Ég biðst afsökunar. Hann heitir víst Gunnar Gíslason fyrrverandi stjórnarformaður Stoke.

[Marinó G. Njálsson, 4.5.2008 kl. 19:21]

Vilhjálmur, ég veit ekki hvaðan þú hefur vitneskju þína um þekkingu Gunnars, en ég man ekki betur en að fyrrverandi landsliðsþjálfari, Ásgeir Sigurvinsson, hafi verið sérlegur ráðgjafi um knattspyrnuleg málefni.  Síðan má bæta því við, að Stoke eins og svo margir aðrir klúbbar í Englandi (og víðar) var illa rekinn og stuðningsmenn félagsins eru almennt sammála um að sú fjárhagslega tiltekt sem Gunnar stóð fyrir sé líklegast ein helsta ástæðan fyrir því að klúbburinn hafi ekki farið í greiðslustöðvun.  Mistök Gunnars og félaga voru að láta hina gömlu eigendur vera með "gullið atkvæði" sem jafngilti neitunarvaldi og var því beitt ótæpilega.  Mér finnst alveg lágmark að menn kynni sér hlutina, áður en ruðst er fram með svona vitleysu.

Og varðandi árangurinn, þá batnaði hann ár frá ári.  Vissulega voru gerð mistök, en Íslendingarnir tóku við ruslliði sem ekkert gat.  Það var einfeldni að ætla að gera Stoke að góðu liði á einu tímabili, hvað þá að koma því upp í Úrvalsdeild 5 árum.  Hluti af vandamálum Íslendinganna var samstöðuleysi hluthafa og stjórnarmanna, þar sem Englendingarnir vildu að Íslendingarnir legðu til alla peningana meðan þeir sjálfir sátu hjá sem áhorfendur.  Með því tókst þeim að reka íslensku eigendurna á þrot.  Peter Coates, núverandi eigandi, var svo óvinsæll hjá stuðningsmönnum Stoke, að mér fannst hálf hallærislegt að hlusta á þá í dag syngja "There's only one Peter Coates" eftir að 2. sætið var tryggt.  Hann var hataður fyrir minna en tveimur árum og talinn mesta illmenni í Stoke-on-Trent á þeim tíma sem hann vann leynt og ljóst gegn Gunnari og félögum.  Sagt var að hann hefði blóðmjólkað félagið á árunum áður en Íslendingarnir tóku við og leynt fyrir Íslendingunum hvað hann hafði í raun farið illa með félagið.  Það er því kaldhæðni og raun fáránlegt að hann teljist dýrlingur meðal stuðningsmanna eftir leikinn í dag.

[Haukur Nikulásson, 4.5.2008 kl. 19:33]

Ekki dettur mér í hug að ræða í smáatriðum þessa sögu við þig Marinó, þú ert greinilega mun betur að þér þar en ég. Takk fyrir innleggið.

Ég viðurkenni fúslega að ég er eiginlega hálffúll að þessi tilraun íslendinganna í rekstri ensks knattspyrnufélags gekk ekki upp. 

[Marinó G. Njálsson, 4.5.2008 kl. 19:46]

Mér fannst það líka grátlegt að hún skyldi mistakast, en þeir höfðu ekki fjárhagslegt úthald eða var það áhuginn sem þvarr út af öllu skítkastinu sem dundi á þeim.  Ég skil þá alveg, en ég býst við að þeim finnst, eins og mér, upphafning PC í dag vera með ólíkindum miðað við hvað maðurinn var óvinsæll fyrir stutt.

[Mummi Guð, 4.5.2008 kl. 20:39]

Það eru margir sem halda því fram að bestu stjórnendurnir hjá knattspyrnuliðunum (ég er ekki að tala um framkvæmdastjórana)  séu þeir sem hafa ekki hundsvit á fótbolta, heldur þeim mun meira viðskiptavit.